ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ ތުރީ އޮން ތުރީ ބާސްކެޓްބޯޅަ އިވެންޓުގައި ކުޅުނު ފުރަތަމަ މެޗުތަކުން ރާއްޖޭގެ އަންހެން އަދި ފިރިހެން ޓީމުވެސް ބަލިވެއްޖެއެވެ.
މިއަދު ކުޅުނު މެޗުން އަންހެން ޓީމު ބަލިވީ ވާދަވެރި ކުޅުމަކަށްފަހު މެލޭޝިއާ އަތުން 15-12 އިންނެވެ. މި މެޗުގައި ރާއްޖޭގެ ކުޅުންތެރިންގެ ފަރާތުން މޮޅު ކުޅުމެއް ފެނިގެންދިޔައިރު، ޓީމުގެ އައިޝަތު އިނާޝާ ވަނީ ހަތް ޕޮއިންޓް ސްކޯކޮށްފައެވެ. އަދި އައިޝަތު ރާއީ ހަމްޒާ ވަނީ ތިން ޕޮއިންޓް އެއްކޮށްފައެވެ.
ތުރީ އޮން ތުރީ ބާސްކެޓުގެ ޕޫލް ޑީގައި ރާއްޖޭގެ އަންހެން ޓީމު ހިމެނޭއިރު، މި ޕޫލުގައި ދެން ހިމެނެނީ ދެކުނު ކޮރެއާ އާއި ތައިލެންޑެވެ.
މީގެ އިތުރުން މިއަދު ކުޅުނު މެޗުން ފިރިހެން ޓީމު ވަނީ ތުރުކުމެނިސްތާން އަތުން ފަސޭހަކަމާއެކު 22-2 އިން ބަލިވެފައެވެ. މި މެޗުގައި ރާއްޖެއިން ހޯދި ދެ ޕޮއިންޓް ސްކޯކޮށްދިނީ މުޙައްމަދު ރިޝްވާނެވެ.
ތުރީ އޮން ތުރީ ބާސްކެޓުގެ ޕޫލް ބީގައި ރާއްޖޭގެ ފިރިހެން ޓީމު ހިމެނޭއިރު، މި ޕޫލުގައި ދެން ހިމެނެނީ އީރާނާއި ޖަޕާނެވެ. މުބާރާތުގެ ދެވަނަ މެޗުގައި މާދަމާ ފިރިހެން ޓީމު ނުކުންނާނީ އިރާނާ ދެކޮޅަށެވެ.