ޔޫރޯ 2024 ކޮލިފައިން ގްރޫޕް ބީގައި ރޭ ފަހު ވަގުތު ގްރީސް ބަލިކޮށް، ނެދަލަންޑްސްއިން މުހިންމު މޮޅެއް ހޯދައިފިއެވެ.
ގްރީސްގެ އެތެންސްގައި ކުޅުނު މެޗުން ނެދަލަންޑްސް މޮޅުވީ 1-0 ގެ ނަތީޖާއަކުންނެވެ.
ދެ ޓީމުގެ ފަރާތުން ވާދެވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފަވަނީ ނެދަލަންޑްސްއިންނެވެ. މެޗުގެ ފުރަތަމަ ހާފުގައި ނެދަލަންޑްސްއަށް ޕެނިލްޓީއަށް ލިބުނު ނަމަވެސް، އެ ޓީމުގެ ފޯވާޑް ވާގް ވެގްހޯސްޓް ފޮނުވާލި ޕެނަލްޓީ ކާމިޔާބު ކުރެވޭ ގޮތެއް ނުވިއެވެ.
މި މެޗުގައި ފެނިގެންދިޔަ ހަމައެކަނި ލަނޑު އިތުރު ވަގުތުގައި ލިބުނު ޕެނެލްޓީއަކުން ނެދަލަންޑްސްއަށް ކާމިޔާބުކޮށްދިނީ ޓީމުގެ ކެޕްޓަން ވާޖިލް ވެން ޑައިކެވެ. މިއީ މިދިޔަ އަހަރުގެ ސެޕްޓެމްބަރު މަހުގެ ފަހުން އޭނާ ޤައުމީ ޓީމަށް ކާމިޔާބުކޮށްދިން ފުރަތަމަ ލަނޑެވެ. މި ޕެނަލްޓީއަކީ އޭރިއާ ތެރެއިން ނެދަލަންޑްސްފެ ޑެންޒެލް ޑަމްފްރީސްއަށް ގްރީސްގެ ކުޅުންތެރިއަކު ކުރި ފައުލަކާ ގުޅިގެން ދިން ޕެނެލްޓީއެކެވެ. މި ޕެނެލްޓީއާ މެދު ހިތްހަމަނުޖެހި ރެފުރީއަށް ޝަކުވާކުރުމުން، ގްރީސްގެ ކޯޗު ގުސް ޕޮއިޓަށް ވަނީ ރަތް ކާޑެއް ދައްކައޮ ދަނޑުން ފޮނުވާލާފައެވެ.
މި މޮޅާއެކު ނެދަލަންޑްސްއިން އަންނަ އަހަރުގެ ޔޫރޯއަށް ކޮލިފައިވުމުގެ އުއްމީދު ދަމެހެއްޓިއިރު، ގްރޫޕް ބީން މި ވަގުތު ޔޫރޯގެ ޖާގައެއް ކަށަވަރުކޮށްފައިވަނީ ކުޅުނު ހަ މެޗުން 18 ޕޮއިންޓް ހޯދާފައިވާ ފްރާންސެވެ. ދެވަނައިގައި އޮތް ނެދަލެންޑްސް އާއި ތިންވަނައިގައި އޮތް ގްރީސްއަށް ވަނީ 12 ޕޮއިންޓް ލިބިފައެވެ.