ޢައްޒާއަށް ބޮން އެޅުން ވަގުތީ ގޮތުން މެދުކަނޑައިލަން ނިންމާފައިވާ ކަމަށް ބުނާ ރިޕޯޓުތައް ޔަހޫދީން ދޮގުކޮށްފި

ޣައްޒާގެ މުސްލިމުންނާ ދެކޮޅަށް ޔަހޫދީ އިސްރާޢީލުގެ އަސްކަރިއްޔާއިން ދެމުންދާ ނުރައްކާތެރި ވައިގެ ހަމަލަތައް ވަގުތީ ގޮތުން މެދުކަނޑައިލާ، އިންސާނީ އެހީތެރިކަން ފޯރުކޮށްދިނުމުގެ ފުރުޞަތު ދޭން އިސްރާޢީލުން އެއްބަސްވެފައިވާ ކަމަށް ބުނާ ރިޕޯޓުތައް އެ ޤައުމުން ދޮގުކޮށްފިއެވެ. ރިޕޯޓުތައް ބުނާ ގޮތުގައި، ޢައްޒާއާއި މިޞްރު ގުޅޭ ރަފަޙް ސަރަޙައްދީ ރޮނގު ހުޅުވައިލާ، ޣައްޒާގެ ރައްޔިތުންނަށް އިންސާނީ އެހީގެ ސާމާނު ފޯރުކޮށްދޭން ޔަހޫދީ އިސްރާޢީލުން ވަނީ އެއްބަސްވެފައެވެ. ނަމަވެސް، ޙަމާސް ޖަމާޢަތުން ވެސް ވަނީ އެ ފަދަ އެއްބަސްވުމަކާ ހަމައަށް އާދެވިފައި ނުވާ ކަމަށް ބުނެފައެވެ.

އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ވައިގެ މަގުން ޣައްޒާއަށް ދެމުންދާ ނުރައްކާތެރި ހަމަލާތަކުގައި ޝަހީދުކޮށްލާފައިވާ ފަލަސްޠީނުގެ މުސްލިމުންގެ ޢަދަދު މިހާރު ވަނީ 2,670 އަށް އަރާފައެވެ. އަދި، އިތުރު 9,600 އެއްހާ މުސްލިމުން ވަނީ ޒަޚަމުކޮށްލާފައެވެ. ޝަހީދުކޮށްލާފައިވާ މީހުންގެ ތެރޭގައި 724 އަށްވުރެ ގިނަ ޢަދަދެއްގެ ކުޑަކުދިން ހިމެނޭ ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ.

ޔަހޫދީންގެ ލާއިންސާނީ ހަމަލާތަކުގައި ޣައްޒާގެ ރައްޔިތުން ދިރިއުޅޭ ގެދޮރު ވަނީ ސުންނާފަތިކޮށް، ބިމާ ހަމަކޮށްލާފައެވެ. އ.ދއިން ބުނީ، ޣައްޒާގައި ދިރިއުޅޭ 1 މިލިޔަނަށް ވުރެ ގިނަ މީހުންގެ ގެދޮރު ފާއިތުވި ހަތް ދުވަހުގެ ތެރޭގައި ގެއްލިފައިވާ ކަމުގައެވެ.

މެދުކެނޑުމެއް ނެތި، ޔަހޫދީ އިސްރާޢީލުން ޣައްޒާގެ ދެކުނުގެ ސަރަޙައްދުތަކަށް ވައިގެ ހަމަލަތައް ދެމުންދާއިރު، އެ ހަމަލަތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި 1,000 އަށްވުރެ ގިނަ މީހުން އަދިވެސް ތާށިވެފައި ތިބި ކަމަށް ޣައްޒާގެ އޮފިޝަލުން ވިދާޅުވިއެވެ. އަދި، އެ މީހުން ސަލާމަތް ކުރަން ހުއްޓުމެއް ނެތި މަސައްކަތް ކުރަމުންދާ ކަމުގައި ވެސް ފަލަސްޠީނުގެ ސިވިލް ޑިފެންސް ޓީމުން ބުންޏެވެ. އޭގެ ތެރޭގައި ގިނަ ޢަދަދެއްގެ ބަޔަކު މަރުވެފައިވާ ކަމަށް ބެލެވޭ ކަމުގައި ވެސް މަސްރަޙު ދިރާސާކުރާ ފަރާތްތަކުން ބުނެއެވެ.

ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޔަހޫދީ އިސްރާޢީލުގެ ޖައްބާރުކަން ބޮޑުވެގެންވާ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ ޙަމާސްގެ ހަމަލަތަކުގައި މަރައިލާފައިވާ ޔަހޫދީންގެ ޢަދަދު 1,400 އަށް އަރާފައިވާ ކަމުގައެވެ. އަދި، 199 މީހުން ރަހީނުކޮށްފައިވާ ކަމުގައެވެ.

ޣައްޒާއަށް ބޮންއެޅުން ވަގުތީ ގޮތުން މެދުކަނޑައިލާ، އިންސާނީ އެހީގެ ސާމާނު ފޯރުކޮށްދޭން ފުރުޞަތު ދިނުމަށް ޔަހޫދީ އިސްރާޢީލުން އެއްބަސްވެފައިވާ ކަން އިޢުލާނު ކުރައްވާފައި ވަނީ މިޞްރު ސަރުކާރުގެ ދެ އޮފިޝަލެކެވެ. ނަމަވެސް، ޙަމާސް ޖަމާޢަތުން ވެސް ވަނީ އެ ފަދަ އެއްބަސްވުމަކަށް އަމަލު ކުރަން ފަށާފައި ނުވާ ކަމަށް ބުނެފައެވެ. އަދި، ރަފަޙް ހުރަސް ހުޅުވާފައި ނުވާ ކަމުގައި ވެސް ޙަމާސްއިން ބުނެއެވެ.

މި ކަމާ ގުޅޭ ރިޕޯޓުތައް ޢާންމުވުމާ ގުޅިގެން، ޔަހޫދީ އިސްރާޢީލުގެ ކެބިނުޓައި ހިމެނޭ ބައެއް ވަޒީރުން ވަނީ، ޣައްޒާގައި ހާލުގައި ޖެހިފައިވާ 1.1 މިލިޔަނަށް ވުރެ ގިނަ މުސްލިމުންނަށް އިންސާނީ އެހީތެރިކަން ފޯރުކޮށްދިނުމާ ދެކޮޅަށް ވާހަކަ ދައްކާފައެވެ. ކެބިނެޓުގެ ހަކަތައާ ބެހޭ ވަޒީރު އިސްރާޢީލް ކަޓްޒް ބުނީ، ޣައްޒާގެ މުސްލިމުންނަށް އިންސާނީ އެހީ ފޯރުކޮށްދޭން ދެކޮޅު ހަދާނެ ކަމުގައެވެ. އަދި، އެ ކަން ހުއްޓުވާނެ ކަމުގައެވެ. ޔަހޫދީ އިސްރާޢީލުގެ ސަޤާފަތާ ބެހޭ ވަޒީރު މިކީ ޒޯހާރް ވެސް ވަނީ، ޣައްޒާއަށް އެހީ ފޯރުކޮށްދިނުމާ ދެކޮޅަށް އަޑުއުފުލާފައެވެ.

ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.