ޔަހޫދީ އިސްރާޢީލުގެ ޖައްބާރު އަސްކަރިއްޔާއިން ޣައްޒާއަށް ދެމުންދާ ވައިގެ ހަމަލަތަކުގައި 2,800 އަށްވުރެ ގިނަ މުސްލިމުން ޝަހީދު ކޮށްލައި، މިލިޔަނަކަށް ވުރެ ގިނަ މުސްލިމުންގެ ގެދޮރު ނެތިކޮށްލާފައިވާއިރު، ހާލުގައި ޖެހިފައިވާ މުސްލިމުންނަށް އިންސާނީ އެހީތެރިކަން ފޯރުކޮށްދޭން 10 މިލިޔަން އެމެރިކާ ޑޮލަރުގެ އެހީ ފޮނުވާނެ ކަން ޖަޕާނުން ހާމަކޮށްފިއެވެ. މި ކަން ހާމަ ކުރައްވާފައި ވަނީ ޖަޕާނުގެ ޚާރިޖީ ވަޒީރު ޔޯކޮ ކަމިކަވާއެވެ.
ޔަހޫދީންގެ ލާއިންސާނީ ޖަރީމާތަކާ ގުޅިގެން ހާލުގައި ޖެހިފައިވާ މިލިޔަނަކަށް ވުރެ ގިނަ މުސްލިމުންނަށް އިންސާނީ އެހީތެރިކަން ފޯރުކޮށްދޭނެ ކަން ޖަޕާނުން ހާމަކޮށްފައިވާ މި ދަނޑިވަޅުގައި، އިސްރާޢީލުގެ ޖަރީމާތަކަށް އެހީތެރިކަން ފޯރުކޮށްދެވޭނެ ގޮތްތައް ދެނެގަތުމަށް އެމެރިކާގެ ރައީސް ޖޯ ބައިޑަން އިސްރާޢީލަށް ވަޑައިގަންނަވާނެ ކަން ވަނީ އިޢުލާނު ކޮށްފައެވެ. ޔަހޫދީންގެ ޖަރީމާތަކަށް މިހާރު ވެސް އެންމެ ބޮޑަށް ހިތްވަރު ދެމުން ދަނީ އެމެރިކާއިންނެވެ.
މެލޭޝިޔާއިން ވެސް ވަނީ ފަލަސްޠީނުގެ މުސްލިމުންނަށް އިންސާނީ އެހީތެރިކަން ފޯރުކޮށްދޭން ތައްޔާރަށް އޮތް ކަން ހާމަކޮށްފައެވެ. މެލޭޝިޔާގެ ބޮޑުވަޒީރު އަންވަރު އިބްރާހީމް ވަނީ ޙަމާސް ޖަމާޢަތުގެ އިސްވެރިޔާ އިސްމާޢީލް ހަނިއްޔާއާ ފޯނުން ގުޅުއްވައި ވާހަކަފުޅު ދައްކަވާފައެވެ. އަދި، ޣައްޒާއަށް ކާބޯތަކެއްޗާއި ބޭސްފަރުވާގެ ސާމާނު ފޯރުކޮށްދެއްވާނެ ކަމުގައި ވިދާޅުވެފައެވެ.
ޖަޕާނުގެ ޚާރިޖީ ވަޒީރު ކަމިކަވާ ވިދާޅުވީ، ޣައްޒާއަށް 10 މިލިޔަން އެމެރިކާ ޑޮލަރުގެ އެހީ ފޯރުކޮށްދޭނެ ކަން ޔަހޫދީ އިސްރާޢީލުގެ ޚާރިޖީ ވަޒީރަށް ވެސް އަންގަވާފައިވާނެ ކަމުގައެވެ. އަދި، ޣައްޒާގެ މުސްލިމުންނާ ދެކޮޅަށް ދެމުންދާ ހަމަލަތައް ވަގުތުން ހުއްޓައިލުމަށް އިސްރާޢީލުގެ ޚާރިޖީ ވަޒީރަށް ދަންނަވާފައިވާނެ ކަމުގައި ވެސް ކަމިކަވީ ވިދާޅުވިއެވެ. ބައިނަލްއަޤުވާމީ ޤާނޫނުތަކަށް ހުރުމަތްތެރިކޮށް ހިތުމަށް ވެސް އޭނާ ވަނީ ދެ ފަރާތަށް ގޮވައިލައްވާފައެވެ.
މެލޭޝިޔާގެ ބޮޑުވަޒީރު އަންވަރު ވެސް ވަނީ، ހަމަލަ ބަދަލު ކުރުން ހުއްޓައިލުމަށް ދެ ފަރާތަށް ގޮވައިލައްވާފައެވެ. އަދި، މިޞްރުން ޣައްޒާއަށް އެތެރެވެވެން އޮންނަ ރަފަޙް ހުރަސް ހުޅުވައިލާ، ޣައްޒާގައި ހާލުގައި ޖެހިފައިވާ މިލިޔަނަކަށް ވުރެ ގިނަ މުސްލިމުންނަށް އިންސާނީ އެހީތެރިކަން ފޯރުކޮށްދޭން ފެށުމަށް ވެސް އޭނާ ގޮވައިލެއްވިއެވެ. ފަލަސްޠީނުގެ ބިންތައް ފޭރުން ހުއްޓައިލުމަށް ވެސް އޭނާ ވަނީ އިލްތިމާސް ކުރައްވާފައެވެ.
ޔަހޫދީންގެ ލާއިންސާނީ ޖަރީމާތައް ވަގުތުން ހުއްޓައިލުމަށް މުޅި ދުނިޔެއިން އެއް އަޑަކުން ގޮވަމުންދާ މި ދަނޑިވަޅުގައި، އޮކްޓޫބަރު 18 ވާ ބުދަ ދުވަހުގެ ވަގުތެއްގައި އެމެރިކާގެ ރައީސް ބައިޑަން އިސްރާޢީލަށް ވަޑައިގަންނަވާނެ ކަމަށް ބެލެވެއެވެ. އޭނާގެ ދަތުރުފުޅުގެ މައިގަނޑު މަޤުޞަދަކީ، އިސްރާޢީލުގެ ހިމާޔަތާއި ރައްކާތެރިކަން ކަށަވަރު ކޮށްދިނުމުގައި އެމެރިކާއިން ދެމިއޮންނާނެ ކަމުގެ ޔަގީންކަން ޔަހޫދީ އިސްރާޢީލުގެ ޖައްބާރު ކަން ބޮޑުވެގެންވާ ސަރުކާރާއި ރައްޔިތުންނަށް އެރުވުމެވެ.
ނަމަވެސް، އިސްރާޢީލުގައި މި ވަގުތު އޮތީ އެންމެ ރައްކާތެރި ހާލަތެއްގައި ނޫން ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ. ސަބަބަކީ، ޔަހޫދީންގެ އުދުވާންތަކަށް ރައްދު ދިނުމުގެ ގޮތުން ޙަމާސް ޖަމާޢަތުން ވެސް މެދުކެނޑުމެއް ނެތި އިސްރާޢީލުގެ ރަށްތަކަށް ރޮކެޓް ހަމަލަތައް ދެމުން ދިޔުމެވެ. ޙަމާސްގެ ހަމަލަތައް އިސްރާޢީލުގެ މައި ވައިގެ ބަނދަރު ކަމުގައިވާ ބެން ގޫރިއޮން ބައިނަލްއަޤުވާމީ ވައިގެ ބަނދަރަށް ވެސް ދަނީ އަމާޒު ކުރަމުންނެވެ.
މުސްލިމް ޤައުމުތަކުން ޣައްޒާއަށް އިންސާނީ އެހީގެ ސާމާނު ފޮނުވަމުން ދިޔަ ނަމަވެސް، ހާލުގައި ޖެހިފައިވާ މިލިޔަނަކަށް ވުރެ ގިނަ މީހުންނަށް އެ ތަކެތި ފޯރުކޮށްދެވޭނެ ގޮތެއް ނެތެވެ. މިޞްރާއި ޣައްޒާ ގުޅޭ ރަފަޙް ސަރަޙައްދީ ހުރަސް ކައިރީގައި މިހާރު ވެސް ގިނަ ޢަދަދެއްގެ ލޮރީއާއި ޓްރަކް ތާށިވެފައި އެބައޮތެވެ. ހަމަލަ ބަދަލު ކުރުންތައް ހުއްޓައިލާ، އިންސާނީ އެހީގެ ސާމާނު ޣައްޒާއަށް އެތެރެ ކުރުމުގެ ފުރުޞަތު ދޭން ޔަހޫދީ އިސްރާޢީލުން އެއްބަސްވެފައިވާ ކަމަށް ކުރިން ރިޕޯޓު ކޮށްފައި އޮތް ނަމަވެސް، އިސްރާޢީލުން ވަނީ އެ ރިޕޯޓުތައް ދޮގު ކޮށްފައެވެ. ޣައްޒާ އަދިވެސް އޮތީ އެއްގަމާއި، ކަނޑާއި ވައިގެ މަގުން ފުރަބަންދު ކޮށްފައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. މި އޮޕަރޭޝަންގެ ދަށުން ޙަމާސްއިން ވަނީ 1,400 އެއްހާ ޔަހޫދީން މަރައިލާފައެވެ. އަދި، ޙަމާސްއިން 199 މީހުން ރަހީނު ކޮށްފައިވާ ކަމަށް އިސްރާޢީލުން ބުނާއިރު، ޙަމާސްއިން ބުނީ 250 އެއްހާ މީހުން އެ ޖަމާޢަތުގެ ބެލުމުގެ ދަށުގައި ތިބި ކަމުގައެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.