ޕާކިސްތާނުގެ ދެ ސަރަޙައްދެއްގައިވާ މިސްކިތްތަކަށް އަމާޒުކޮށް ހުކުރު ދުވަހު ދިން ބޮމުގެ ހަމަލާގައި މަރުވި މީހުންގެ ޢަދަދު 59 އަކަށް އަރައިފިއެވެ. ބޮންތައް ގޮއްވައިލާފައި ވަނީ އެ ޤައުމުގެ ދެކުނުގައިވާ ބަލޫޗިސްތާން ޕުރޮވިންސާއި ޚައިބަރް ޕަޚްތުންޚާ ޕުރޮވިންސުގައެވެ. ބޮމުގެ ހަމަލަތައް ދީފައި ވަނީ ކީރިތި ރަސޫލާ مُحَمَّدٌ صَلَّى اللهُ عَلَيْهِ وَسَلَّمَ ގެ ޢީދު މީލާދުގެ މުނާޞަބަތާ ދިމާކޮށެވެ.
ބަލޫޗިސްތާނުގައި ބޮން ގޮއްވައިލާފައި ވަނީ އެ ޕުރޮވިންސުގެ ރަށެއް ކަމުގައިވާ މަސްތަންގުގެ ފުލުހުންގެ މަރުކަޒަކާ އިންވެގެން ހުންނަ މިސްކިތެއް ކައިރީގައެވެ. ހަމަލަ ދީފައި ވަނީ ހުކުރު ނަމާދުގެ ޖަމާޢަތަށް ގިނަ ޢަދަދެއްގެ ބަޔަކު ޖަމާވަމުން ދިޔަ ވަގުތުގައެވެ. ޕާކިސްތާނުގެ ސަރުކާރުން ވަނީ ބޮމުގެ ހަމަލަތަކުގެ ފަހަތުގައި އިންޑިޔާގެ ޖާސޫސީ އިދާރާގެ އަތެއް ވާކަމަށް ތުހުމަތު ކޮށްފައެވެ.
ޕާކިސްތާނުގެ ދާޚިލީ ވަޒީރު ސަރްފަރާޒް ބަކްތީ ވިދާޅުވީ މަސްތަންގުގެ މިސްކިތް ކައިރީގައި ބޮމެއް ގޮއްވައިލައިގެން ދިން ހަމަލާ ތަހުޤީޤު ކުރަމުންދާ ކަމަށާއި، އެ ހަމަލާގެ ފަހަތުގައިވާ މީހުން ހޯދައި ފިޔަވަޅު އަޅާނެ ކަމުގައެވެ. އަދި، އިންޑިޔާގެ ޖާސޫސީ އިދާރާ ކަމުގައިވާ ރީސަރޗް އެންޑް އެނެލިސިސް ވިންގް (ރޯ)ގެ އަތެއް މި ހަމަލާގައި ވާކަމަށް އޭނާ ތުހުމަތު ކުރެއްވިއެވެ.
ބަލޫޗިސްތާނުގައި ދިން ހަމަލާގައި އިންޑިޔާގެ ޖާސޫސީ އިދާރާގެ އަތެއް ވާކަމަށް ސަރްފަރާޒް ތުހުމަތު ކުރެއްވި ނަމަވެސް، އެ ކަމަށް ބާރުދޭ އެއްވެސް ހެއްކެއް އޭނާ ހާމަކުރައްވާފައެއް ނުވެއެވެ. އޭނާގެ ތުހުމަތުތަކަށް އިންޑިޔާގެ ސަރުކާރުން އަދި މިހާތަނަށް ރައްދު ދީފައެއް ނުވެއެވެ.
ބަލޫޗިސްތާނުގެ ޞިއްޙަތާ ބެހޭ އިދާރާގެ ތަރުޖަމާނު ވަސީމް ބޭކް ވިދާޅުވީ، ބޮމުގެ ހަމަލާގައި ޒަޚަމުވެގެން ފަރުވާދެމުން ދިޔަ އިތުރު ހަތް މީހަކު މަރުވެފައިވާ ކަމުގައެވެ. ޚައިބަރް ޕަޚްތުންޚާގެ މިސްކިތެއް ކައިރީގައި ދީފައިވާ ބޮމުގެ ހަމަލާގައި ވެސް ފަސް މީހުން މަރުވިއެވެ. ދެ ހަމަލާގައި ވެސް ބޮން ގޮއްވައިލާފައި ވަނީ ހަތިޔާރު އެޅި ޖަމާޢަތަކަށް ނިސްބަތްވާ މީހުން އަމިއްލައަށް ފުރާނަ ނަގައިލައިގެން ކަމުގައި ޕާކިސްތާނުން ބުނެއެވެ.
މި ހަމަލައާ ގުޅިގެން ބަލޫޗިސްތާނުގައި ކުއްލި ހާލަތު އިޢުލާނު ކޮށްފައިވާއިރު، ޕާކިސްތާނުގައި ހަރަކާތްތެރިވާ ހަނގުރާމަވެރިންގެ އެއްވެސް ޖަމާޢަތަކުން މި ހަމަލާގެ ޒިންމާ އުފުލާފައެއް ނުވެއެވެ. ބަލޫޗިސްތާނަކީ އަފްޣާނިސްތާނުގެ ސަރަޙައްދީ ރޮނގު ކައިރީގައި އޮންނަ ޕުރޮވިންސެކެވެ.
އެ ސަރަޙައްދުގައި ހަރަކާތްތެރިވާ ޓެރެރިސްޓު ގުރޫޕުތަކުގެ ތެރޭގައި ތަޙްރީކް ޠާލިބާން ޕާކިސްތާން (ޓީ.ޓީ.ޕީ) ހިމެނެއެވެ. އެ ގުރޫޕުން އިސްވެ، ޕާކިސްތާނުގެ ފުލުހުންނާއި ސިފައިންގެ އިތުރުން ޢާންމުންނާ ދެކޮޅަށް ވެސް ޓެރެރިސްޓު އަމަލުތައް ދަނީ ހިންގަމުންނެވެ. އެއީ، ޓެރެރިސްޓު ޖަމާޢަތެއް ކަމުގައިވާ އިސްލާމިކް ސްޓޭޓް (އައި.އެސް)އާ ގުޅުން އޮންނަ ގުރޫޕެކެވެ.
މި ސެޕްޓެންބަރު މަހުގެ ކުރީކޮޅު ވެސް އެ ފަދަ ހަމަލައެއް ދީ، 11 މީހުން ޒަޚަމުކޮށްލާފައިވެއެވެ. އެ ހަމަލާގައި ޒަޚަމުވި މީހުންގެ ތެރޭގައި މަޝްހޫރު ދީނީ ޢިލްމުވެރިއެއް ވެސް ހިމެނެއެވެ. ހުކުރު ދުވަހު މަސްތަންގުގައި ދިން ހަމަލައާ ގުޅިގެން ޓީ.ޓީ.ޕީން ބުނީ އެ ގުރޫޕުގެ އެއްވެސް ބައިވެރިވުމެއް ނެތް ކަމުގައެވެ. އަދި، މިސްކިތްތަކާއި، ސްކޫލްތަކާއި، ޢާންމުން އެއްވެ އުޅޭ ތަންތަނަށް ހަމަލަދިނުމާ އެ ގުރޫޕުން ދެކޮޅު ކަމުގައި ވެސް ބުނެފައިވެއެވެ.
ޖުލައި މަހު ވެސް ޚައިބަރް ޕަޚްތުންޚާގައި ދިން ނުރައްކާތެރި ބޮމުގެ ހަމަލައެއްގައި 40 މީހުން މަރައިލާފައިވެއެވެ. ޓީ.ޓީ.ޕީން ދީފައިވާ ކަމަށް ބެލެވޭ އެ ހަމަލަ އަމާޒުކޮށްފައި ވަނީ ސިޔާސީ ގޮތުން ހަރަކާތްތެރިވާ ދީނީ ޕާޓީއެއްގެ އެއްވުމަކަށެވެ.