އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި އޮސްޓްރޭލިއާ އަތުން ފަސޭހަކަމާއެކު ދެކުނު އެފްރިކާ މޮޅުވެއްޖެއެވެ.
ލަކްނައުގައި ހުންނަ އެކަނަ ސްޕޯޓްސް ސިޓީ ސްޓޭޑިއަމުގައި ކުޅުނު މި މެޗުން ދެކުނު އެފްރިކާ މޮޅުވީ 134 ލަނޑުންނެވެ.
މި މެޗުގެ ގުރު ދިމާވުމުން އޮސްޓްރޭލިއާއިން ނިންމީ ހޮވުމަށެވެ. އެއާއެކު ދެކުނު އެފްރިކާ އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ހަތް ކުޅުންތެރިން ނުބައިވެގެން ވަނީ 311 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 106 ބޯޅައިން 109 ލަނޑު ހެދި ކުއިންޓޮން ޑެ ކޮކްއެވެ. އަދި އެ ޓީމުގެ އައިޑެން މާކްރަމް ވަނީ 44 ބޯޅައިން 56 ލަނޑު ހަމަކޮށްފައެވެ.
ޖަވާބުގައި އޮސްޓްރޭލިއާ ކުޅެން އަރައި 40.5 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 177 ލަނޑެވެ. އެ ޓީމުން އެންމެ ރަނގަޅަށް ކުޅުނީ 74 ބޯޅައިން 46 ލަނޑު ހެދި މާނަސް ލަބަޝޭންއެވެ. މި އިނިންގްސްގައި ދެކުނު އެފްރިކާގެ ކަގީސޯ ރަބަޑާ ވަނީ ތިން ވިކެޓް ނަގާފައެވެ. އަދި އެ ޓީމުގެ މާކޯ ޖެންސެން އާއި، ކޭޝަވް މަހަރާޖް އަދި ތަބްރައިޒް ޝަމްސީ ވަނީ ކޮންމެ ކުޅުންތެރިއަކު ދެ ވިކެޓް ނަގާފައެވެ.
10 ޤައުމު ވާދަކުރާ މި މުބާރާތުގައި ދެކުނު އެފްރިކާއިން މިހާތަނަށް ކުޅުނު ދެ މެޗުވެސް ކާމިޔާބުކޮށްފައިވާއިރު، އެ ޓީމު އޮތީ ތާވަލުގެ އެއްވަނައިގައެވެ. އަދި ފުލުން ދެވަނައިގައި އޮތް އޮސްޓްރޭލިއާއިން މިހާތަނަށް ކުޅުނު ދެ މެޗުންވެސް ވަނީ ބަލިވެފައެވެ.