އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި އަފްޣާނިސްތާން ބަލިކޮށް، ނިއު ޒީލަންޑުން މޮޅުވުމުގެ ސިލްސިލާ ދަމަހައްޓައިފިއެވެ.
ޗެންނާއިގައި ހުންނަ އެމް.އޭ ޗިދަމްބަރަމް ސްޓޭޑިއަމުގައި ކުޅުނު މި މެޗުން ނިއު ޒީލަންޑް މޮޅުވީ ފަސޭހަކަމާއެކު 149 ލަނޑުންނެވެ.
އިއްޔެ ކުޅުނު މެޗުގެ ގުރު ދިމާވުމުން އަފްޣާނިސްތާނުން ނިންމީ ހޮވުމަށެވެ. އެއާއެކު ނިއު ޒީލަންޑް އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ހަ ކުޅުންތެރިން ނުބައިވެގެން ވަނީ 288 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 80 ބޯޅައިން 71 ލަނޑު ހެދި ގްލެން ފިލިޕްސް އާއި 74 ބޯޅައިން 68 ލަނޑު އެއްކުރި ޓީމުގެ ކެޕްޓަން ޓޮމް ލަތަމްއެވެ.
ޖަވާބުގައި އަފްޣާނިސްތާން ކުޅެން އަރައި 34.4 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 139 ލަނޑެވެ. އެ ޓީމުން އެންމެ ރަނގަޅަށް ކުޅުނީ 62 ބޯޅައިން 36 ލަނޑު ހެދި ރަޙްމަތު ޝާހް އާއި 32 ބޯޅައިން 27 ލަނޑު އެއްކުރި އަޒްމަތުﷲ އޮމަރްޒައިއެވެ. މި އިނިންގްސްގައި ނިއު ޒީލަންޑުގެ މިޗެލް ސަންޓްނާ އާއި ލޮކީ ފާގަސަން ވަނީ ކޮންމެ އުކުންތެރިއަކު ތިން ވިކެޓް ނަގާފައެވެ. އަދި އެ ޓީމުގެ ޓްރެންޓް ބޯލްޓް ވަނީ ދެ ވިކެޓް ނަގާފައެވެ.
10 ޤައުމު ވާދަކުރާ މި މުބާރާތުގައި މިހާތަނަށް ކުޅުނު ހަތަރު މެޗުންވެސް ނިއު ޒީލަންޑް ވަނީ މޮޅުވެފައެވެ. އެއާއެކު އެ ޓީމު އޮތީ ތާވަލުގެ އެއްވަނައިގައި އަށް ޕޮއިންޓާއެކުއެވެ. އަދި އަފްޣާނިސްތާން އޮތީ ތާވަލުގެ ފުލުން ދެވަނައިގައި ހަތަރު މެޗުން ދެ ޕޮއިންޓާއެކުއެވެ.