ސަގާފީ ކުލަގަދަ ހަރަކާތްތަކަކާއެކު 19 ވަނަ އޭޝިއަން ގޭމްސް މިރޭ ޗައިނާގެ ހަންގްޖޯގައި ރަސްމީކޮށް ފަށައިފިއެވެ.
މި ފަހަރުގެ އޭޝިއަން ގޭމްސްއަކީ މިދިޔަ އަހަރު ބާއްވަން ތާވަލުކުރި ގޭމްސްއެކެވެ. މިދިޔަ އަހަރުގެ ސެޕްޓެމްބަރު މަހު ހަންގްޖޯގައި ބާއްވަން އޮތް ގޭމްސް މި އަހަރަށް ފަސްކުރަން ޖެހުނީ ޗައިނާގައި އޭރު ކޮވިޑް-19 ގެ ހާލަތު އޮތްގޮތުންނެވެ.
ހަންގްޖޯ އޮލިމްޕިކް ސްޕޯޓްސް ސެންޓަރ ސްޓޭޑިއަމުގައި އޭޝިއަން ގޭމްސްގެ ފެށުން މިރޭ ކުރިއަށް ގެންގޮސްފައިވަނީ ޗައިނާގެ ސަގާފީ ހުށަހެޅުންތަކާ އެކުގައެވެ. މިރޭގެ އިވެންޓުގައި ޗައިނާގެ ރައީސް ޝީ ޖިންޕިންގ އާއި، ގޭމްސްގައި ވާދަކުރާ ޤައުމުތަކުގެ އިސް ބޭފުޅުން ބައިވެރިވެވަޑައިގެންނެވިއެވެ.
މިރޭގެ ރަސްމިއްޔާތުގައި އޭޝިއަން ގޭމްސްގައި ވާދަކުރާ ޤައުމުތަކުގެ އެތުލީޓުންނާއި އޮފިޝަލުން ހިމެނޭ ކޮންޓިޖެންޓުތަކުން އެ ޤައުމުތަކުގެ ދިދަ ވިހުރުވާލައި ޕެރޭޑުގައި ވަނީ ބައިވެރިވެފައެވެ. ރާއްޖޭގެ ކޮންޓިޖެންޓުގެ ދިދަ ވިހުރުވާލަދިނީ ޝޫޓިން ޓީމުގައި ހިމެނޭ ޒިޔާން ޒިޔާއު އާއި ތުރީ އޮން ތުރީ އަންހެން ބާސްކެޓްބޯޅަ ޓީމުގައި ހިމެނޭ ފާތިމަތު އީހައު އިބްރާހީމެވެ.
އަންނަ އޮކްޓޯބަރު މަހުގެ އަށްވަނަ ދުވަހުގެ ނިޔަލަށް ކުރިއަށްދާ އޭޝިއަން ގޭމްސްގައި މި ފަހަރު ރާއްޖޭން ވާދަކުރަނީ ނުވަ ކުޅިވަރެއްގައެވެ. އެއީ އެތުލެޓިކްސް އާއި، ބެޑްމިންޓަނާއި، ތުރީ އޮން ތުރީ ބާސްކެޓްބޯޅަ އާއި، ބީޗް ވޮލީބޯޅަ އާއި، ކްރިކެޓާއި، އީ-ސްޕޯޓްސް އާއި، ޝޫޓިން އާއި، ސްވިމިން އަދި ޓޭބަލް ޓެނިހެވެ.
ދުނިޔޭގެ ދެވަނައަށް އެންމެ ބޮޑު އަދި އޭޝިއާގެ އެންމެ ބޮޑު ކުޅިވަރު ހަރަކާތުގައި މި ފަހަރު 40 ކުޅިވަރަކުން 61 އިވެންޓް އޮންނާނެއެވެ. މި ފަހަރުގެ އޭޝިއަން ގޭމްސްގެ އިވެންޓްތައް ކުރިއަށްދާނީ 44 ވެނިއު އެއްގައެވެ.