ޔަހޫދީ އިސްރާޢީލުގެ ސިފައިން ހުޅަނގު އައްސޭރިއަށް އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ ދެ މީހުން ޝަހީދު ކޮށްލައިފިއެވެ. ޔަހޫދީ ޖައްބާރު ސިފައިންގެ ލާއިންސާނީ ޖަރީމާތައް ހިންގާފައި ވަނީ ހުޅަނގު އައްސޭރީގެ ޠުލްކަރްމުގެ އަވަށެއް ކަމުގައިވާ ޝޫފާގައެވެ.
ފަލަސްޠީނުގެ ވަފާ މީޑިޔާއިން ބުނީ، ޔަހޫދީ ޓެރެރިސްޓު ސިފައިންގެ ބަޑީގެ ހަމަލަތަކުގެ ޝިކާރައަކަށްވެ ޝަހީދުވެފައި ވަނީ ޒުވާން އުމުރުފުރައިގެ ދެ ކުދިން ކަމުގައެވެ. އެއީ، ޢަބްދުއްރަޙްމާން އާޠާއާއި ހުޛައިފާ ފާރިސް ކަމުގައި ވެސް މީޑިޔާތަކުން ރިޕޯޓު ކުރެއެވެ.
ޠުލްކަރްމަށް ޔަހޫދީންގެ ޖައްބާރު ސިފައިން އަރާފައި ވަނީ، ޝޫފާގައި ވަޒަންވެރިވެފައިވާ ޔަހޫދީންގެ ބަޔަކު ދިރިއުޅޭ ގެއަކަށް ފަލަސްޠީނުގެ ދެ މީހަކު ހަމަލަދިން ކަމަށް ބުނެއެވެ. ހަތިޔާރާ އެކު އަރައި ޔަހޫދީ ސިފައިން ވަނީ ފަލަސްޠީނުގެ ދެ މީހުން މަޑުކޮށްލައިގެން ތިބި ކާރަށް ބަޑީގެ ހަމަލަތަކެއް ދީފައެވެ. އަދި، އެ ދެ މީހުން ޝަހީދު ކޮށްލާފައެވެ. މިއީ، ޔަހޫދީ ޓެރެރިސްޓު ސިފައިން މި އަހަރުގެ ތެރޭގައި ޠުލްކަރްމަށް އަރައި މި ފަދަ ލާއިންސާނީ ޖަރީމާތަކެއް ހިންގި ފުރަތަމަ ފަހަރެއް ނޫނެވެ.
މަންޒަރު ފެނުނު މީހުން ބުނީ، ފަލަސްޠީނުގެ ދެ މީހުން ތިބި އުޅަނދަށް ބަޑިޖެހުމަށް ފަހު، އެ މީހުންނަށް ޞިއްޙީ ފަރުވާ ފޯރުކޮށްދޭން މަސައްކަތް ކުރި ޞިއްޙީ ޚިދުމަތްތެރިންނަށް ޔަހޫދީ ޖައްބާރު ސިފައިން ހުރަސް އަޅާފައިވާ ކަމުގައެވެ. އަދި، އެ ދެ މީހުންގެ ހަށިގަނޑު، އެ މީހުންގެ ޢާއިލާތަކާ ހަވާލު ކުރަން ދެކޮޅު ހަދައި، އެ ދެ މީހުންގެ ހަށިގަނޑު ގެންގޮސްފައިވާ ކަމުގައި ވެސް މަންޒަރު ފެނުނު މީހުން ބުނެއެވެ.
ހުޅަނގު އައްސޭރިއަކީ ބައިނަލްއަޤުވާމީ ޤާނޫނުތަކާ ޚިލާފަށް ޔަހޫދީން އަތްގަދަ ކޮށްފައިވާ ފަލަސްޠީނުގެ ބިމެކެވެ. ހުޅަނގު އައްސޭރީގައި ފަލަސްޠީނުގެ މުސްލިމުން ދިރިއުޅެނީ ޔަހޫދީ ދަޢުލަތުގެ އަޅުވެތިކަމުގެ ދަށުގައެވެ. ފަލަސްޠީނާއި އިސްރާޢީލާ ދެމެދު މީގެ އަހަރުތަކެއް ކުރިން ފަށާފައިވާ ސުލްޙައިގެ މަޝްވަރާތައް މީގެ 10 ވަރަކަށް އަހަރު ކުރިން މެދުކެނޑުނު ފަހުން، ޔަހޫދީ ޖައްބާރު ސިފައިން ކޮންމެ ދުވަހަކުހެން ދަނީ ފަލަސްޠީނުގެ ބިންތަކަށް އަރައި ލާއިންސާނީ ޖަރީމާތައް ހިންގަމުންނެވެ. އަދި، ފަލަސްޠީނުގެ ކުށެއް ނެތް މުސްލިމުންގެ ލޭއޮހޮރުވައިލަމުންނެވެ.
ފާއިތުވި 18 ވަރަކަށް މަހުގެ ތެރޭގައި ޔަހޫދީ ސިފައިން ހުޅަނގު އައްސޭރީގައި ހިންގަމުންދާ އުދުވާންތަކުގެ ނުރައްކާތެރިކަން އިތުރު ކޮށްފައިވާ ކަން ފާހަގަ ކުރެވެއެވެ. ޔަހޫދީ ޓެރެރިސްޓު ސިފައިން ފަހަކަށް އައިސް ހުޅަނގު އައްސޭރިއަށް އަރަނީ ބަރުހަތިޔާރާ އެކުގައެވެ. އޭގެ ތެރޭގައި އަސްކަރީ ހެލިކޮޕްޓަރާއި ޓޭންކުފަހަރު ވެސް ހިމެނެއެވެ. މި ގޮތަށް އަރާ ކޮންމެ ފަހަރަކު، ފަލަސްޠީނުގެ އެތަކެއް ބަޔެއްގެ ފުރާނަ ނަގައިލާ، އެ މީހުންގެ ގެދޮރު ސުންނާފަތިކޮށްލައެވެ.
ޖުލައި މަހު ޖިނީންގައި އޮންނަ ރެފިއުޖީ ކޭމްޕަށް އަރައި ޔަހޫދީ ޖައްބާރު ސިފައިން ހިންގި ލާއިންސާނީ ޖަރީމާތަކެއްގައި ފަލަސްޠީނުގެ 12 މީހުން ޝަހީދު ކޮށްލިއެވެ. އަދި، 100 އަށްވުރެ ގިނަ މީހުން ޒަޚަމުކޮށްލިއެވެ. ޔަހޫދީ ޓެރެރިސްޓު ސިފައިން ފަލަސްޠީނުގެ ބިންތަކަށް އަރައި މި އަހަރުގެ ތެރޭގައި ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ މީހުންގެ ޢަދަދު މިހާރު ވަނީ 200 އަށްވުރެ މައްޗަށް އަރާފައެވެ.
ޔަހުދީ އިސްރާޢީލުގެ އިސްތިޢުމާރީ ސިފައިން ފަލަސްޠީނުގެ ބިންތަކަށް އަރައި ހުޅަނގު އައްސޭރި އަޅުވެތިކޮށްފައި ވަނީ 1967 ވަނަ އަހަރުއެވެ. އޭގެ ފަހުން ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީންގެ އަޅުވެތިކަމުގެ ދަށުގައެވެ. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންގެ ޢަދަދު މިހާރު 490,000 އަށް އަރައެވެ.