ލުބުނާނުގެ ހަރަކާތްތެރިވާ މުޖާހިދުންގެ ޖަމާޢަތެއް ކަމުގައިވާ ޙިޒްބުﷲއިން ޔަހޫދީ އިސްރާޢީލުގެ ރަށްތަކަށް އަމާޒުކޮށް މިސައިލް ހަމަލަތަކެއް ދީފިއެވެ. ޙިޒްބުﷲއިން ޔަހޫދީންގެ ރަށްތަކަށް މިސައިލް ޙަމަލަތަކެއް ދީފައި މި ވަނީ، ޔަހޫދީ އިސްރާޢީލުގެ އަސްކަރިއްޔާއިން ލުބުނާނުގެ ދެކުނުގައިވާ ސަރަޙައްދުތަކަށް ދިން ހަމަލަތަކެއްގައި އެ ޖަމާޢަތުގެ ތިން މީހުން ޝަހީދު ކޮށްލުމާ ގުޅިގެން، އެ ކަމުގެ ބަދަލު ހިފުމުގެ ގޮތުންނެވެ.
ޙިޒްބުﷲއިން ވަނީ، ފަލަސްޠީނުގެ މިނިވަން ކަމަށް ޖިހާދުކުރާ ޙަމާސް ޖަމާޢަތުން އިސްރާޢީލާ ދެކޮޅަށް ފަށާފައިވާ 'އޮޕަރޭޝަން އަޤްޞާ ފްލަޑް'ގައި ބައިވެރިވުމުގެ ގޮތުން ޝަބްޢާގެ ދަނޑުބިންތަކުގައި ގާއިމު ކޮށްފައިވާ އިސްރާޢީލުގެ އަސްކަރީ މަރުކަޒުތަކަށް ހަމަލަތަކެއް ދީފައެވެ. ގޯލާންގެ އުސްބިންތަކާއި، ޝަބްޢާގެ ދަނޑުބިންތަކަކީ، ޔަހޫދީ އިސްރާޢީލުން އަތްގަދަ ކޮށްފައިވާ ބިންތަކެކެވެ.
ޙިޒްބުﷲއިން ބުނީ، ދަހީރާ އަވަށާ ދިމާލުގައި އޮންނަ އިސްރާޢީލުގެ އަސްކަރީ އަމާޒުތަކަށް 'ގައިޑެޑް މިސައިލް' ބޭނުންކޮށްގެން ހަމަލަ ދީފައިވާނެ ކަމުގައެވެ. އެއީ، އެ ޖަމާޢަތުގެ މެންބަރުންތަކެއް ޝަހީދު ކޮށްލުމުން، އެ ކަމުގެ ބަދަލު ހިފުމުގެ ގޮތުން ދީފައިވާ ހަމަލަތަކެއް ކަމުގައިވެސް ޙިޒްބުﷲއިން ބުންޏެވެ. އަދި، ލުބުނާނުގެ އަމާޒުތަކަށް އިސްރާޢީލުން ކުރިއަށް އޮތް ތަނުގައި ވެސް ހަމަލަ ދީފި ނަމަ، އެ ކަމުގެ ރައްދުގައި ހަމަލަދޭނެ ކަމުގައި އެ ޖަމާޢަތުން ބުންޏެވެ.
ޙިޒްބުﷲގެ ހަމަލަތަކަށް ރައްދު ދިނުމުގެ ގޮތުން ލުބުނާނުގެ ސަރަޙައްދުތަކަށް ހަމަލަދޭން ފަށާފައިވާނެ ކަމުގައި ޔަހޫދީ އިސްރާޢީލުގެ އަސްކަރިއްޔާއިން ބުނެއެވެ. ޔަހޫދީ ޖައްބާރު އަސްކަރިއްޔާގެ ހަމަލަތަކުގައި ޢާންމުންގެ ދެ މީހުން ޒަޚަމުވި ކަމުގައި ލުބުނާނުގެ ނޭޝަނަލް ނިއުސް އޭޖެންސީން ބުނެއެވެ.
އިސްރާޢީލުގެ ހަމަލަތައް އަމާޒުކޮށްފައި ވަނީ ދަހީރާ އަވަށަށެވެ. މީގެ އިތުރުން، ލުބުނާނުގެ ދެކުނުގައި އޮންނަ ޤަލީލާއަށް ވެސް އިސްރާޢީލުން ހަމަލަތަކެއް ދީފައިވާ ކަމުގައި މަސްރަޙު ދިރާސާކުރާ ފަރާތްތަކުން ހާމަކުރެއެވެ. ޔަހޫދީ އިސްރާޢީލުން ހިޒްބުﷲގެ މެންބަރުންތަކެއް ޝަހީދު ކޮށްލާފައި ވަނީ، ސަރަޙައްދީ އިން ހުރަސްކޮށް އިސްރާޢީލުގެ ރަށްތަކަށް އަރަން މަސައްކަތް ކުރުމުން ކަމުގައި އިސްރާޢީލުން ބުނެއެވެ.
މިއީ، ޙިޒްބުﷲއިން އިސްރާޢީލާ އެކު ހަމަލަ ބަދަލު ކޮށްފައިވާ ފުރަތަމަ ފަހަރެއް ނޫނެވެ. 2006 ވަނަ އަހަރު އެ ޖަމާޢަތުން ވަނީ ޔަހޫދީ އިސްރާޢީލުގެ ޖައްބާރު ސިފައިންނާ 34 ދުވަހު ދިގު ހަނގުރާމައެއް ކޮށްފައެވެ. އެ ހަނގުރާމައިގައި ލުބުނާނުގެ 1,200 އެއްހާ މީހުން މަރުވިއެވެ. އޭގެ ތެރޭގައި ގިނައީ ކުށެއް ނެތް ޢާންމުންނެވެ. ޙިޒްބުﷲއިން ވެސް ވަނީ ޔަހޫދީންގެ ޖައްބާރު ސިފައިންގެ 160 މީހުން މަރައިލާފައެވެ.