ޔަހޫދީ އިސްރާޢީލުގެ ޖައްބާރު އަސްކަރިއްޔާއިން މެދުކެނޑުމެއް ނެތި ޣައްޒާއަށް ދެމުންދާ ވައިގެ ހަމަލާތަކުގައި ފަލަސްޠީނުގެ 50 ޢާއިލާއެއްގެ ހުރިހާ މެންބަރުން ޝަހީދު ކޮށްލާފައިވާ ކަން ހާމަވެއްޖެއެވެ. މި ކަން ހާމަކޮށްފައި ވަނީ ފަލަސްޠީނުގެ ޞިއްޙަތާ ބެހޭ ވުޒާރާއިންނެވެ. އެ ވުޒާރާއިން ބުނީ، ޢައްޒާގެ ސިވިލް ރަޖިސްޓަރީގައި އޮތް 50 ޢާއިލާއަކަށް ނިސްބަތްވާ ހުރިހާ މެންބަރުން ފާއިތުވި ހަތް ދުވަހުގެ ތެރޭގައި ޝަހީދުކޮށްލާފައިވާ ކަމުގައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ވައިގެ މަގުން ޣައްޒާއަށް ދެމުންދާ ނުރައްކާތެރި ހަމަލާތަކުގައި ޝަހީދުކޮށްލާފައިވާ ފަލަސްޠީނުގެ މުސްލިމުންގެ ޢަދަދު މިހާރު ވަނީ 2,670 އަށް އަރާފައެވެ. އަދި، އިތުރު 9,600 އެއްހާ މުސްލިމުން ވަނީ ޒަޚަމުކޮށްލާފައެވެ. ޝަހީދުކޮށްލާފައިވާ މީހުންގެ ތެރޭގައި 724 އަށްވުރެ ގިނަ ޢަދަދެއްގެ ކުޑަކުދިން ހިމެނޭ ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ.
ޔަހޫދީންގެ ލާއިންސާނީ ހަމަލާތަކުގައި ޣައްޒާގެ ރައްޔިތުން ދިރިއުޅޭ ގެދޮރު ވަނީ ސުންނާފަތިކޮށް، ބިމާ ހަމަކޮށްލާފައެވެ. އ.ދއިން ބުނީ، ޣައްޒާގައި ދިރިއުޅޭ 1 މިލިޔަނަށް ވުރެ ގިނަ މީހުންގެ ގެދޮރު ފާއިތުވި ހަތް ދުވަހުގެ ތެރޭގައި ގެއްލިފައިވާ ކަމުގައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޔަހޫދީ އިސްރާޢީލުގެ ޖައްބާރުކަން ބޮޑުވެގެންވާ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ ޙަމާސްގެ ހަމަލަތަކުގައި މަރައިލާފައިވާ ޔަހޫދީންގެ ޢަދަދު 1,400 އަށް އަރާފައިވާ ކަމުގައެވެ. އަދި، 120 އަށްވުރެ ގިނަ ޔަހޫދީން ރަހީނުކޮށްފައިވާ ކަމުގައެވެ.
ޔަހޫދީ އިސްރާޢީލުގެ ޖައްބާރު ސިފައިން މިހާރު ދަނީ އެއްގަމު މަގުން ޣައްޒާއަށް އަރައި، ފަލަސްޠީނުގެ ކުށެއް ނެތް މުސްލިމުންގެ ލޭއޮހޮރުވައިލަން ތައްޔާރުވަމުންނެވެ. ޔަހޫދީ ސިފައިންގެ 300,000 އެއްހާ މީހުންގެ ލަޝްކަރެއް މިހާރު އޮތީ ޣައްޒާގެ ފެންސް ކައިރިއަށް ޖަމާކޮށްފައެވެ. އަދި، އަސްކަރީ ޓޭންކުފަހަރު ފަދަ ގިނަ ޢަދަދެއްގެ ބަރުހަތިޔާރު ވެސް ވަނީ އެ ސަރަޙައްދަށް ޖަމާކޮށްފައެވެ.
ޢަރަބި ލީގާއި އެފްރިކާގެ އިއްތިހާދު (އޭ.ޔޫ)ން ވަނީ މި ކަން އެންމެ ހަރުކަށި އިބާރާތުން ކުށްވެރި ކޮށްފައެވެ. ޢަރަބި ލީގާއި އޭ.ޔޫން ބުނީ، އެއްގަމު މަގުން ޔަހޫދީ ސިފައިން ޣައްޒާއަށް އަރައި ގަތުލުއާންމެއް ހިންގާނެ ކަމަށް ބެލެވޭ ކަމުގައެވެ. އަދި، ޣައްޒާގެ މުސްލިމުންގެ ނަސްލު ނައްތައިލަން ޔަހޫދީން ރާވަމުންދާ ކަމުގައި ވެސް އެ ދެ ގުޅުމުން ބުންޏެވެ. އެ ދެ ފަރާތުން ވަނީ، މި ފަދަ ނުރައްކާތެރި އަމަލެއް ހިންގުމުގެ ފުރުޞަތު ޔަހޫދީ އިސްރާޢީލަށް ނުދިނުމަށް އ.ދއަށް ގޮވައިލާފައެވެ.
އެއްގަމު މަގުން ޣައްޒާއަށް އަރައި އޮޕަރޭޝަނެއް ހިންގުމާ ދެކޮޅަށް އީރާނުން ވެސް ވަނީ އިންޒާރުދީފައެވެ. އެ ޤައުމުގެ ޚާރިޖީ ވަޒީރު ޙުސައިން އާމިރުޢަބްދައްލިހައްޔާނީ ވިދާޅުވީ ޔަހޫދީ ސިފައިން އެއްގަމު މަގުން ޣައްޒާއަށް އަރައިފިނަމަ، އިސްރާޢީލަކީ ހަނަފަސް ސަހަރާއަކަށް ހަދައިލާނެ ކަމުގައެވެ. އޭނާ މި މޭރުމުން ޔަހޫދީ އިސްރާޢީލަށް އިންޒާރު ދެއްވާފައި ވަނީ ޤަޠަރަށް ކުރެއްވި ދަތުރުފުޅެއްގައި، ޙަމާސް ޖަމާޢަތުގެ އިސްވެރިޔާ އިސްމާޢީލް ހަނިއްޔާއާ އެކު ބޭއްވެވި ބައްދަލުވުމަކަށް ފަހުއެވެ.
އޭނާ ވަނީ ޤަޠަރުގެ އަމީރު ޝައިޚް ތަމީމީ ބިން ޙަމަދް އަލް-ޘާނީއާ ވެސް ބައްދަލުކުރައްވައި، ޔަހޫދީ އިސްރާޢީލުން ޣައްޒާގެ އަޚުންނާއި އުޚްތުންނާ ދެކޮޅަށް ހިންގަމުންދާ ލާއިންސާނީ ޖަރީމާތައް ހުއްޓުވުމާ ގުޅޭ ގޮތުން މަޝްވަރާ ކުރައްވާފައެވެ. އާމިރުޢަބްދައްލިހައްޔާނީ ވިދާޅުވީ، ޔަހޫދީ އިސްރާޢީލުގެ ދިފާޢުގައި އެމެރިކާއިން ތެދުވެފައިވާ ކަމުގައެވެ. އަދި، ޣައްޒާގެ މުސްލިމުންނާ ދެކޮޅަށް އިސްރާޢީލުން ކުރަމުންދާ ހަނގުރާމަ ފުޅާކޮށްފި ނަމަ، އެމެރިކާއަށް ވެސް ބޮޑެތި ގެއްލުންތަކެއް ލިބޭނެ ކަން ދަންނަން ޖެހޭނެ ކަމުގައެވެ.
އޭނާ އެމެރިކާއަށް އިންޒާރު ދެއްވާފައިވާ މި ދަނޑިވަޅުގައި، އެމެރިކާއިން ވަނީ އެ ޤައުމުގެ އަސްކަރީ މަނަވަރު ޔޫ.އެސް.އެސް ޑުވައިޓް ޑީ އައިޒެންހަވަރ އިސްރާޢީލުގެ އައްސޭރިފަށަށް ގެންގޮސްފައެވެ. އެއީ، އަސްކަރީ މަތިންދާބޯޓު އުފުލާ މަނަވަރެކެވެ. އެމެރިކާގެ އަސްކަރީ މަތިންދާބޯޓު އުފުލާ އެހެން މަނަވަރެއް ކަމުގައިވާ ޔޫ.އެސް.އެސް ޖެރާލްޑް އާރް ފޯޑް މިހާރު ވެސް އޮތީ އިސްރާޢީލުގެ އައްސޭރިފަށުގައި ބަނދަރުކޮށްފައެވެ. މި ދެ އުޅަނދު ފޮނުވުމުގެ ބޭނުމަކީ، ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި އެހީތެރިކަން ފޯރުކޮށްދީ، އެއްބާރުލުން ދިނުމެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.