އެމެރިކާގެ ނިއު ޔޯކް ސްޓޭޓްގެ ނިއު ޔޯކް ސިޓީއަށް ބޯކޮށް ވާރޭވެހި ފެންބޮޑުވުމާ ގުޅިގެން އެ ރަށުގައި ކުއްލި ހާލަތު އިޢުލާނު ކޮށްފިއެވެ. އެމެރިކާގެ މޫސުމާ ބެހޭ އިދާރާއިން ބުނީ ފާއިތުވި 24 ވަރަކަށް ގަޑިއިރުގެ ތެރޭގައި ނިއު ޔޯކަށް މެދުކެނޑުމެއް ނެތި 203 މިލިމީޓަރުގެ ވާރޭ ވެހިފައިވާ ކަމުގައެވެ.
ނިއު ޔޯކްގައި ދަތުރުފަތުރު ކުރުމަށް ބޭނުންވާ ކުރާ މައި ވަސީލަތް ކަމުގައިވާ ސަބްވޭ ސިސްޓަމްގައި ފެންބޮޑުވެ، ދަތުރުފަތުރަށް ވަނީ ހުރަސް އެޅިފައެވެ. ގިނަ ސަބްވޭ ސްޓޭޝަންތައް ވަނީ ބަންދުކޮށްފައެވެ. އަދި، ހައިވޭތަކުގައި ފެންބޮޑުވުމުގެ އިތުރުން ނިއު ޔޯކްގެ ލެ ގުއާޑިޔާ ވައިގެ ބަނދަރުގެ އެއް ޓަރމިނަލަށް ފެންވަދެ، ވައިގެ ބަނދަރު ވެސް ވަނީ ބަންދު ކޮށްފައެވެ.
ނިއު ޔޯކް ސްޓޭޓްގެ ގަވަރުނަރު ކެތީ ހޯކުލް ވިދާޅުވީ ނިއު ޔޯކް ސިޓީގައި ދިރިއުޅޭ އެތަކެއް މިލިޔަން ރައްޔިތުންގެ ފުރާނައަށް ނުރައްކާވާ ފަދަ ހާލަތެއް ކުރިމަތިވެފައިވާ ކަމުގައެވެ. އަދި، ނިއު ޔޯކް ސިޓީގެ އިތުރުން ލޯންގް އައިލެންޑާއި ހަޑްސަން ވެލީގެ ސަރަޙައްދުތަކުގައި ކުއްލި ހާލަތު އިޢުލާނު ކޮށްފައިވާ ކަމުގައެވެ. ޒަރޫރީ ބޭނުމެއްގައި މެނުވީ ބޭރަށް ނިކުމެ އުޅުން މަނާކޮށްފައިވާ ކަމުގައި ވެސް އޭނާ ވިދާޅުވިއެވެ.
ނިއު ޔޯކް ސިޓީގެ ބޮޑު ސަރަޙައްދެއްގައި ފެންބޮޑުވެފައިވީ ނަމަވެސް، އެއްވެސް މީހެއްގެ ފުރާނައަށް ނުރައްކާވެފައިވާ ކަމުގެ ރިޕޯޓެއް ކޮށްފައެއް ނެތެވެ. އަދި، އެއްވެސް މީހަކަށް އަނިޔާވި ކަމުގެ ރިޕޯޓެއް ވެސް ކޮށްފައެއް ނެތެވެ. ނަމަވެސް، ގެދޮރުގައިވާ ބޭސްމެންޓްތަކުގައި ދިރިއުޅޭ ގިނަ ޢަދަދެއްގެ ބަޔަކު ސަލާމަތް ކުރަން ޖެހުނު ކަމުގައި ނިއު ޔޯކް ސިޓީގެ މޭޔަރު އެރިކް އެޑަމްސް ވިދާޅުވިއެވެ.
ހޯކުލް ވިދާޅުވީ، ކުރިއަށް އޮތް ދުވަސްތަކުގައި ވެސް ނިއު ޔޯކް ސްޓޭޓްގެ ބޮޑު ސަރަޙައްދަކަށް ބޯކޮށް ވާރޭވެހޭނެ ކަމަށް މޫސުމާ ބެހޭ އިދާރާއިން ލަފާކުރާ ކަމުގައެވެ. އަދި، ވާރޭވެހުން ހުއްޓައިލި ނަމަވެސް، ބޭރުތެރެއަށް ނިކުމެ އުޅުމަކީ އެންމެ ރައްކާތެރި ކަމެއް ނޫން ކަމުގައި އޭނާ ވިދާޅުވިއެވެ. ފެންބޮޑުވުމާ ގުޅިގެން ގެދޮރުގައި ތާށިވެފައިވާ މީހުން ސަލާމަތް ކުރުމަށް އޮފިޝަލުން އަދިވެސް ދަނީ މަސައްކަތް ކުރަމުންނެވެ.