އެމެރިކާގެ ރައީސް ޖޯ ބައިޑަން ޒަޔަނިސްޓު އިސްރާޢީލުގެ ތެލް އަވީވަށް ވަޑައިގަންނަވައިފިއެވެ. އޭނާ އިސްރާޢީލަށް ވަޑައިގަންނަވާފައި މި ވަނީ، ޔަހޫދީ އިސްރާޢީލުގެ އަސްކަރިއްޔާއާއި ފަލަސްޠީނުގެ ޙަމާސް ޖަމާޢަތާ ދެމެދު ކުރަމުންދާ ހަނގުރާމައަށް ނިމުމެއް ގެނައުމާ ގުޅޭ ގޮތުން މަޝްވަރާ ކުރުމުގެ ނަމުގައެވެ. ހަޤީޤަތަކީ، ޣައްޒާގެ 2.3 މިލިޔަން މުސްލިމުންނާ ދެކޮޅަށް ޔަހޫދީ ޖައްބާރު އަސްކަރިއްޔާއިން ލާއިންސާނީ ޖަރީމާތައް ހިންގަމުން ދަނީ އެމެރިކާގެ ރުހުމާއި އެއްބާރުލުމާ އެކުގައި ކަމެވެ.
ތެލް އަވީވުގެ ވައިގެ ބަނދަރުން ބައިޑަނަށް މަރުޙަބާ ކިޔާފައި ވަނީ ޔަހޫދީ އިސްރާޢީލުގެ ޖައްބާރުކަން ބޮޑުވެގެންވާ ބޮޑުވަޒީރު ބެންޖަމިން ނަތަންޔާހޫއާއި ރައީސް އިއްސާކް ހަރްޒޮގެވެ. އޭނާގެ ދަތުރުފުޅާ ގުޅިގެން ތެލް އަވީވުގައި ސަލާމަތީ ފިޔަވަޅުތައް ވަނީ ވަރަށް ބޮޑަށް ވަރުގަދަ ކޮށްފައެވެ. ވަށައިގެން ތިބީ ހަތިޔާރު އެޅި ފުލުހުންނާއި ސިފައިންނެވެ. "މަރުޙަބާ. އިސްރާޢީލުގެ ހިމާޔަތުގައި ތިޔަ ކުރައްވާ މަސައްކަތަށް ޝުކުރު ކުރަން،" ބައިޑަނަށް މަރުޙަބާ ކިޔަމުން ޖައްބާރު ނަތަންޔާހޫ ބުންޏެވެ.
ނަތަންޔާހޫއާ އެކު ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ބައިޑަން ވަނީ، ޣައްޒާގެ އަލް-އަހްލީ ޢަރަބި ހޮސްޕިޓަލަށް ދީފައިވާ ރަޙުމު ކުޑަ ހަމަލަގެ ފަހަތުގައި ވަނީ ޔަހޫދީ ސިފައިން ކަން ގަބޫލު ކުރައްވަން ދެކޮޅު ހައްދަވާފައެވެ. "ހޮސްޕިޓަލަށް ދީފައިވާ ހަމަލައާ ގުޅިގެން ހިތާމަ ކުރަން. ނަމަވެސް، އަހަރެންނަށް ފެނުނު މަންޒަރުތަކުން އެނގެނީ އެއީ އިސްރާޢީލާ ދެކޮޅު ފަރާތްތަކުން ދީފައިވާ ހަމަލައެއް ކަން،" ބައިޑަން ވިދާޅުވިއެވެ.
މި ބަސްފުޅުތަކުން ދޭހަ ވަނީ، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުގެ އަސްކަރިއްޔާއިން ލާއިންސާނީ ޖަރީމާތަކާއި، ހަނގުރާމައިގެ ކުށްތަކާއި، ގަތުލުއާންމު ހިންގުމާ މެދު އެމެރިކާއިން ރުހޭ ކަން ކަމުގައި މަސްރަޙު ދިރާސާކުރާ ފަރާތްތަކުން ގަބޫލު ކުރެއެވެ. ޔަހޫދީ އިސްރާޢީލުގެ އަސްކަރިއްޔާއިން ހިތުހުރި ގޮތަކަށް ފަލަސްޠީނުގެ ކުށެއް ނެތް އަންހެނުންނާއި، އުމުރުން ދުވަސްވީ މީހުންނާއި ތުއްތު ކުރިން ގަތުލު ކުރުމާ މެދު އެމެރިކާއިން ރުހި ގަބޫލުވާ ކަން ކަމުގައެވެ.
މެދުއިރުމައްޗަށް ކުރައްވާ ދަތުރުފުޅުގައި އުރުދުނަށް ވަޑައިގަންނެވުމަށް ވެސް ބައިޑަން ކުރިން އޮތީ ހަމަޖައްސަވާފައެވެ. އަދި، އުރުދުންގެ ރަސްގެފާނު ޢަބްދުﷲ ދެވަނައިގެ އިސްނެންގެވުމަށް ބާއްވަން އުޅުއްވި ސަމިޓެއްގައި ބައިވެރިވެ ވަޑައިގަންނަވަން ހަމަޖައްސަވާފައެވެ. ނަމަވެސް، އަލް-އަހްލީ ހޮސްޕިޓަލަށް ޒަޔަނިސްޓު އަސްކަރިއްޔާއިން ބޮން އަޅައި، މުސްލިމުންގެ 500 އަށްވުރެ ގިނަ މީހުން ޝަހީދު ކޮށްލުމުން ޢަބްދުﷲ ރަސްގެފާނު ވަނީ އެ ސަމިޓު ކެންސަލް ކުރައްވާފައެވެ. އެ ސަމިޓުގެ މަޤުޞަދަކީ، ޔަހޫދީ އިސްރާޢީލުން ހިންގަމުންދާ ލާއިންސާނީ ގަތުލުއާންމު ހުއްޓުވަން މަޝްވަރާ ކުރުމެވެ.
ބައިޑަން އިސްރާޢީލަށް ވަޑައިގަންނަވާފައި މި ވަނީ، އެއްގަމު މަގުން ޣައްޒާއަށް އަރައި، މުސްލިމުންގެ އިތުރު ބަޔެއްގެ ފުރާނަ ނަގައިލަން ޔަހޫދީ އަސްކަރިއްޔާއިން ތައްޔާރުވަމުންދާ ދަނޑިވަޅެއްގައެވެ. އޮކްޓޫބަރު 7 ވަނަ ދުވަހުން ފެށިގެން ޔަހޫދީ ޓެރެރިސްޓު އަސްކަރިއްޔާއިން މެދުކެނޑުމެއް ނެތި ޣައްޒާއަށް ދެމުންދާ ހަމަލަތަކުގައި މިހާތަނަށް 3,300 އަށްވުރެ ގިނަ މީހުން ވަނީ ޝަހީދު ކޮށްލާފައެވެ.
އެއީ، އަލް-އަހްލީ ހޮސްޕިޓަލަށް ދިން ރަޙުމު ކުޑަ ހަމަލާގައި ޝަހީދު ކޮށްލާފައިވާ 500 އަށްވުރެ ގިނަ މީހުންނާ ނުހިމަނައި، ޣައްޒާއަށް ދެމުންދާ ވައިގެ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދެވެ. އުދުވާންތައް އިތުރަށް ފުޅާ ކުރަން ޔަހޫދީ އަސްކަރިއްޔާގެ ޖައްބާރު ސިފައިންގެ 300,000 އަށްވުރެ ގިނަ މީހުންގެ ފައުޖެއް މިހާރު އޮތީ ޣައްޒާގެ ބޭރުގައި ތައްޔާރީ ހާލަތެއްގައެވެ.
ޣައްޒާގެ ޞިއްޙަތާ ބެހޭ ވުޒާރާއިން ބުނީ، އަލް-އަހްލީ ހޮސްޕިޓަލުގައި ތިބި އެތަކެއް ސަތޭކަ މުސްލިމުން ޝަހީދު ކޮށްލާފައި ވަނީ އިސްރާޢީލުން ދިން މިސައިލް ހަމަލައެއްގައި ކަމުގައެވެ. ނަމަވެސް، ޔަހޫދީ އިސްރާޢީލުގެ އަސްކަރިއްޔާއިން ދަނީ އެ ކަން ދޮގު ކުރަމުންނެވެ. ޖައްބާރު ޔަހޫދީން ބުނަމުން ދަނީ، އަލް-އަހްލީ ހޮސްޕިޓަލަށް ހަމަލަ ދީފައި ވަނީ މުޖާހިދުންގެ ޖަމާޢަތެއް ކަމުގައިވާ ޕަލަސްޓީނިޔަން އިސްލާމިކް ޖިހާދު (ޕީ.އައި.ޖޭ) ކަމުގައެވެ. ޕީ.އައި.ޖޭން އެ ތުހުމަތު ދޮގު ކޮށްފައިވާއިރު، ބައިޑަން ވެސް ގަބޫލު ކުރައްވަނީ ޔަހޫދީ ޖައްބާރު ނަތަންޔާހޫ ބުނާ ގޮތަށެވެ.
ޣައްޒާގައި ޔަހޫދީ އިސްރާޢީލުން ހިންގަމުންދާ ލާއިންސާނީ އުދުވާންތައް މުޅި ދުނިޔެއިން ދަނީ ކުށްވެރި ކުރަމުންނެވެ. ފަލަސްޠީނުގެ ކުށެއް ނެތް ޢާންމުން ގަތުލުކުރުން ހުއްޓައިލުމަށް ގޮވައިލަމުންނެވެ. ނަމަވެސް، އެމެރިކާއިން ދަނީ މި ކަމަށް ހިތްވަރު ދެމުންނެވެ. ޔަހޫދީންގެ ދިފާޢުގައި ފަލަސްޠީނުގެ ކުށެއް ނެތް މުސްލިމުން ގަތުލު ކުރުމަކީ ޔަހޫދީންގެ ހައްޤެއް ކަމަށް ބުނެއެވެ.
ޣައްޒާގެ ކުށެއް ނެތް އަންހެނުންނާއި ކުޑަކުދިންނާ ދެކޮޅަށް ޔަހޫދީ އިސްރާޢީލުގެ ޖައްބާރު ސިފައިން ހިންގަމުންދާ ލާއިންސާނީ އުދުވާނުގައި އެހީތެރިކަން ފޯރުކޮށްދޭން އެމެރިކާއިން ވަނީ އެ ޤައުމުގެ އަސްކަރީ ދެ މަނަވަރު ކަމުގައިވާ ޔޫ.އެސް.އެސް ޑުވައިޓް ޑީ އައިޒެންހަވަރއާއި ޔޫ.އެސް.އެސް ޖެރާލްޑް އާރް ފޯޑް އިސްރާޢީލުގެ އައްސޭރިފަށަށް ފޮނުވާފައެވެ. އެއީ، އަސްކަރީ މަތިންދާބޯޓު އުފުލާ ދެ މަނަވަރެވެ. ޔަހޫދީ އިސްރާޢީލަށް އަސްކަރީ ގޮތުން އެހީތެރިކަން ފޯރުކޮށްދޭން އެމެރިކާގެ އަސްކަރިއްޔާގެ 2,000 އެއްހާ ސިފައިން ތައްޔާރީ ހާލަތަކަށް ގެނެސްފައިވާ ކަމުގައި ބައެއް މީޑިޔާ ރިޕޯޓުތައް ބުނެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.