ޔޫރޯ 2024 ކޮލިފައިން ގްރޫޕް އެފްގައި ރޭ އޮސްޓްރިއާ ބަލިކޮށް، ބާކީ ދެ މެޗު އޮއްވައި އަންނަ އަހަރުގެ މުބާރާތުގެ ޖާގައެއް ބެލްޖިއަމުން ހޯދައިފިއެވެ.
ރަށުން ބޭރުގައި ރޭ ކުޅުނު މެޗުން ބެލްޖިއަމް މޮޅުވީ 3-2 ގެ ނަތީޖާއަކުންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ބެލްޖިއަމުން ވަނީ ލީޑު ނަގާފައެވެ. މެޗުގެ 12 ވަނަ މިނެޓުގައި ޓިމޮތީ ކަސްޓަންޔޭ ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ޑޯޑީ ލޫކްބަކިއޯއެވެ. އަދި ދެވަނަ ހާފު ފަށައިގެން 10 ވަނަ މިނެޓުގައި ލޫކްބަކިއޯ ވަނީ އިތުރު ލަނޑެއް ޖަހައި، ބެލްޖިއަމުގެ ލީޑު ފުޅާކޮށްދީފައެވެ.
އޭގެ ތިން މިނެޓު ފަހުން ޖެރެމީ ޑޯކޫ ތަނަވަސްކޮށްދިން ފުރުސަތަކުން ބެލްޖިއަމުގެ ތިންވަނަ ލަނޑު ޖަހައިދިނީ ތަޖުރިބާކާރު ފޯވާޑް ރޮމެލޫ ލުކާކޫއެވެ. ނަމަވެސް އޭގެ ފަހުން އޮސްޓްރިއާއިން ކުޅުން ރަނގަޅުކުރިއިރު، މެޗުގެ 72 ވަނަ މިނެޓުގައި ކޮންރަޑް ލައިމާ ވަނީ އެ ޓީމުގެ ފުރަތަމަ ލަނޑު ޖަހައިދީފައެވެ.
އަދި މި މެޗުގައި ބެލްޖިއަމަށް އިތުރު މައްސަލަތަކެއް ކުރިމަތިވީ މެޗުގެ 78 ވަނަ މިނެޓުގައި އެ ޓީމުގެ އަމަދޫ އޮނާނާއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އެއާއެކު މެޗުގެ 84 ވަނަ މިނެޓުގައި ލިބުނު ޕެނަލްޓީއަކުން އޮސްޓްރިއާއިން ވަނީ ފަރަގު ކުޑަކޮށްފައެވެ. މި ޕެނަލްޓީ އެ ޓީމަށް ކާމިޔާބުކޮށްދިނީ މާސެލް ސަބިޓްޒާއެވެ.
މި މޮޅާއެކު އަންނަ އަހަރުގެ ޔޫރޯގެ ޖާގައެއް ބެލްޖިއަމުން ހޯދިއިރު، ގްރޫޕް އެފްގެ އެއްވަނައިގައި އެ ޓީމު އޮތީ ކުޅުނު ހަ މެޗުން ލިބުނު 16 ޕޮއިންޓާއެކުއެވެ. ދެވަނައިގައި އޮތް އޮސްޓްރިއާއަށް ހަ މެޗުން ލިބިފައިވަނީ 13 ޕޮއިންޓެވެ. މި ގްރޫޕުގެ އަނެއް މެޗުގައި ރޭ އަޒަރުބައިޖާނުން ވަނީ ރަށުން ބޭރުގައި އެސްޓޯނިއާ އަތުން 2-0 ގެ ނަތީޖާއަކުން މޮޅުވެފައެވެ.