ޔަހޫދީ އިސްރާއީލުން ޣައްޒާގެ ހޮސްޕިޓަލަކަށް ދިން ދިން ވައިގެ ހަމަލާއެއްގައި 500 އަށް ވުރެ ގިނަ މީހުން ޝަހީދުކޮށްލައިފިއެވެ. މިއީ މިހާތަނަށް އިސްރާއިލުން ޣައްޒާއަށް ދިން އެންމެ ބޮޑު އެއް ހަމަލާކަމަށް ރިޕޯޓުތައް ބުނެއެވެ.
ޣައްޒާގެ ސިއްޙަތާބެހޭ ވުޒާރާގެ އޮފިޝަލެއް ވިދާޅުވީ އިސްރާއީލުން ހަމަލާ ދީފައިވާ ޣައްޒާގެ އަލް އަހްލީ ހޮސްޕިޓަލުގައި ޔަހޫދީންގެ ހަމަލާތަކުގައި ގެދޮރު ގެއްލިފައިވާ އެތައް ހާސް ރައްޔިތުން ވަގުތީ ހިޔާވަހިކަމުގައި އެތަނުގައި ތިބިކަމަށެވެ. މި ޙަމަލާގައި 500އަށް ވުރެ ގިނަ މީހުން ޝަހީދުވެފައިވާއިރު އެތައް ހާސް ބަޔަކު ޒަޚަމްވެފައިވާކަމަށްވެސް އޭނާ ވިދާޅުވިއެވެ.
ހަމަލާގެ ސަބަބުން ބިމާ ހަމަވެފައިވާ އިމާރާތްތަކުގެ ކުނިތަކުގެ ދަށުގައި އެތައް ސަތޭކަ ބަޔަކު ތިބި ކަމަށް ބެލެވޭކަމަށްވެސް ހެލްތް މިނިސްޓްރީން ވިދާޅުވެފައިވެއެވެ. އަދި ޝަހީދުވި މީހުންގެ ސީދާ އަދަދު ނޭނގޭކަމަށްވެސް ހާމަކުރެއްވިއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.