ޔޫރޯ 2024 ކޮލިފައިން ގްރޫޕް ޖޭގައި ރޭ ސްލޮވާކިއާ ބަލިކޮށް، ބަކީ ތިން މެޗު އޮއްވައި އަންނަ އަހަރުގެ މުބާރާތުގެ ޖާގައެއް ޕޯޗުގަލުން ހޯދައިފިއެވެ.
އަމިއްލަ ޤައުމުގައި ރޭ ކުޅުނު މެޗުން ޕޯޗުގަލް މޮޅުވީ 3-2 ގެ ނަތީޖާއަކުންނެވެ.
މި މެޗުގެ ފުރަތަަމަ ހާފުގައި ޕޯޗުގަލުގެ ފަރާތުން މޮޅު ކުޅުމެއް ފެނިގެންދިޔައިރު، މި ހާފުގައި އެ ޓީމުން ވަނީ ދެ ލަނޑު ޖަހާފައެވެ. އެގޮތުން މެޗުގެ 18 ވަނަ މިނެޓުގައި ބްރޫނޯ ފެނާންޑޭޒް ނަގައިދިން ހުރަހަކުން ފޯވާޑް ގޮންކާލޯ ރާމޯސް ވަނީ ލަނޑެއް ޖަހައި، އެ ޓީމަށް ލީޑު ނަގައިދީފައެވެ. އަދި މެޗުގެ 28 ވަނަ މިނެޓުގައި ލިބުނު ޕެނަލްޓީއަކުން ޕޯޗުގަލުގެ ލީޑު ފުޅާކޮށްދިނީ ކެޕްޓަން ކްރިސްޓިއާނޯ ރޮނާލްޑޯއެވެ. މިއީ އޭރިއާ ތެރެއިން ސްލޮވާކިއާގެ ކުޅުންތެރިއެއްގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ.
މި މެޗުގެ ދެވަނަ ހާފުގައި ސްލޮވާކިއާއިން ރަނގަޅު ކުޅުމެއް ދެއްކިއިރު، މެޗުގެ 69 ވަނަ މިނެޓުގައި އެ ޓީމުން ވަނީ ފަރަގު ކުޑަކޮށްފައެވެ. އޢތިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ޑޭވިޑް ހަންކޯއެވެ. އެކަމަކު އޭގެ ތިން މިނެޓު ފަހުން ރޮނާލްޑޯ ވަނީ އިތުރު ލަނޑެއް ޖަހައި، އަނެއްކާވެސް ޕޯޗުގަލުގެ ލީޑު ފުޅާކޮށްދީފައެވެ. މިއީ މި ފަހަރުގެ ޔޫރޯ ކޮލިފައިންގައި ރޮނާލްޑޯ ކާމިޔާބުކުރި ހަތްވަނަ ލަނޑެވެ.
މި މެޗުގައި ސްލޮވާކިޔާއިން ކާމިޔާބުކުރި ދެވަނަ ލަނޑު މެޗުގެ ވަނަ މިނެޓުގައި އެ ޓީމަށް ކާމިޔާބުކޮށްދިނީ މިޑްފީލްޑަރު ސްޓެނިސްލާވް ލޮބޮޓްކާ އެވެ. އޭނާ މި ލަނޑު ކާމިޔާބުކުރީ އޭރިއާ ބޭރުން ފޮނުވާލި ބާރު ހަމަލާއަކުންނެވެ.
މި މޮޅާއެކު އަންނަ އަހަރުގެ ޔޫރޯގެ ޖާގައެއް ޕޯޗުގަލުން ހޯދިއިރު، ގްރޫޕް ޖޭގެ އެއްވަނައިގައި އެ ޓީމު އޮތީ ކުޅުނު ހަތް މެޗުންވެސް މޮޅުވެ 21 ޕޮއިންޓާއެކުއެވެ. ދެވަނައިގައި އޮތް ސްލޮވާކިއާއަށް ހަތް މެޗުން ލިބިފައިވަނީ 13 ޕޮއިންޓެވެ.