އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުން ސްރީ ލަންކާ އަތުން އޮސްޓްރޭލިއާ މޮޅުވެއްޖެއެވެ.
ލަކްނައުގައި ހުންނަ އެކަނަ ސްޕޯޓްސް ސިޓީ ސްޓޭޑިއަމުގައި ކުޅުނު މި މެޗުން އޮސްޓްރޭލިއާ މޮޅުވީ ފަސް ވިކެޓުންނެވެ. މިއީ މި ފަހަރުގެ މުބާރާތުގައި އޮސްޓްރޭލިއާއިން ހޯދި ފުރަތަމަ މޮޅެވެ.
އިއްޔެ ކުޅުނު މެޗުގެ ގުރު ދިމާވުމުން ލަންކާ އެންމެ ފުރަތަމަ ކުޅެން އަރައި 43.3 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 209 ލަނޑެވެ. އެ ޓީމުން އެންމެ ރަނގަޅަށް ކުޅުނީ 82 ބޯޅައިން 78 ލަނޑު ހެދި ކުސަލް ޕެރޭރާ އާއި 67 ބޯޅައިން 61 ލަނޑު އެއްކުރި ޕަތުމް ނިސަންކައެވެ.
މި އިނިންގްސްގައި އޮސްޓްރޭލިއާގެ އެޑަމް ޒަމްޕާ ވަނީ އަށް އޯވަރުގައި 47 ލަނޑަށް ހަތަރު ވިކެޓް ނަގާފައެވެ. އަދި އެ ޓީމުގެ މިޗެލް ސްޓާކް އާއި ކެޕްޓަން ޕެޓް ކަމިންސް ވަނީ ކޮންމެ ކުޅުންތެރިއަކު ދެ ވިކެޓް ނަގާފައެވެ.
ޖަވާބުގައި އޮސްޓްރޭލިއާ ކުޅެން އަރައި އެ ޓީމުން ވަނީ 35.2 ވަނަ އޯވަރުގައި ފަސް ކުޅުންތެރިން ނުބައިވެގެން 215 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ 59 ބޯޅައިން 58 ލަނޑު ހެދި ޖޯޝް އިންގްލިސް އާއި 51 ބޯޅައިން 52 ލަނޑު އެއްކުރި މިޗެލް މާޝްއެވެ.
10 ޤައުމު ވާދަކުރާ މި މުބާރާތުގައި އޮސްޓްރޭލިއާއިން ފުރަތަމަ މޮޅު ހޯދިއިރު، އެ ޓީމު އޮތީ ތާވަލުގެ އަށްވަނައިގައި ކުޅުނު ތިން މެޗުން ލިބުނު ދެ ޕޮއިންޓާއެކުއެވެ. އަދި ލަންކާ އޮތީ ތާވަލުގެ ފުލުން ދެވަނައިގައި އަދި މިހާތަނަށް މޮޅެއް ނުލިބިއެވެ.