ކުލަގަދަ ރަސްމިއްޔާތަކާއެކު އެސްޓީއޯ މަކިޓާ ޖޫނިއަރ އެތުލެޓިކްސް ޗެމްޕިއަންޝިޕް 2023 ކުޅުދުއްފުށި ސިޓީގައި ރަސްމީކޮށް ފަށައިފިއެވެ.
ކުޅުދުއްފުށި ސިޓީގައި ރޭ މުބާރާތް ހުޅުވުމަށް ބޭއްވި ރަސްމިއްޔާތު ޝަރަފްވެރި ކޮށްދެއްވީ ކުޅުދުއްފުށި ސިޓީ ކައުންސިލްގެ މޭޔަރު އަހުމަދު އާތިފްއެވެ. މި ރަސްމިއްޔާތުގައި ށ. އަތޮޅު ކައުންސިލް ރައީސާއި، އެތްލެޓިކްސް އެސޯސިއޭޝަންގެ ނައިބް ރައީސް އަހުމަދު އަޒީލްއާއި، އެސޯސިއޭޝންގެ ވެރިންނާއި، ކުޅުދުއްފުށީ ސިޓީ ކައުންސިލްގެ މެމްބަރުންނާއި، މުބާރާތުގައިި ވާދަކުރާ ސްކޫލުތަކުގެ އެތުލީޓުންނާއި ގިނަ އަދަދެއްގެ ބެލެނެވެރިން ބައިވެރި ވެފައިވެއެވެ.
މުބާރާތް ރަސްމީކޮށް ފަށާފައިވަނީ ދަންމަރު ރޯކުރުމުގެ ޚާއްސަ އިވެންޓަކުންނެވެ. ދަންމަރު ރޯކުރީ މޭޔަރު އާތިފްއެވެ. މުބާރާތް ފެށުމުުގެ ހުއްދައާއި، ދަންމަރު ރޯކުރުމުގެ ހުއްދައަށް އެދުނީ ކުޅުފުއްޓަށް ނިސްބަތްވާ ޤައުމީ އެތްލެޓްކްސް ޓީމުގެ ދެ އެތުލީޓުން ކަމަށްވާ އަހުނާ ނިޒާރާއި، ރިޒާއެވެ.
ކުޅުދުއްފުށި ސިޓީގައި ބާއްވާ މިމުބާރާތުގައި 35 ސްކޫލަކުން 1124 އެތުލީޓުން ވާދަކުރެއެވެ. އެއީ 505 އަންހެން އެތުލީޓުންނާއި، 619 ފިރިހެން އެތުލީޓުންނެވެ. މިމުބާރާތް ކުރިއަށް ދާނީ މިމަހުގެ 20 ވަނަ ދުވަހުގެ ނިޔަލަށެވެ. މުބާރާތް ނިންމުމަށްވެސް ޚާއްސަ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ.