ބާރުގަދަ ތޫފާން އިލިޔާސް ގްރީސްގެ ސަރަޙައްދުތަކަށް އެރުމާ އެކު ބޯކޮށް ވާރޭވެހި، ބޮޑު ސަރަޙައްދެއްގައި ފެންބޮޑުވެ، ގިނަ ޢަދަދެއްގެ ބަޔަކު ހާލުގައި ޖެހިއްޖެއެވެ. ތޫފާން އިލިޔާސް ގްރީސްގެ ސަރަޙައްދުތަކަށް އަރާފައި މި ވަނީ، މީގެ ހަފުތާއެއްހާ ދުވަސް ކުރިން ހިނގި ފެންބޮޑުވުމުގެ ހާދިސާތަކުގައި އެ ޤައުމުން 17 މީހުން މަރުވެފައިވާ ދަނޑިވަޅެއްގައެވެ.
ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ އެ ޤައުމުގެ މެދުތެރޭގައިވާ ވޯލްޔޯސްއާއި، އެ ރަށް ކައިރީގައިވާ ސަރަޙައްދުތަކަށެވެ. ގްރީސްގެ ވަކިން އޮންނަ ރަށެއް ކަމުގައިވާ އެވިއާއަށް ވެސް ތޫފާނުގެ އަސަރުކޮށް، ދަތުރުފަތުރަށް ހުރަސް އެޅުނެވެ. ފެންބޮޑުވުމާ ގުޅިގެން އެތަކެއް ސަތޭކަ ބަޔަކު ގެދޮރުގައި ތާށިވެފައިވާއިރު، އެ މީހުން ސަލާމަތް ކުރަން އޮފިޝަލުން ދަނީ މަސައްކަތް ކުރަމުންނެވެ.
ކުއްލި ހާލަތްތަކުގައި ހަރަކާތްތެރިވާ ގްރީސްގެ އިދާރާތަކުން ބުނީ، މިހާތަނަށް 250 މީހަކު ސަލާމަތް ކޮށްފައިވާ ކަމުގައެވެ. އަދި، އަމިއްލަ ގެދޮރުގައި ތާށިވެފައިވާ އިތުރު މީހުން ސަލާމަތް ކުރުމަށް، ޑިންގީ ފަދަ ކުދި އުޅަނދުފަހަރާއި ހެލިކޮޕްޓަރުތައް ބޭނުން ކޮށްގެން މަސައްކަތް ކުރަމުންދާ ކަމުގައެވެ.
ތޫފާން އިލިޔާސްއާ ގުޅިގެން ވޯލްޔޯސްގެ ގިނަ ހިސާބުތަކުން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ. އަދި، ފެން ވަނުމާ ގުޅިގެން އެ ރަށުގެ މައި ހޮސްޕިޓަލުގެ ބައެއް ސަރަޙައްދުތައް ވެސް މިހާރު ބޭނުން ނުކުރެވޭ ކަމުގައި ރިޕޯޓުތައް ބުނެއެވެ. އެއީ، 140,000 މީހުންގެ އާބާދީއެއް ދިރިއުޅޭ ރަށެކެވެ.
މީގެ ތިން ހަފުތާއެއްހާ ދުވަސް ކުރިން ގްރީސްގެ ސަރަޙައްދުތަކަށް ތޫފާން ޑެނިޔެލް އެރުމާ ގުޅިގެން ވޯލްޔޯސްގެ ގިނަ ހިސާބުތަކުން ސާފު ބޯފެން ހުސްވެފައިވާއިރު، ތޫފާން އިލިޔާސްއާ ގުޅިގެން އެ ސަރަޙައްދުގައި ދިރިއުޅޭ އިތުރު ބަޔަކު މި ވަނީ ހާލުގައި ޖެހިފައެވެ. ފެންބޮޑުވުމާ ގުޅިގެން އެ ރަށުގެ ފެނުގެ ނިޒާމަށް ލިބުނު ގެއްލުންތައް އަދިވެސް މަރާމާތު ކުރެވިފައެއް ނުވެއެވެ.
ތޫފާން ޑެނިޔެލްގެ ސަބަބުން ގްރީސްއިން 17 މީހުން މަރުވެފައިވާއިރު، އެ ތޫފާނާ ގުޅިގެން ވެސް ބައެއް ސަރަޙައްދުތަކަށް ވަނީ ބޮޑެތި ގެއްލުންތަކެއް ލިބިފައެވެ. ދަނޑުބިންތައް ވަނީ ހަލާކުވެފައެވެ. އަދި، އެތަކެއް ސަތޭކަ ހާސް ނައަމްސޫފި މަރުވެފައިވާ ކަމުގައި އޮފިޝަލުން ވިދާޅުވިއެވެ.
އެ ޤައުމުގެ ދަނޑުވެރިކަމާ ބެހޭ ވަޒީރު ލެފްތެރިސް އެވިޔަނާކިސް ވިދާޅުވީ، ތޫފާން ޑެނިޔެލްގެ ސަބަބުން މަރުވި ނައަމްސޫފީގެ ޢަދަދު 180,000 އަށްވުރެ މައްޗަށް އަރާ ކަމުގައެވެ. އަދި، ކަފަޔާއި، ޒުވާރިޔާއި، ގޮވާމުގެ ބާވަތްތަކާއި، އާފަލުގެ އިތުރުން ކީވީ ހައްދާ ގިނަ ދަނޑުބިންތަކެއް ސުންނާފަތިވެފައިވާ ކަމުގައެވެ.
ގްރީސްގައި ގިނަ ޢަދަދެއްގެ ބަޔަކު ހާލުގައި ޖެހިފައިވާއިރު، އެ ޤައުމަށް އެހީތެރިކަން ފޯރުކޮށްދޭން ވިލާތުގެ އިއްތިހާދު (އީ.ޔޫ)ން ވަނީ މަސައްކަތް ފަށާފައެވެ. އަދި، ދަނޑުބިންތަކަށް ލިބިފައިވާ ގެއްލުންތައް ބައްލަވައިލައްވަން އީ.ޔޫގެ ދަނޑުވެރިކަމާ ބެހޭ ކޮމިޝަނަރު ޔަނޫޝާ ވޮއިޗެހޮފްސްކިއެގޯ ގްރީސްއަށް ވަޑައިގަންނަވަން ހަމަޖެހިފައިވާ ކަމުގައި އެ އިއްތިހާދުން ބުނެއެވެ.
މި އަހަރުގެ ހޫނު މޫސުމުގައި ގްރީސްއަށް ހޫނުގެ ތޫފާނެއް ކުރިމަތިވެ، ޖަންގަލިތަކުގައި ރޯވެ، ބޮޑެތި ގެއްލުންތަކެއް ލިބިފައިވެއެވެ. އެ ހާދިސާތަކުގައި 26 މީހުން މަރުވެފައިވާއިރު، އޭގެ ތެރޭގައި ގިނައީ ތުރުކީވިލާތު މަގުން ގްރީސްއަށް ހިޖުރަކޮށްފައިވާ ރެފިއުޖީންނެވެ.