ފީފާ ވޯލްޑް ކަޕް އަދި އޭއެފްސީ އޭޝިއަން ކަޕުގެ ޖޮއިންޓް ކޮލިފައިންގައި ރާއްޖެއާ ދެކޮޅަށް ނުކުންނައިރު، ބޭނުންވާ ހިސާބަށް ކުރިއަށް ދިޔުމަށް މި މެޗަކީ މުހިންމު މެޗެއް ކަމަށް ބަންގްލަދޭޝްގެ ކޯޗު ސްޕެއިނުގެ ހާވިއޭ ކަބްރޭރާ ބުނެފިއެވެ.
މި މެޗަށް ނުކުންނައިރު ރާއްޖެ ވަނީ ބަންގްލަދޭޝްއާ ދެކޮޅަށް އެންމެ ފަހުން ކުޅުނު ދެ މުބާރާތުގައިވެސް ބަލިވެފައެވެ. އެއީ 2021 ގައި ސްރީ ލަންކާގައި އޮތް ފޯ ނޭޝަންސް ކަޕާއި، މި އަހަރުގެ ޖޫން މަހު އިންޑިއާގައި އޮތް ސާފް ޗެމްޕިއަންޝިޕް ފުޓްބޯޅަ މުބާރާތެވެ.
މިއަދު ކުޅުމަށް ހަމަޖެހިފައިވާ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ކަބްރޭރާ ބުނީ އެންމެ ފަހުގެ ސާފް ޗެމްޕިއަންޝިޕާއެކު ބަންގްލަދޭޝް ޓީމަށް ލިބިފައިވާ ކުރިއެރުން ފެނުނު ކަމަށާއި، އެހެންކަމުން ބޭނުންވާ ހިސާބަށް ދިޔުމަށް މި މެޗަކީވެސް މުހިންމު މެޗެއް ކަމަށެވެ.
ބަންގްލަދޭޝްއިން މިހާތަނަށް ރާއްޖޭގައި ކުޅުނު އެއްވެސް މެޗަކުން މޮޅުވެފައި ނުވި ނަމަވެސް، މިއީ ދެ ޓީމަށްވެސް ވަރުގަދަ ޗެލެންޖެއް ކުރިމަތިވާނެ މެޗެއް ކަމަށް ކަބްރޭރާ ވަނީ ބުނެފައެވެ. އަދި ދެ ލެގުން މޮޅުވާ ޓީމަކަށް ވޯލްޑް ކަޕް ކޮލިފައިންގެ ދެވަނަ ބުރުން ފުރުސަތު ލިބޭއިރު، މިއީ ބަންގްލަދޭޝްގެ ކުރިއެރުމަށް އަނެއްކާވެސް ލިބޭ ރަނގަޅު ފުރުސަތެއް ކަމަށްވެސް ކަބްރޭރާ ވަނީ ބުނެފައެވެ.
މި މެޗަށް ބަންގްލަދޭޝް ނުކުންނައިރު، އެ ޓީމުގެ މުހިންމު ތިން ކުޅުންތެރިއެއް ކަމަށްވާ ގޯލްކީޕަރު އަނީސުރް ރަހުމާނާއި، ޑިފެންޑަރު ޓޯޕޫ ބަރްމަން އަދި ޝެއިޚް މޮރްސަލީން ވަނީ ސަސްޕެންޑް ކޮށްފައެވެ. އެ ކުޅުންތެރިން ސަސްޕެންޑް ކުރީ ގަވާއިދާ ޚިލާފަށް އެ ޤައުމަށް ބަނގުރާ އެތެރެކުރަން އުޅުނު މައްސަލައެއްގައެވެ.
ކަބްރޭރާ ބުނީ އެ ތިން ކުޅުންތެރިން ނެތުމަކީ ކުރިމަތިލާން ޖެހޭ އުނދަގޫ ހާލަތެއް ކަމަށާއި، އެކަމަކު ޓީމުގައި ތިބި އައު ކުޅުންތެރިންނަށް އިތުބާރު އެބައޮތް ކަމަށެވެ
ވޯލްޑް ކަޕް ކޮލިފައިންގެ ފުރަތަމަ ބުރުގެ ފުރަތަމަ ލެގުގައި ރާއްޖެ އާއި ބަންގްލަދޭޝް ބައްދަލުކުރާ މެޗު ފެށުމަށް ހަމަޖެހިފައިވަނީ މިއަދު ހަވީރު 16:00 ގައެވެ.