ޔޫކްރެއިންގެ އިރުމަތީގައި ރަޝިޔާ ސިފައިން އަތްގަދަކޮށްފައިވާ ދޮންބާސްގައި ހަރަކާތްތެރިވާ ރަޝިޔާ ސިފައިންގެ އަމާޒުތަކަށް ޔޫކްރެއިނުން ވަރުގަދަ ހަމަލަތަކެއް ދީފިއެވެ. އެންމެ ގިނަ ހަމަލަތައް އަމާޒުކޮށްފައި ވަނީ ރަޝިޔާއިން އަތްގަދަ ކޮށްފައިވާ ރަށެއް ކަމުގައިވާ ބަޚްމުތަށް ކަމުގައި އޮފިޝަލުން ވިދާޅުވިއެވެ. އެއީ ދޮންބާސްގައި އޮންނަ ދޮނެޓްސްކުގެ ރަށެކެވެ.
ދޮނެޓްސްކު ސަރަޙައްދުގައި ހުންނަ ރަޝިޔާގެ އިސް އޮފިޝަލެއް ކަމުގައިވާ ދިނިޝް ޕުޝިލިން ބުނީ، ބަޚްމުތްގައި ހަރަކާތްތެރިވަމުންދާ ރަޝިޔާގެ ފައުޖުތަކަށް އަމާޒުކޮށް ޔޫކްރެއިނުން ވަރުގަދަ ހަމަލަތަކެއް ދެމުންދާ ކަމުގައެވެ. އެންމެ ގިނަ ހަމަލަތައް އަމާޒުކޮށްފައި ވަނީ ކްރާސްނޮލިމަންސްކީއަށް ކަމުގައި އޭނާ ބުންޏެވެ. މީގެ އިތުރުން، ދޮނެޓްސްކުގެ އެހެން ރަށެއް ކަމުގައިވާ ލިމާންގައި ތިބި ރަޝިޔާގެ ފައުޖުތަކަށް ވެސް ގިނަ ހަމަލަތަކެއް އަމާޒުކޮށްފައިވާ ކަމުގައި އޭނާ ބުންޏެވެ.
މި ހަމަލަތައް ދީފައި މި ވަނީ ޔޫކްރެއިނަށް އަރާފައިވާ ރަޝިޔާގެ ފައުޖުތަކާ ދެކޮޅަށް އެ ޤައުމުން ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭނުގެ ދަށުންނެވެ. މި ކެމްޕޭނުގެ ދަށުން ޔޫކްރެއިންގެ ފައުޖުތަކުން ދަނީ ކުރިއެރުންތަކެއް ހޯދަމުންނެވެ. އަދި، ރަޝިޔާގެ އިސްތިޢުމާރީ ސިފައިން އަތްގަދަ ކޮށްފައިވާ ރަށްތަކާއި އަވަށްތައް މިނިވަން ކުރަމުންނެވެ.
ކައުންޓަރއޮފެންސިވްގެ ދަށުން އެންމެ ހޫނުކޮށް ހަނގުރާމަ ހިނގަމުން ދަނީ އިރުމަތީގައިވާ ދޮނެޓްސްކުގެ ބަޚްމުތް އޮންނަ ސަރަޙައްދުގެ އިތުރުން ޔޫކްރެއިންގެ ދެކުނުގައިވާ ޒަޕޮރީޜިޔާއާއި އެ ރަށް ވަށައިގެންވާ ސަރަޙައްދުތަކުގައެވެ. ޔޫކްރެއިންގެ އެންމެ ދެކުނުން އޮންނަ ކްރައިމިޔާގައިވާ ރަޝިޔާގެ އަސްކަރީ އަމާޒުތަކަށް ވެސް ޔޫކްރެއިނުން ދަނީ ހަމަލަ ދެމުންނެވެ. އެއީ، 2014 ވަނަ އަހަރު ރަޝިޔާއިން އަތްގަދަ ކޮށްފައިވާ ސަރަޙައްދެކެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 579 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ.