ޔަހޫދީން އަޅުވެތިކޮށްފައިވާ ފަލަސްޠީނުގެ ޣައްޒާގައި ހަރަކާތްތެރިވާ މުޖާހިދުންގެ ޖަމާޢަތްތަކުން އިސްރާޢީލުގެ ރަށްތަކަށް އަމާޒުކޮށް ވަރުގަދަ ރޮކެޓް ހަމަލަތަކެއް ދީފިއެވެ. ރޮކެޓް ހަމަލަތައް އަމާޒުކޮށްފައި ވަނީ ޔަހޫދީ އިސްރާޢީލުގެ ދެކުނުގައިވާ ރަށްތަކަށެވެ.
ހަމަލަތައް ދޭން ފެށުމާ އެކު، އިސްރާޢީލުގެ އަސްކަރިއްޔާއިން ރައްކާތެރި ކަމުގެ ފިޔަވަޅުތައް އެޅުމަށް އެ ޤައުމުގެ ރައްޔިތުންނަށް އަންގާފައިވެއެވެ. ރޮކެޓް ހަމަލަތައް އެއް ގަޑިއިރަށް ދެމިގެންދިޔަ އިރު، އިސްރާޢީލުގެ ގިނަ ޔަހޫދީން ވަނީ، 'ބޮން ޝެލްޓަރ'ތަކުގައި ރައްކާތެރިކަން ހޯދާފައެވެ.
ކުއްލި ހާލަތްތަކުގައި ހަރަކާތްތެރިވާ އިސްރާޢީލުގެ އިދާރާއިން ބުނީ ރޮކެޓް ހަމަލަތަކުގައި 70 އަހަރުގެ އަންހެނަކު ޒަޚަމުވެފައިވާ ކަމުގައެވެ. އެ އަންހެން މީހާގެ ހާލު ސީރިޔަސް ކަމުގައި ވެސް އެ އިދާރާއިން ބުންޏެވެ. އަދި، ރޮކެޓް ހަމަލައެއްގައި ގެއްލުން ލިބުނު ޢިމާރާތެއްގެ ތެރޭގައި އިތުރު މީހަކު ތާށިވިއެވެ.
އެހެން ހާދިސާއެއްގައި ޔަހޫދީންގެ 20 އަހަރުގެ ޒުވާނަކު ވެސް ވަނީ ޒަޚަމުވެފައެވެ. ޣައްޒާގައި ހަރަކާތްތެރިވާ މުޖާހިދުންގެ ޖަމާޢަތްތަކުން ޔަހޫދީ އިސްރާޢީލަށް އަމާޒުކޮށް ވަރުގަދަ ރޮކެޓް ހަމަލަތަކެއް ދިނުމާ ގުޅިގެން އެ ކަމުގެ ބަދަލު ހިފުމަށް ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ދަނީ ތައްޔާރުވަމުންނެވެ. ޣައްޒާގެ ރައްޔިތުންނަށް ހަމަލަދޭން ރޭވުމަށް ޔަހޫދީ އިސްރާޢީލުގެ ސަލާމަތީ މަޖިލީހުގެ ކުއްލި ބައްދަލުވުމެއް ބާއްވާނެ ކަމަށް އޭނާ ބުންޏެވެ.
ޣައްޒާގައި ވެރިކަން ކުރަނީ މުޖާހިދުންގެ ޖަމާޢަތެއް ކަމުގައިވާ ހަމާސްއިންނެވެ. އެ ޖަމާޢަތުން ބުނީ، ޔަހޫދީ އިސްރާޢީލަށް ރޮކެޓް ހަމަލަތަކެއް ދީފައި ވަނީ އެ ޖަމާޢަތުން ފަށާފައިވާ "އޮޕަރޭޝަން އަޤްޞާ ފްލަޑް"ގެ ދަށުން ކަމުގައެވެ. އަދި، ޔަހޫދީ އިސްރާޢީލުގެ އަމާޒުތަކަށް 5،000 އަށްވުރެ ގިނަ ރޮކެޓް ހަމަލަ ދީފައިވާނެ ކަމުގައި ވެސް އެ ޖަމާޢަތުން ބުނެއެވެ. ނަމަވެސް، އިސްރާޢީލުގެ 'އަޔަން ޑޯމް' ވައިގެ ދިފާޢީ ނިޒާމު ބޭނުންކޮށްގެން ގިނަ ރޮކެޓްތައް ދިފާޢުކޮށްފައިވާ ކަން ފާހަގަކޮށްލަން ޖެހެއެވެ.
ހަމާސް ޖަމާޢަތުގެ އިސް އޮފިޝަލެއް ކަމުގައިވާ ޞާލިޙް ޢާރޫރީ ވަނީ، އިސްރާޢީލުގެ ސިފައިންނާ ދެކޮޅަށް ހަތިޔާރު އުފުލުމަށް އެ ޖަމާޢަތުގެ މެންބަރުންނަށް ގޮވައިލައްވާފައެވެ. "މިއީ، ޔަހޫދީ އިސްރާޢީލުގެ އަޅުވެތިކަމާ ދެކޮޅަށް ހިންގާ އޮޕަރޭޝަނެއް. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންނާ ދެކޮޅަށް ފަށާފައިވާ އޮޕަރޭޝަނެއް. ހުޅަނގު އައްސޭރީގައި ހަރަކާތްތެރިވާ މުޖާހިދުންގެ ޖަމާޢަތްތަކުގެ ހުރިހާ މެންބަރުންނަށް މި އޮޕަރޭޝަންގައި ބައިވެރިވުމަށް ގޮވައިލަން،" ޢާރޫރީ ވިދާޅުވިއެވެ.
ޣައްޒާއަކީ ފަލަސްޠީނުގެ 2.3 މިލިޔަނެއްހާ މުސްލިމުން ދިރިއުޅޭ ސަހަރެކެވެ. އެއީ ދުނިޔޭގައި އޮތް އެންމެ ބޮޑު ޖަލުގެ ގޮތުގައި ސިފަ ކުރެވޭ ތަނެކެވެ. އެ ތަން ވަށައިގެން ޔަހޫދީ ޓެރެރިސްޓުން ވަނީ ފެންސް ޖަހައި ބަންދުކޮށްފައެވެ. ޣައްޒާގެ ރައްޔިތުންނަށް އެ ތަނަށް ވަދެނިކުމެ ހެދެނީ ޔަހޫދީ ސިފައިންގެ ޗެކްޕޮއިންޓުތައް ހުރަސް ކޮށްފައެވެ.
މި އަހަރުގެ މޭ މަހުގެ ތެރޭގައި ޔަހޫދީ އިސްރާޢީލުން ވަނީ ޣައްޒާއަށް ނުރައްކާތެރި ހަމަލަތަކެއް ދީފައެވެ. އެ އުދުވާންތަކުގައި ފަލަސްޠީނުގެ 34 މީހުން ޝަހީދުކޮށްލިއެވެ. އަދި، ގިނަ ޢަދަދެއްގެ ބަޔަކު ޒަޚަމުކޮށްލާ، ފަލަސްޠީނުގެ ޢާންމު ރައްޔިތުންގެ ގެދޮރު ސުންނާފަތިކޮށްލިއެވެ.
ޣައްޒާގެ ރައްޔިތުން މި ގޮތަށް އަޅުވެތި ކޮށްގެން ގެންގުޅުމަކީ ލާއިންސާނީ ޖަރީމާއެއްގެ ގޮތުގައި މުޅި ދުނިޔެ ސިފަ ކުރި ނަމަވެސް، ޔަހޫދީންގެ މި ޖައްބާރު އަމަލު ހުއްޓުވަން އެންމެ އިނގިއްޔެއްހާ މިންވަރު ވެސް ހިއްލައިލާނެ އިދާރާއެއް، ނުވަތަ ޤައުމެއް ނެތް ކަން ފާހަގަ ކޮށްލަން ޖެހެއެވެ.