ކޮލޮމްބިޔާގެ ހުޅަނގުދެކުނުގައިވާ ރަށެއްގައި ފުލުހުންގެ މަރުކަޒެއް ކައިރީގައި ކާރު ބޮމެއް ގޮއްވައިލައިގެން ދިން ހަމަލައެއްގައި ފަސް މީހުން ޒަޚަމުވެއްޖެއެވެ. މި ހަމަލަ ދީފައި ވަނީ ވައްޔެ ދެލް ކައުކާ ސަރަޙައްދުގެ ރަށެއް ކަމުގައިވާ ޚަމުންދީ މުނިސިޕަލިޓީގައެވެ. މި ހަމަލާގައި ޒަޚަމުވެފައި ވަނީ ޢާންމުންގެ ފަސް މީހުންނެވެ.
މި ހަމަލަ ދީފައި މި ވަނީ ޚަމުންދީ މުނިސިޕަލިޓީ ކޮލޮމްބިޔާގެ އަސްކަރިއްޔާގެ ސިފައިންނާއި ހަތިޔާރު އެޅި ޖަމާޢަތްތަކާ ދެމެދު ހަމަލަތައް ބަދަލުކުރަމުންދާ ދަނޑިވަޅެއްގައެވެ. ހަތިޔާރު އެޅި ޖަމާޢަތްތަކަކީ ކޮލޮމްބިޔާގައި މަސްތުވާތަކެތީގެ ވިޔަފާރި ކުރާ ގުރޫޕުތަކަށް ނިސްބަތްވާ ބަޔެކެވެ. ކޮލޮމްބިޔާގެ ސަރުކާރުން ދަނީ މަސްތުވާތަކެތީގެ ވިޔަފާރި ހުއްޓުވަން ގިނަ މަސައްކަތްތަކެއް ކުރަމުންނެވެ.
އޭގެ ތެރޭގައި މަސްތުވާތަކެތީގެ ވިޔަފާރިކުރާ ގުރޫޕުތަކާ މަޝްވަރާކޮށްގެން ސުލްޙަވެރި ހައްލެއް ހޯދުން ހިމެނެއެވެ. ކޮލޮމްބިޔާގެ ރައީސް ގުސްތާވޯ ޕެތްރޯ ވަނީ ޚަމުންދީގައި ދީފައިވާ ހަމަލަ ކުށްވެރި ކުރައްވާފައެވެ. އަދި، މައްސަލަތަކަށް ސުލްޙަވެރި ހައްލެއް ހޯދަން ކުރަމުންދާ މަސައްކަތްތައް ހުއްޓުމަކަށް ގެންނަން މި ފަދަ ހަމަލަތައް ދެމުންދާތީ ހިތާމަ ކުރައްވާ ކަމުގައި އޭނާ ވިދާޅުވިއެވެ.
ޚަމުންދީގެ ފުލުހުންގެ އިދާރާއެއް ކުރިމަތީގައި ބޮމެއް ގޮއްވައިލާފައި މި ވަނީ، ފުލުހުންގެ އިދާރާއަކަށް އަމާޒުކޮށް ދިން މި ފަދަ އެހެން ހަމަލައެއްގައި ޢާންމުންގެ ދެ މީހަކު މަރުވެފައިވާ ދަނޑިވަޅެއްގައި ކަން ފާހަގަކޮށްލަން ޖެހެއެވެ. ޚަމުންދީގައި ދިން ހަމަލާގައި ޒަޚަމުވި މީހުންގެ ތެރެއިން އެކެއްގެ ހާލު ސީރިޔަސް ކަމަށާއި، އޭނާއަށް ހޮސްޕިޓަލުގައި އެޑްމިޓު ކޮށްގެން ފަރުވާދެމުންދާ ކަމުގައި ފުލުހުން ވިދާޅުވިއެވެ.
ޚަމުންދީގައި ދީފައިވާ ހަމަލާގެ ފަހަތުގައި އޮތީ ސެންޓްރަލް ޖެނެރަލް ސްޓާފް (އީ.އެމް.ސީ)ގެ ނަން ކިޔާ ހަތިޔާރު އެޅި ޖަމާޢަތެއް ކަމުގައި ކޮލޮމްބިޔާގެ ދިފާޢީ ވަޒީރު އިވާން ވެލާސްކޭޒް ވިދާޅުވިއެވެ. އެއީ، 2017 ވަނަ އަހަރު ހަތިޔާރު ބެހެއްޓި ގުރޫޕެއް ކަމުގައިވާ ރިވޮލޫޝަނަރީ އާމްޑް ފޯސަސް އޮފް ކޮލޮމްބިޔާ (ފާކް)ގެ ތެރެއިން އުފެދުނު ކުޑަ ޖަމާޢަތެކެވެ. ވެލާސްކޭޒް ވިދާޅުވީ، ކޮލޮމްބިޔާގެ އަސްކަރިއްޔާއާއި އީ.އެމް.ސީގެ ފައުޖުތަކާ ދެމެދު މި ވަގުތު ވަރުގަދަ ހަމަލަތަކެއް ބަދަލު ކުރަމުންދާ ކަމުގައެވެ.
ކޮލޮމްބިޔާއަކީ މަސްތުވާތަކެތީގެ ބާވަތެއް ކަމުގައިވާ ކޮކެއިން ތިންވަނައަށް އެންމެ ގިނައިން އުފައްދާ، އޭގެ ވިޔަފާރިކުރާ ޤައުމެވެ. އީ.އެމް.ސީގެ އާމްދަނީގެ ހަތަރުބައިކުޅަ ތިންބަޔަކީ މަސްތުވާތަކެތީގެ ވިޔަފާރި ކޮށްގެން ހޯދާ ފައިސާ ކަމުގައި ވެލާސްކުއޭޒް ވިދާޅުވިއެވެ. އެ ގުރޫޕުގައި 3,500 އަށްވުރެ ގިނަ ހަތިޔާރު އެޅި މެންބަރުން ހިމެނޭ ކަމަށް ބެލެވެއެވެ.
ކޮލޮމްބިޔާގެ ހުޅަނގުދެކުނުގައިވާ ބައެއް ސަރަޙައްދުތަކަށް އަތްގަދަ ކުރަން އެ ގުރޫޕުން މަސައްކަތް ކުރަމުންދާ ކަމުގައި ކޮލޮމްބިޔާގެ ސަރުކާރުން ބުނެއެވެ. އެ ގުރޫޕަށް އެ ކަން ފަސޭހަވާ އެއް ސަބަބަކީ، އެ ސަރަޙައްދުތަކުގައި ސަލާމަތީ ފިޔަވަޅުތައް ވަރުގަދަކުރަން ކޮލޮމްބިޔާގެ އަސްކަރިއްޔާ ނުކުޅެދިފައި އޮތުން ކަމުގައި މަސްރަޙު ދިރާސާކުރާ ފަރާތްތަކުން ޤަބޫލުކުރެއެވެ.