އުތުރު އެމެރިކާ ބައްރުގެ ޤައުމެއް ކަމުގައިވާ ގުއަޓަމާލާއަށް ބޯކޮށް ވާރޭވެހި ހިނގި ބިންގަނޑު ކެނޑުމުގެ ހާދިސާއެއްގައި ހަ މީހުން މަރުވެއްޖެއެވެ. ގުއަޓަމާލާގެ ވެރިރަށް ގުއަޓަމާލާ ސިޓީގެ ފަރުބަދަމަތީ ސަރަޙައްދެއްގައި ހިނގި މި ހާދިސާގައި އިތުރު 12 މީހުން ގެއްލިފައިވާ ކަމަށް އޮފިޝަލުން ހާމަކުރެއެވެ. އެ މީހުން ހޯދައި ސަލާމަތް ކުރަން މިހާރު ދަނީ މަސައްކަތް ކުރަމުންނެވެ.
މެދުކެނޑުމެއް ނެތި ބޯކޮށް ވާރޭވެހުމާ އެކު ގުއަޓަމާލާގައި އޮންނަ ނަރަންޚޯ ކޯރު ފުރިގެން ބަންޑުންވުމާ ގުޅިގެން އެ ސިޓީގެ ބައެއް ސަރަޙައްދުތަކުގައި ވަނީ ފެންބޮޑުވެފައެވެ. ކޯރުގެ އައްސޭރިފަށުގައި ބިނާކޮށްފައިވާ ހަ ގެއެއް، ފެންގަނޑާ އެކު ދަމައިގަނެފައިވާ ކަމުގައި އޮފިޝަލުން ވިދާޅުވިއެވެ. މި ހާދިސާގައި ގެއްލިފައިވާ މީހުންގެ ތެރޭގައި ނުވަ ކުޑަކުދިން ވެސް ހިމެނެއެވެ.
ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ގުއަޓަމާލާގެ ރަށްފުރު ހިސާބެއް ކަމުގައިވާ ދިޔޯސް އެސް ފިޔޭލްއަށެވެ. މި ހާދިސާގައި ކޯރުގެ ފެންގަނޑާއެކު ދަމައިގަނެފައި ވަނީ ބުރިޖެއްގެ ދަށުގައި ވަރަށް އާދައިގެ ގޮތަކަށް ބިނާކޮށްފައިވާ ހަ ގެއެވެ. ގުއަޓަމާލާގެ ކުއްލި ހާލަތްތަކާ ބެހޭ އިދާރާ ކަމުގައިވާ ނޭޝަނަލް ކޯޑިނޭޝަން ފޯ ޑިޒާސްޓަރ ރިޑަކްޝަން އޭޖެންސީ (ކޮންރެޑު)ން ބުނީ މަރުވެފައިވާ ހަ މީހެއްގެ ހަށިގަނޑު ފެނިފައިވާ ކަމުގައެވެ. އަދި، އޭގެ ތެރޭގައި ފަސް އަހަރުގެ ކުޑަ އަންހެން ކުއްޖެއް ހިމެނޭ ކަމަށާއި، ގެއްލިފައިވާ އިތުރު މީހުން ހޯދަން މަސައްކަތް ކުރަމުންދާ ކަމުގައެވެ.
ގުއަޓަމާލާއަކީ ވަރަށް ފަގީރު ޤައުމެކެވެ. އެ ޤައުމުގެ އާބާދީގެ 59 އިންސައްތަ މީހުން ދިރިއުޅެނީ ފަގީރުކަމުގައެވެ. އެއީ ބޯހިޔާވަހިކަމުގެ ދަތިކަން އިންތިހާއަށް ކުރިމަތިވެފައިވާ ޤައުމެއް ކަމުގައި ވެސް މަސްރަޙު ދިރާސާކުރާ ފަރާތްތަކުން ބުނެއެވެ. އެ ޤައުމުގެ އާބާދީގެ ގިނަ ޢަދަދެއްގެ ބަޔަކު ދިރިއުޅެނީ ވަރަށް ބަލިކަށިކޮށް ޢިމާރާތް ކޮށްފައިވާ ގެދޮރުގައެވެ. އެއީ، މޫސުމީ ކާރިސާތަކުގައި ގެއްލުންވުމުގެ ނުރައްކާ ބޮޑު ޢިމާރާތްތަކެއް ކަމުގައި ވެސް މަސްރަޙު ދިރާސާކުރާ ފަރާތްތަކުން ބުނެއެވެ.
ކޮންމެ އަހަރެއްގެ މޭ މަހުން ފެށިގެން ނޮވެންބަރު މަހާ ދެމެދު ގުއަޓަމާލާއަށް ވިއްސާރަ މޫސުން ކުރިމަތިވާއިރު، އެ މޫސުމުގައި ފެންބޮޑުވުމާއި ބިންގަނޑު ކެނޑުމުގެ ހާދިސާތަކާ އެ ޤައުމުގެ ރައްޔިތުން ކުރިމަތިލާން ޖެހެއެވެ. މި އަހަރުގެ މިހާތަނަށް ކުރިމަތިވި އެހި ހާދިސާތަކުގެ އަސަރު 2.1 މިލިޔަން މީހުންނަށް ކޮށްފައިވާއިރު، ފެންބޮޑުވުމާ ގުޅިގެން ހިނގި އެކި ހާދިސާތަކުގައި މަރުވެފައިވާ މީހުންގެ ޢަދަދު ވަނީ 29 އަށް އަރާފައެވެ. އަދި، 10,000 އަށްވުރެ ގިނަ ގެދޮރު ވަނީ ހަލާކުވެފައެވެ.