ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ ބެޑްމިންޓަން އަންހެން ސިންގަލްސްގެ ގަދަ 16 ގެ ޖާގައެއް ރާއްޖޭގެ ފާތިމަތު ނަބާހާ (ނަބާ) ހޯދައިފިއެވެ.
މިއަދު ކުރިއަށްދިޔަ އަންހެން ސިންގަލްސްގެ ދެވަނަ ބުރުގެ މެޗުގައި ނަބާ ވާދަކޮށްފައިވަނީ އީރާނުގެ ޔެގާނޭ ކެރްމާނީއާއެވެ. ފޯރިގަދަ ކުޅުމެއް ފެނިގެންދިޔަ މި މެޗު ނަބާ ކާމިޔާބުކުރީ 2-1 ސެޓުންނެވެ.
މި މެޗުގެ ފުރަތަމަ ސެޓުގައި ދެ ކުޅުންތެރިންގެ ފަރާތުން ވާދަވެރި ކުޅުމެއް ފެނިގެންދިޔައިރު، ކެރްމާނީ ވަނީ މި ސެޓު 22-20 ކާމިޔާބުކޮށްފައެވެ. އެކަމަކު އަނެއް ދެ ސެޓުގައި ނަބާ މޮޅު ކުޅުމެއް ދެއްކިއިރު، އެ ދެ ސެޓު އޭނާ ގެންގޮސްފައިވަނީ 21-13 އަދި 21-17 އިންނެވެ.
މި މޮޅާއެކު ގަދަ 16 ބުރަށް ނަބާ ދަތުކުރި ނަމަވެސް، ބެޑްމިންޓަނުގެ ސިންގްލްސް ދެވަނަ ބުރުގައި ކުޅުނު މެޗުތަކުން ރާއްޖޭގެ އެހެން ކުޅުންތެރިން ވަނީ ބަލިވެފައެވެ. އެގޮތުން އާމިނަތު ނަބީހާ (ނަބީ) ބަލިވީ ކޮރެއާގެ ކިމް ގޯޔުން އަތުން ސީދާ ދެ ސެޓުންނެވެ. މި މެޗުގެ ސެޓުތައް ދިޔައީ 21-1 އަދި 21-2 އިންނެވެ.
އަދި ފިރިހެން ސިންގަލްސްގެ ދެވަނަ ބުރުގެ މެޗުން ރާއްޖޭގެ ހުސެއިން ޒަޔާން ޝަހީދު ޒަކީ ބަލިވީ ތައިލެންޑުގެ ކަޓަޕޮން ވަންގްޗަރެއޮން އަތުން ސީދާ ދެ ސެޓުންނެވެ. މި މެޗުގެ ސެޓުތައް ދިޔައީ 21-3 އަދި 21-5 އިންނެވެ.
ފިރިހެން ސިންގަލްސްގެ ދެވަނަ ބުރުގައި ރާއްޖޭގެ އަޙްމަދު ނިބާލުވެސް ވާދަކުރިއިރު، އޭނާ ބަލިވީ ސިންގަޕޫރުގެ ޖޭސަން ޓޭ އަތުން ސީދާ ދެ ސެޓުންނެވެ. މެޗުގެ ސެޓުތައް ޖޭސަން ކާމިޔާބުކޮށްފައިވަނީ 21-8 އަދި 21-12 އިންނެވެ.
މީގެ އިތުރުން އަންހެން ޑަބަލްސްގެ ދެވަނަ ބުރުގައި ރާއްޖޭގެ ނަބީ އާއި ނަބާ ޕެއާ ވާދަކޮށްފައިވަނީ އިންޑިއާގެ ޓްރީސާ ޖޮލީ އާއި ގައިތުރީ ގޯޕީޗަންދުގެ ޕެއާއާއެވެ. އެ މެޗު އިންޑިއާގެ ޕެއާއިން ކާމިޔާބުކޮށްފައިވަނީ ސީދާ ދެ ސެޓުންނެވެ. މެޗުގެ ސެޓުތައް ދިޔައީ 21-14 އަދި 21-12 އިންނެވެ.
އަންހެން ޑަބަލްސްގެ ދެވަނަ ބުރުގައި ދެން ވާދަކޮށްފައިވަނީ ރާއްޖޭގެ މައިސާ ފަތުހުﷲ އިސްމާޢީލާއި އައިޝަތު އަފްނާން ރަޝީދުގެ ޕެއާއެވެ. އިންޑިއާގެ ތަނީޝާ ކްރަސްޓޯ އާއި އަޝްވިނީ ޕޮންނައްޕާއާ ދެކޮޅަށް ކުޅުނު މި މެޗުގެ ފުރަތަމަ ސެޓު 21-2 އިން އިންޑިއާގެ ޕެއާއިން ގެންގޮސްފައިވަނިކޮށް، ދެވަނަ ސެޓުގައި މައިސާއަށް ލިބުނު އަނިޔާއަކާ ގުޅިގެން ރާއްޖޭގެ ޕެއާއިން ވަނީ މި މެޗު ރިޓަޔާކޮށްފައެވެ. ދެވަނަ ސެޓުގެ ކުޅުން ހުއްޓާލިއިރު އިންޑިއާގެ ޕެއާ ކުރީގައި އޮތީ 12-2 އިންނެވެ.