2026 ވަނަ އަހަރު ބާއްވާ ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ރޭ ކުޅުނު މެޗުން އާޖެންޓީނާ މޮޅުވިއިރު، ބްރެޒިލާއި ވެނެޒުއޭލާ ބައްދަލުކުރި މެޗު އެއްވަރުވެއްޖެއެވެ.
އަމިއްލަ ޤައުމުގައި ކުޅުނު މެޗުން އާޖެންޓީނާ މޮޅުވީ ޕެރަގުއާއީ އަތުން 1-0 ގެ ނަތީޖާއަކުންނެވެ.
މި މެޗުގައި އާޖެންޓީނާއިން ކާމިޔާބުކުރި ހަމައެކަނި ލަނޑު ފެނިގެންގޮސްފައިވަނީ މެޗު ފަށައިގެން ތިންވަނަ މިނެޓުގައެވެ. ރެޑްރިގޯ ޑި ޕޯލްގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ނިކޮލަސް އޮޓަމެންޑީއެވެ.
މި މެޗުގެ ދެވަނަ ހާފުގައި އާޖެންޓީނާއިން ވަނީ އެ ޓީމުގެ ކެޕްޓަން ލިއޮނަލް މެސީ ކުޅެން އަރުވާފައެވެ. އަނިޔާގެ ސަބަބުން މިދިޔަ މަހެއްހާ ދުވަހު ގިނަ ދުވަސްތަކެއްވަންދެން މެސީ ކުޅުމާ ދުރުގައި ހުރިއިރު، މެސީއަށް ލިބިފައިވާ އަނިޔާގެ ސަބަބުން އެންމެ ބޮޑު ގެއްލުމެއް ލިބުނީ އޭނާ ކުޅެމުން އަންނަ ކުލަބު އިންޓަރ މަޔާމީށެވެ. އެގޮތުން އެންމެ ފަހުން ކުޅުނު ތިން މެޗުން ބަލިވެ އެ ޓީމަށް މި އަހަރުގެ އެމްއެލްއެސް ޕްލޭއޮފުން ވަނީ ފުރުސަތު ގެއްލިފައެވެ.
މީގެ އިތުރުން ވޯލްޑް ކަޕުގެ ދެކުނު އެމެރިކާ ކޮލިފައިންގައި ރޭ ބްރެޒިލާއި ވެނެޒުއޭލާ ބައްދަލުކުރި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން ފަސްވަނަ މިނެޓުގައި ބްރެޒިލުން ވަނީ ލީޑު ނަގާފައެވެ. ނޭމާ ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ގެބްރިއެލްއެވެ. އެކަމަކު މެޗު ނިމެން ފަސް މިނެޓަށް ވެފައި ވަނިކޮށް ވެނެޒުއޭލާއިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ޖަހައިދިނީ އެޑުއާޑް ބެލޯއެވެ.
މި ނަތީޖާތަކާއެކު 10 ޤައުމު ވާދަކުރާ ކޮލިފައިންގެ އެއްވަނައިގައި އާޖެންޓީނާ އޮތީ ކުޅުނު ތިން މެޗުންވެސް މޮޅުވެ ނުވަ ޕޮއިންޓާއެކުއެވެ. އަދި ދެވަނައިގައި އޮތް ބްރެޒިލަށް ތިން މެޗުން ލިބިފައިވަނީ ހަތް ޕޮއިންޓެވެ.