ޔޫރޯ 2024 ކޮލިފައިން ގްރޫޕް ޑީގައި ރޭ ލެޓްވިއާ ބަލިކޮށް، އަންނަ އަހަރުގެ މުބާރާތުގެ ޖާގައެއް ތުރުކީން ހޯދައިފިއެވެ.
އަމިއްލަ ޤައުމުގައި ރޭ ކުޅުނު މެޗުން ތުރުކީ މޮޅުވީ ފަސޭހަކަމާއެކު 4-0 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 13 ވަނަ މިނެޓުގައި ތުރުކީން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ޔޫނުސް އަކްގިންއެވެ. އަދި މެޗުގެ ފަހުކޮޅު ތުރުކީން ވަނީ ގާތްގާތުގައި ތިން ލަނޑު ޖަހާފައެވެ.
އެގޮތުން މެޗުގެ 84 ވަނަ މިނެޓުގައި އެ ޓީމުގެ ލީޑު ފުޅާކޮށްދިނީ ބަދަލަކަށް ކުޅެން ނުކުތް ޖެންކް ޓޯޒުންއެވެ. އަދި އޭގެ ހަތަރު މިނެޓު ފަހުން މިޑްފީލްޑަރު ކެރެމް އަކްޓޯކޯލޫ ވަނީ ތުރުކީގެ ތިންވަނަ ލަނޑު ޖަހައިދީފައެވެ. އަދި މެޗުގެ އިތުރު ވަގުތުގެ ތެރޭގައި އެ ޓީމުގެ ފަހު ލަނޑު ކާމިޔާބުކޮށްދިނީ ދެވަނަ ލަނޑުވެސް ޖަހައިދިން ޓޯޒުންއެވެ.
މި މޮޅާއެކު އަންނަ އަހަރުގެ ޔޫރޯގެ ޖާގައެއް ތުރުކީން ހޯދިއިރު، ގްރޫޕް ޑީގެ އެއްވަނައިގައި އެ ޓީމު އޮތީ ކުޅުނު ހަތް މެޗުން ލިބުނު 16 ޕޮއިންޓާއެކުއެވެ. މި ގްރޫޕުގައި ރޭ ވޭލްސްއިން 2-1 ގެ ނަތީޖާއަކުން އާއި ކްރޮއޭޝިއާ ބަލިކުރުމާއެކު، ދެވަނަ ޓީމުގެ ވާދަވެރިކަން ވަނީ ބޮޑުވެފައެވެ. އެގޮތުން ވޭލްސް އާއި ކްރޮއޭޝިއާއަށް ވަނީ ހަ މެޗުން 10 ޕޮއިންޓް ލިބިފައެވެ. ވޭލްސް އަށް ބާކީ އޮތީ އަރްމީނިއާ އާއި ތުރުކީއާ ދެކޮޅަށް ކުޅޭ މެޗުތަކެވެ. އަދި ކްރޮއޭޝިއާ އަށް އޮތީ ލެޓްވިއާ އާއި އާރްމިނިއާއާ ދެކޮޅަށް ކުޅޭ މެޗުތަކެވެ.
އަންނަ އަހަރުގެ ޖޫން މަހުގެ 14 އިން ޖުލައި މަހުގެ 14 އަށް އޮންނަ ޔޫރޯ ފުޓްބޯޅަ މުބާރާތަށް މިހާތަނަށް ކޮލިފައިވެފައިވަނީ ހަތް ޤައުމެކެވެ. އެއީ ތުރުކީގެ އިތުރުން މުބާރާތް ބާއްވާ ޤައުމު ޖަރުމަނާއި ބެލްޖިއަމާއި، ފްރާންސް އާއި، ޕޯޗުގަލާއި، ސްޕެއިން އަދި ސްކޮޓްލަންޑެވެ.