ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބޭއްވި ހަތަރުވަނަ ޤައުމީ އަންހެން ޓީ20 ކްރިކެޓް ޝީލްޑުގެ ޗެމްޕިއަންކަން ލ. ކުނަހަންދޫން ހޯދައިފިއެވެ.
މުބާރާތުގެ ޗެމްޕިއަންކަން ކުނަހަންދޫން ހޯދީ މިއަދު ހެނދުނު ކުޅުނު ފައިނަލް މެޗުގައި ފުވައްމުލަކު ޓީމު 36 ލަނޑުން ބަލިކޮށްގެންނެވެ. މިއީ މި މުބާރާތުގެ ޗެމްޕިއަންކަން ކުނަހަންދޫން ވިދިވިދިގެން ހޯދި ހަތަރުވަނަ ފަހަރެވެ.
މާލޭ ކުޅިވަރު އެކުވެނީ ކްރިކެޓް ދަނޑުގައި މިއަދު ކުޅުނު މެޗުގެ ގުރު ދިމާވުމުން ކުނަހަންދޫ އެންމެ ފުރަތަމަ ކުޅެން އަރައި 20 އޯވަރު ހަމަވިއިރު ފަސް ކުޅުންތެރިން ނުބައިވެގެން ވަނީ 125 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 61 ބޯޅައިން 76 ލަނޑު ހެދި ސުމެއްޔާ ހަމީދުއެވެ. މި އިނިންގްސްގައި ފުވައްމުލަކުގެ ފާތިމަތު އަނާލް އާއި ފާތިމަތު މާހާ ވަނީ ކޮންމެ އުކުންތެރިއަކު ދެ ވިކެޓް ނަގާފައެވެ.
ޖަވާބުގައި ފުވައްމުލައް ކުޅެން އެރިއިރު، 20 އޯވަރު ހަމަވިއިރު ހަތް ކުޅުންތިރިން ނުބައިވެގެން ހެދުނީ 89 ލަނޑެވެ. އެ ޓީމުން އެންމެ ރަނގަޅަށް ކުޅުނީ 22 ބޯޅައިން 16 ލަނޑު ހެދި އައިޝަތު އައިމާއެވެ. މި އިނިންގްސްގައި ކުނަހަންދޫގެ ނަބާ ބިންތު ނަސީމާއި، ހަލީމަތު ލައިސާ އާއި، ސުމައްޔާ ހަމީދާއި، ފާތިމަތު މަލްހާގެ އިތުރުން ހައްވާ އިފާސާ ވަނީ ކޮންމެ އުކުންތެރިއަކު ވިކެޓެއް ނަގާފައެވެ.
މޮ މުބާރާތުގެ ވަނަތަށް ހޯދި ކުޅުންތެރިންނަށް އިނާމުދެއްވީ ކްރިކެޓް ބޯޑުގެ ރައީސް މުޙައްމަދު ފައިސަލާއި ނައިބު ރައީސް އަޙްމަދު ހުސެއިނެވެ. މި މުބާރާތުގެ އެންމެ މޮޅު ހޮވުންތެރިއަކަށް ކުނަހަންދޫގެ ހަފްސާ އަބްދުﷲ ހޮވުނުއިރު، އެންމެ މޮޅު އުކުންތެރިއަކަށް ހޮވުނީ ހަތް މެޗުން 19 ވިކެޓް ނެގި ކުނަހަންދޫގެ ނަބާ ބިންތު ނަސީމެވެ. އަދި އެންމެ މޮޅު ކުޅުންތެރިޔަކަށް ހޮވުނީ ކުނަހަންދޫގެ ސުމައްޔާ ބިންތު ހަމީދެވެ.
މި ފަހަރުގެ މުބާރާތުގައި ވާދަކޮށްފައިވަނީ ތިން ޓީމެކެވެ. އެއީ ކުނަހަންދޫ އާއި ފުވައްމުލަކުގެ އިތުރުން މާލޭގެ އަންހެން ޓީމެވެ. މި މުބާރާތަކީ ކްރިކެޓް ބޯޑުން އިންތިޒާމުކޮށްގެން 2017 ވަނަ އަހަރު ފެށި މުބާރާތެކެއެވެ.