ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްގެ މަޤާމަށް ދިވެހި ފުޓުބޯޅަ ތާރީޚު ދުށް އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ގެންނަން ޚާއްސަ ހަރަކާތެއް ފަށައިފިއެވެ.
ދިވެހި ފުޓްބޯޅައިގެ ހާލަތު ދުވަހެއް ދުވަހަކަށް ގޯސްވަމުން އަންނައިރު، އެފްއޭއެމުގެ މުވައްޒަފުންނަށް މުސާރަ ނުދޭ މައްސަލަ އާއި އެ އިދާރާގެ ދަރަނީގެ ބޮޑެތި މައްސަލަތަކެއް ވަނީ ފެންމަތިވެފައެވެ. އެއާއެކު ބޮޑެތި ކުލަބުތަކެއް ފަހަތުގައި ތިބެގެން އެފްއޭއެމުގެ ރައީސަކަށް ދަގަނޑޭ ގެންނަން މަސައްކަތްތަކެއް ކުރާ ކަމަށް ވަނީ މަޢުލޫމާތު ލިބިފައެވެ.
އެފްއޭއެމުގެ ރައީސަކަށް ދަގަނޑޭ ގެންނަ ކަމަށް ބުނެ ޚާއްސަ ހަރަކާތެއް ފަށައި އެކަން އިއުލާންކޮށްފައިވަނީ ފޭސްބުކުގައި އިއްޔެ ފެށި ފޭން ޕޭޖަކުންނެވެ. އެކަމަކު އެކަމާ ގުޅޭ ގޮތުން ދަގަނޑޭ އަދި މިހާތަނަށް ރަސްމީކޮށް އެއްވެސް ވާހަކައެއް ދައްކާފައެއް ނުވެއެވެ.
އެފްއޭއެމުގެ ރައީސަކަށް ދަގަނޑޭ ގެންނަން ގިނަ ބަޔަކު ތާއިދުކޮށްފައިވާއިރު، އެފްއޭއެމުގެ ނައިބު ރައީސްގެ މަޤާމުން މާޒިޔާ ސްޕޯޓްސް އެންޑް ރެކްރިއޭޝަންގެ ސީއީއޯ ހުސެއިން ޝާފިއު (ކޮއްކީ) ވަނީ އިސްތިއުފާ ދެއްވާފައެވެ. އަދި އޭނާވެސް ވަނީ ދަގަނޑޭގެ ފޭސްބުކް ޕޯސްޓް ހިއްސާކުރައްވާފައެވެ. މީގެ އިތުރުން އެފްއޭއެމުގެ އެކްސްކޯގައި ހިމެނިވަޑައިގަންނަވާ ކުލަބު ގްރީން ސްޓްރީޓްސްގެ ރައީސް މުއާވިއަތު ހަލީމް (މުއާބެ) ވެސް ވަނީ މަޤާމުން އިސްތިއުފާ ދެއްވާފައެވެ.
ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ ދަގަނޑޭ އަކީ ސުޕަ ޔުނައިޓެޑް ސްޕޯޓްސް (ސަސް) އުފައްދައި، އެ ކުލަބު ހިންގުމުގައިވެސް ހަރަކާތްތެރިވަމުން އަންނަ ފަރާތެކެވެ.