ޔޫރޯ 2024 ކޮލިފައިން ގްރޫޕް އޭގައި ރޭ ނޯވޭ ބަލިވުމުން، އަންނަ އަހަރުގެ މުބާރާތަށް ސްޕެއިނާއި ސްކޮޓްލަންޑް ކޮލިފައިވެއްޖެއެވެ.
އަމިއްލަ ޤައުމުގައި ރޭ ކުޅުނު މެޗުން ނޯވޭ ވަނީ ސްޕެއިން އަތުން 1-0 ގެ ނަތީޖާއަކުން ބަލިވެފައެވެ.
މި މެޗުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގެ 20 ވަނަ މިނެޓުގައި ފޯވާޑް އަލްވާރޯ މޮރާޓާ ވަނީ ލަނޑެއް ޖަހާފައެވެ. އެކަމަކު ވީޑިއޯ އެސިސްޓަންޓް ރެފުރީ (ވީއޭއާރް) އިން ނިންމާފައިވަނީ އެއީ އޮފްސައިޑް ލަނޑެއް ކަމަށެވެ. ނަމަވެސް ދެވަނަ ހާފު ފަށައިގެން ހަތަރުވަނަ މިނެޓުގައި ސްޕެއިނުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޒުވާން މިޑްފީލްޑަރު ގަވީއެވެ.
މި މޮޅާއެކު އަންނަ އަހަރުގެ ޔޫރޯގެ ޖާގައެއް ސްޕެއިނުން ހޯދިއިރު، ގްރޫޕް އޭގެ އެއްވަނައިގައި އެ ޓީމު އޮތީ ކުޅުނު ހަ މެޗުން ލިބުނު 15 ޕޮއިންޓާއެކުއެވެ. ސްޕެއިނާއެކު މި ގްްރޫޕުން ދެން ކޮލިފައިވި ސްކޮޓްލަންޑަށްވެސް ވަނީ ހަ މެޗުން 15 ޕޮއިންޓް ލިބިފައެވެ. ތިންވަނައިގައި އޮތް ނޯވޭއަށް ހަތް މެޗުން ލިބިފައިވަނީ 10 ޕޮއިންޓެވެ. އެއާއެކު ނޯވޭއަށް ކޮލިފައިންގެ ސީދާ ޖާގައެއް ނުލިބޭއިރު، ޕްލޭއޮފް ބުރުންވެސް އެ ޓީމަށް ފުރުސަތު ލިބުން އޮތީ ހަނިކޮށެވެ.
މި ގްރޫޕުގެ އަނެއް މެޗުގައި ރޭ ޖޯޖިއާއިން ވަނީ އަމިއްލަ ދަނޑުގައި ސައިޕްރަސް އަތުން ފަސޭހަކަމާއެކު 4-0 ގެ ނަތީޖާއަކުން މޮޅުވެފައެވެ.