ތުރުކީވިލާތުގެ ވެރިރަށް އަންކަރާގައި ބޮމެއް ގޮއްވައިލައިގެން ނުރައްކާތެރި ހަމަލައެއް ދީފިއެވެ. އެ ޤައުމުގެ ދާޚިލީ ވުޒާރާއިން ބުނީ ބޮން ގޮއްވައިލާފައި ވަނީ އެ މިނިސްޓްރީގެ ކުރިމަތީގައި ކަމުގައެވެ. މި ހަމަލާގައި އެއްވެސް މީހެއްގެ ފުރާނައަށް ނުރައްކާވި ކަން އަދި ސާފެއް ނޫނެވެ.
ތުރުކީވިލާތުގެ ދާޚިލީ ވަޒީރު ޢަލީ ޔައަލިކަޔާ ވަނީ މިއީ ޓެރެރިސްޓު ހަމަލައެއްގެ ގޮތުގައި ސިފަ ކުރައްވާފައެވެ. އޭނާ ވިދާޅުވީ މި ހަމަލާ ދިނުމުގައި ދެ މީހަކު ބައިވެރިވެފައިވާ ކަމުގައެވެ. އޭގެ ތެރެއިން އެކަކު ބޮން ގޮއްވައިލާފައި ވަނީ އަމިއްލައަށް ފުރާނަ ނަގައިލައިގެން ކަމަށާއި، ދެވަނަ މީހާއާއި ފުލުހުންނާ ދެމެދު ހިނގި ހަމަލަ ބަދަލުކުރުންތަކެއްގައި އޭނާ މަރުވެފައިވާ ކަމުގައި ވެސް އޭނާ ވިދާޅުވިއެވެ.
ބޮން ގޮއްވައިލާފައިވާ ދާޚިލީ ވުޒާރާގެ އޮފީހަކީ، އެ ޤައުމުގެ ޤާނޫނު ހަދާ މަޖިލީހުގެ ޢިމާރާތް ކައިރީގައި ހުންނަ ޢިމާރާތެކެވެ. މި ހަމަލަ އަމާޒުކޮށްފައި ވަނީ ޤާނޫނު ހަދާ މަޖިލީހުގެ ޢިމާރާތަށް ކަމަށް ބެލުމުގެ ފުރުޞަތު އޮތްއިރު، ހަމަލަ ދީފައި މި ވަނީ ޗުއްޓީއަށް ފަހު މަޖިލީހުގެ ޖަލްސާތައް މިއަދު ފެށުމަށް ތައްޔާރުވަމުންދިޔަ ދަނޑިވަޅެއްގައެވެ.
ހަތިޔާރުއެޅި ޖަމާޢަތަށް ނިސްބަތްވާ މީހާއާއި ފުލުހުންނާ ދެމެދު ހިނގި ކުރިމަތިލުމުގައި ފުލުހުންގެ ދެ މީހަކު ޒަޚަމުވެފައިވާ ކަމުގައި ވެސް ޔައަލިކިޔާ ވިދާޅުވިއެވެ. އަންކަރާގައި ހުންނަ ދާޚިލީ ވުޒާރާގެ އޮފީހާއި ޤާނޫނު ހަދާ މަޖިލީހުގެ ޢިމާރާތް ކައިރީގައި އެ ޤައުމުގެ ސަލާމަތީ ބާރުތަކުން މިހާރު ދަނީ ހަރަކާތްތެރިވަމުންނެވެ. އަދި، އަންކަރާގައި ސަލާމަތީ ފިޔަވަޅުތައް ވަނީ ވަރުގަދަ ކޮށްފައެވެ.