ސޫރިޔާގެ އިރުއުތުރުގައި ކުރުދީން ދިރިއުޅޭ ސަރަޙައްދުތަކަށް ތުރުކީވިލާތުގެ އަސްކަރިއްޔާއިން ވަރުގަދަ ޑްރޯން ހަމަލަތަކެއްދީ އަށް މީހުން މަރައިލައިފިއެވެ. ތުރުކީވިލާތުގެ އަސްކަރިއްޔާއިން ބުނީ ޑްރޯން ހަމަލަތަކަށް އަމާޒުކޮށްފައި ވަނީ ކުރްދިސްތާން ވޯކަރސް ޕާޓީ (ޕީ.ކޭ.ކޭ)ގެ ހަނގުރާމަވެރިންގެ އަމާޒުތަކަށް ކަމުގައެވެ.
ސޫރިޔާގެ ސަލާމަތީ ބާރުތަކުން ބުނީ، ތުރުކީވިލާތުން އެއް ހަމަލަ އަމާޒުކޮށްފައި ވަނީ އަސްކަރީ މަރުކަޒެއް ކައިރިން ދަތުރު ކުރަމުން ދިޔަ ކާރަކަށް ކަމުގައެވެ. އެ ހަމަލާގައި ދެ މީހުން މަރުވިއެވެ. އަދި، ދެވަނަ ހަމަލަ އަމާޒުކޮށްފައި ވަނީ ޢާމޫދާ ކިޔާ ރަށެއްގައި އޮންނަ އަސްކަރީ މަރުކަޒަކަށެވެ. އެ ހަމަލާގައި ހަ މީހުން މަރުވި ކަމުގައި ސޫރިޔާގެ ސަލާމަތީ ބާރުތަކުން ބުނެއެވެ. މަރުވެފައި ވަނީ ހަނގުރާމަވެރިން ކަން ނުވަތަ ޢާންމުންނަށް ކަށަވަރު ކޮށްދީފައެއް ނުވެއެވެ.
އިރާޤުގެ އުތުރުގެ ސަރަޙައްދުތަކުގައި ހަރަކާތްތެރިވާ ޕީ.ކޭ.ކޭ ހަނގުރާމަވެރިންގެ އަމާޒުތަކަށް ވެސް ތުރުކީވިލާތުން ދާދި ފަހުން ވަރުގަދަ ވައިގެ ހަމަލަތަކެއް ދީފައިވެއެވެ. އިރާޤާއި ސޫރިޔާގައި ޕީ.ކޭ.ކޭން ހަރަކާތްތެރިވާ އަމާޒުތަކަށް ހަމަލަތަކެއް ދީފައި މި ވަނީ، ތުރުކީވިލާތުގެ ވެރިރަށް އަންކަރާގައި ދާދިފަހުން ބޮމެއް ގޮއްވައިލައިގެން ދިން ޓެރެރިސްޓު ހަމަލައަކާ ގުޅިގެން، އެ ކަމުގެ ބަދަލު ހިފުމުގެ ގޮތުންނެވެ.
އަންކަރާގައި ދީފައިވާ ބޮމުގެ ހަމަލާގެ ޒިންމާ ޕީ.ކޭ.ކޭން ވަނީ އުފުލާފައެވެ. ބޮން ގޮއްވައިލާފައި ވަނީ ތުރުކީވިލާތުގެ ދާޚިލީ ވުޒާރާ ހުންނަ ޢިމާރާތާއި، އެ ޤައުމުގެ ޤާނޫނު ހަދާ މަޖިލީހުގެ ޢިމާރާތް ކައިރީގައެވެ. މި ހަމަލާގައި ފުލުހުންގެ ދެ މީހުން ޒަޚަމުވިއެވެ. ހަމަލަދިނުމުގައި ދެ މީހަކު ބައިވެރިވެފައިވާއިރު، އޭގެ ތެރެއިން އެކަކު މަރުވީ އަމިއްލައަށް ފުރާނަ ނަގައިލައިގެންނެވެ. ދެވަނަ މީހާ މަރުވީ ފުލުހުންގެ ހަމަލަތަކުގައެވެ.
ތުރުކީވިލާތުން ބުނީ، އަންކަރާގައި ގޮއްވައިލާފައިވާ ބޮން އުފައްދާފައި ވަނީ ސޫރިޔާގައި ކަމަށް ތަހުޤީޤަށް ހާމަވެފައިވާ ކަމުގައެވެ. ނަމަވެސް، ސޫރިޔާގައި ހަރަކާތްތެރިވާ ހަތިޔާރުއެޅި ޖަމާޢަތެއް ކަމުގައިވާ ސީރިޔަން ޑިމޮކްރެޓިކް ފޯސަސް (އެސް.ޑީ.އެފު)ން ވަނީ އެ ތުހުމަތުތައް ދޮގުކޮށްފައެވެ. ގިނަ ޢަދަދެއްގެ ކުރުދީ ހަނގުރާމަވެރިންގެ ބައިވެރިވުމާ އެކު ހަރަކާތްތެރިވާ އެސް.ޑީ.އެފަކީ އެމެރިކާއިން މާލީ ގޮތުންނާއި އަސްކަރީ ގޮތުން އެހީތެރިކަން ފޯރުކޮށްދޭ ޖަމާޢަތެކެވެ.
އެސް.ޑީ.އެފްގެ އޮފިޝަލެއް ކަމުގައިވާ މަޟްލޫމް ޢަބްދީ ބުނީ އެ ޖަމާޢަތުގެ އަމާޒުތަކަށް ތުރުކީވިލާތުން ހަމަލަދީފައި ވަނީ އެއްވެސް ހައްޤަކާ ނުލާ ކަމުގައެވެ. އެއް ހަމަލަ ދީފައި ވަނީ ރެފިއުޖީންނަށް އިންސާނީ އެހީތެރިކަން ފޯރުކޮށްދޭ ކޭމްޕެއް އޮންނަ ސަރަޙައްދަކަށް ކަމަށާއި، އެ ހަމަލައާ ގުޅިގެން އެ ތަނުގެ މަސައްކަތްތަކަށް ހުރަސް އެޅިފައިވާ ކަމުގައި އެހީދޭ ޖަމުޢިއްޔާތަކުން ބުނެއެވެ.
އަންކަރާގައި ބޮމުގެ ހަމަލައެއް ދީފައި މި ވަނީ ޗުއްޓީއަށް ފަހު ތުރުކީވިލާތުގެ ޤާނޫނު ހަދާ މަޖިލީހުގެ ޖަލްސާތައް އަލުން ފެށުމަށް ތައްޔާރުވަމުން ދިޔަ ދަނޑިވަޅެއްގައެވެ. ނަމަވެސް، ކުރިން އިންތިޒާމުކޮށްފައިވާ ގޮތަށް ޤާނޫނު ހަދާ މަޖިލީހުގެ ޖަލްސާއެއް ބާއްވާފައިވެއެވެ. އަދި، އެ ޖަލްސާގައި ތުރުކީވިލާތުގެ ރައީސް ރަޖަބް ޠައްޔިބް އުރުދުޣާން ތަޤުރީރު ކުރައްވާފައިވެއެވެ.
ޕީ.ކޭ.ކޭއަކީ 1984 ވަނަ އަހަރު ހަރަކާތްތެރިވާން ފަށާފައިވާ ޖަމާޢަތެކެވެ. އެއީ، "ޓެރެރިސްޓު" ޖަމާޢަތެއްގެ ގޮތުގައި ތުރުކީވިލާތުގެ އިތުރުން ވިލާތުގެ އިއްތިހާދު (އީ.ޔޫ) އަދި އެމެރިކާއިން ވެސް ވަނީ ކަނޑައަޅާފައެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު ނަގާފައި ވަނީ އެ ޤައުމުގެ އިރުދެކުނުގައިވާ ކުރުދިސްތާންގެ ނަން ދީފައިވާ ސަރަޙައްދުގައި އަމިއްލަ ދަޢުލަތެއް އުފެއްދުމުގެ މަޤުޞަދުގައެވެ.