ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް ދިން ހަމަލަތަކުގެ ބަދަލު ހިފުމުގެ ގޮތުން ޣައްޒާގެ ހުރިހާ މުސްލިމުންނާ ދެކޮޅަށް ލާއިންސާނީ ޖަރީމާތަކެއް ހިންގުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވެ، އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ޔަހޫދީ އިސްރާޢީލުން ހިންގަމުންދާ އުދުވާންތައް ކުށްވެރި ކުރައްވައިފިއެވެ. ގުތެރޭޝް ޒަޔަނިސްޓު އިސްރާޢީލުގެ ޖަރީމާތައް ކުށްވެރި ކުރައްވާފައި ވަނީ، ޗައިނާގެ ވެރިރަށް ބެއިޖިންގައި ބޭއްވި ފޯރަމެއްގައި ތަޤުރީރު ކުރައްވަމުންނެވެ.
ޗައިނާގެ "ބެލްޓް އެންޑް ރޯޑް އިނިޝިއެޓިވަ"ށް 10 އަހަރު ފުރުން ފާހަގަ ކުރުމުގެ ގޮތުން ބޭއްވި ފޯރަމްގައި ތަޤުރީރު ކުރައްވަމުން ގުތެރޭޝް ވަނީ އުދުވާންތައް ވަގުތުން ހުއްޓައިލުމަށް ޒަޔަނިސްޓު އިސްރާޢީލުގެ ޖައްބާރުކަން ބޮޑުވެގެންވާ ބޮޑުވަޒީރު ބެންޖަމިން ނަތަންޔާހޫއަށް ގޮވައިލައްވާފައެވެ. އަދި، ހަމަލަ ބަދަލު ކުރުން ހުއްޓައިލާ، ޣައްޒާގައި އިންސާނީ އެހީއަށް ޖެހިފައިވާ އެތަކެއް މިލިޔަން މުސްލިމުންނަށް އެހީގެ ސާމާނު ފޯރުކޮށްދޭން ހުރަސްއެޅުން ހުއްޓައިލުމަށް ވެސް ގޮވައިލައްވާފައެވެ.
އޭނާ މި ފަދައިން ގޮވައިލައްވާފައި ވަނީ، ޣައްޒާގެ އަލް-އަހްލީ ޢަރަބި ހޮސްޕިޓަލަށް މިސައިލް ހަމަލައެއްދީ، 500 އަށްވުރެ ގިނަ މުސްލިމުން ޝަހީދުކޮށްލި ހާދިސާގެ ކުޑަ ވަގުތު ކޮޅެއް ފަހުންނެވެ. ގުތެރޭޝް ވަނީ، ހަމަލަ ބަދަލު ކުރުން ހުއްޓައިލުމަށް ޙަމާސް ޖަމާޢަތުގެ ކިބައިން ވެސް އެދިވަޑައިގަންނަވާފައެވެ. އަދި، އެ ޖަމާޢަތުން ރަހީނު ކޮށްފައިވާ 250 އެއްހާ ޔަހޫދީން މިނިވަން ކުރުމަށް ގޮވައިލައްވާފައެވެ.
ފޯރަމްގައި ތަޤުރީރު ކުރެއްވުމުގެ ކުރިން، ގުތެރޭޝް ވަނީ އަލް-އަހްލީ ހޮސްޕިޓަލަށް ޔަހޫދީ އިސްރާޢީލުން ދީފައިވާ ރަޙުމު ކުޑަ ހަމަލަ އެންމެ ހަރުކަށި އިބާރާތުން ކުށްވެރި ކުރައްވާފައެވެ. ގުތެރޭޝް ނެރުއްވި ބަޔާނުގައި ޔަހޫދީ އިސްރާޢީލަށް އ.ދގެ ސެކްރެޓަރީ-ޖެނެރަލަކު މީގެ ކުރިން ބޭނުން ކުރައްވާފައި ނުވާ ފަދަ ބަސްފުޅުތައް ބޭނުން ކުރައްވާފައި ކަން ފާހަގަ ކޮށްލަން ޖެހެއެވެ.
ޣައްޒާގެ ޞިއްޙަތާ ބެހޭ ވުޒާރާއިން ބުނީ، އަލް-އަހްލީ ހޮސްޕިޓަލުގައި ތިބި އެތަކެއް ސަތޭކަ މުސްލިމުން ޝަހީދު ކޮށްލާފައި ވަނީ އިސްރާޢީލުން ދިން މިސައިލް ހަމަލައެއްގައި ކަމުގައެވެ. ނަމަވެސް، ޔަހޫދީ އިސްރާޢީލުގެ އަސްކަރިއްޔާއިން ދަނީ އެ ކަން ދޮގު ކުރަމުންނެވެ. ޖައްބާރު ޔަހޫދީން ބުނަމުން ދަނީ، އަލް-އަހްލީ ހޮސްޕިޓަލަށް ހަމަލަ ދީފައި ވަނީ މުޖާހިދުންގެ ޖަމާޢަތެއް ކަމުގައިވާ ޕަލަސްޓީނިޔަން އިސްލާމިކް ޖިހާދު (ޕީ.އައި.ޖޭ) ކަމުގައެވެ. ޕީ.އައި.ޖޭން އެ ތުހުމަތު ދޮގު ކޮށްފައިވާއިރު، ބައިޑަން ވެސް ގަބޫލު ކުރައްވަނީ ޔަހޫދީ ޖައްބާރު ނަތަންޔާހޫ ބުނާ ގޮތަށެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ޣައްޒާގައި ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މުސްލިމުންގެ ޢަދަދު މިހާރު ވަނީ 3,300 އަށް އަރާފައެވެ. އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ. ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.