ލީބިޔާގެ އިރުމަތީގައިވާ ދަރްނާގައި ދާދިފަހުން ހިނގި ފެންބޮޑުވުމުގެ ހާދިސާގައި އެތަކެއް ހާސް ބަޔަކު މަރުވެފައިވާއިރު، ފެންބޮޑުވުމުގެ ޒިންމާ އުފުލަންޖެހޭ ކަމަށް ބެލެވޭ އަށް މީހަކު ހައްޔަރު ކުރުމުގެ އަމުރު ނެރެފައިވާ ކަމުގައި އެ ޤައުމުގެ ޕްރޮސިކިޔުޓަރ ޖެނެރަލްގެ އޮފީހުން ހާމަކޮށްފިއެވެ. ފެންބޮޑުވުމުގެ ހާދިސާގައި މަރުވި މީހުންގެ ޢަދަދު 3,800 އަށް އަރާފައިވާ ކަމުގައި ލީބިޔާއިން އެންމެ ފަހުން އިޢުލާނު ކޮށްފައިވާ ޢަދަދުތަކުން ހާމަވެއެވެ.
ދަރްނާގައި ފެންބޮޑުވެފައި ވަނީ މެޑިޓެރޭނިޔަން ކަނޑުގައި އުފެދުނު ބާރުގަދަ ތޫފާނެއް ކަމުގައިވާ ޑެނިއެލްގެ ސަބަބުން މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން ކޯރެއްގައި ޤާއިމުކޮށްފައިވާ ދެ ޑޭމް ހަލާކުވުމާ ގުޅިގެންނެވެ. ޑޭމް ހަލާކުވެ، ކޯރުގެ ފެންގަނޑު ބަންޑުންވެފައި ވަނީ ސުނާމީއެއްގެ ސިފައިގައި ކަމަށް މަންޒަރު ފެނުނު ފަރާތްތަކުން ބުނެއެވެ. އެ ހާދިސާ ހިނގާފައި ވަނީ ސެޕްޓެންބަރު މަހުގެ 11 ވަނަ ދުވަހުއެވެ.
ލީބިޔާގެ ޖެނެރަލް ޕްރޮސިކިޔުޓަރގެ އޮފީހުގެ އިސްވެރިޔާ އަލް-ޞަދީޤު އަލް-ޞުވަރޫ ވިދާޅުވީ މި ހާދިސާގެ ޒިންމާ އުފުލަން ޖެހޭ ކަމަށް ފެންނަ އަށް މީހަކު ހައްޔަރު ކުރުމަށް އަމުރު ނެރެފައިވާ ކަމުގައެވެ. އޭގެ ތެރޭގައި ސަރުކާރުގެ އެކި މަޤާމުތައް މި ވަގުތު ފުރަމުންދާ މީހުންނާއި، އިސް މަޤާމުތައް ކުރިން ފުރާފައިވާ މީހުން ހިމެނެއެވެ. އޭގެ ތެރޭގައި ދަރްނާގެ މޭޔަރާއި، ވޯޓަރ ރިސޯސަސް އޮތޯރިޓީގެ އޮފިޝަލުންނާއި، ޑޭމް މެނޭޖްމަންޓް އޮތޯރިޓީގެ އޮފިޝަލުން ހިމެނެއެވެ.
ފެންބޮޑުވުމާ ގުޅިގެން މަރުވި މީހުންގެ ޢަދަދު 11,000 އަށްވުރެ އިތުރުވެފައިވާ ކަމަށް ކުރިން ރިޕޯޓުކޮށްފައިވެއެވެ. އޮފިޝަލުން މިހާރު ވިދާޅުވަނީ މަރުވެފައި ވަނީ 3,800 އެއްހާ މީހުން ކަމުގައެވެ. ނަމަވެސް، ފެންބޮޑުވުމާ ގުޅިގެން އެޅި ސުނާމީއެއް ފަދަ ރާޅާ އެކު ގެއްލިފައިވާ ކަމަށް ބެލެވޭ 10,000 އަށްވުރެ މީހުން އަދިވެސް ނުފެންނަ ކަމުގައި އޮފިޝަލުން ވިދާޅުވެއެވެ.
ޞުވަރޫގެ އޮފީހުން ބުނީ، ފެންބޮޑުވުމުގެ ހާދިސާގައި ޒިންމާ އުފުލަން ޖެހޭ ކަމަށް ބެލެވޭ އަށް މީހުންގެ ތެރެއިން ހަތް މީހަކާ މިހާރު ސުވާލު ކޮށްފައިވާ ކަމުގައެވެ. ސުވާލު ކޮށްފައިވާ މީހުންގެ ތެރޭގައި ދަރްނާގެ މޭޔަރު ޢަބްދުލްމުނަޢިމް އަލް-ޣައިޝީ ހިމެނެއެވެ. މި ހާދިސާއާ ގުޅިގެން މޭޔަރު ކަމުގެ މަޤާމުން އޭނާ ވަނީ ދުރުކޮށްފައެވެ.
ޑޭމްތައް ހަލާކުވެފައި ވަނީ، ފަރުވާ ކުޑަވުމާއި، އަޅަންޖެހޭ ފިޔަވަޅުތައް ނޭޅުމުގެ ސަބަބުން ކަމުގައި އެ އޮފީހުން ބުންޏެވެ. އަދި، ދެ ޑޭމްގައި ވެސް ރެނދުލައި، އެ ދެ ތަނަށް ބޮޑެތި ގެއްލުންތަކެއް ލިބިފައިވާ ކަން 1998 ވަނަ އަހަރުން ފެށިގެން ކަމާ ގުޅޭ އިދާރާތަކަށް އެނގިފައިވާ ކަމުގައި ވެސް އެ އޮފީހުން ބުނެއެވެ. 2010 ވަނަ އަހަރު ޑޭމްތައް މަރާމާތު ކުރުމުގެ މަސައްކަތް ފެށި ނަމަވެސް، 2011 ވަނަ އަހަރު ލީބިޔާގައި ފެށި ދާޚިލީ ހަނގުރާމައާ ގުޅިގެން އެ މަސައްކަތަށް ވަނީ ހުރަސް އެޅިފައެވެ.
ލީބިޔާގެ ހުޅަނގާއި އިރުމަތީގައި ވެރިކަން ކުރަނީ ދެ ސަރުކާރަކުންނެވެ. އޭގެ ތެރެއިން ބައިނަލްއަޤްވާމީ މުޖުތަމަޢުން ބަލައިގަނެފައި ވަނީ ހުޅަނގުގައި ވެރިކަން ކުރާ ޢަބްދުލްޙާމިދު ދަބީބާގެ ސަރުކާރެވެ. ލީބިޔާގައި ދެ ސަރުކާރެއް އުފެދިފައި ވަނީ އެ ޤައުމުގެ އިންތިޚާބީ ބޮޑުވަޒީރު މުޣައްމަރް ޤައްޜާފީގެ ސަރުކާރު 2014 ވަނަ އަހަރު ވައްޓައިލުމާ ގުޅިގެންނެވެ. ޤައްޜާފީގެ ސަރުކާރު ވައްޓައިލާ އޭނާ އަވަހާރަ ކޮށްލާފައި ވަނީ ނޭޓޯއިންނެވެ.