ކްރައިމިޔާގެ ބަނދަރުމަތީ ރަށެއް ކަމުގައިވާ ސެވަސްތޮޕޮލްގައި އޮންނަ ރަޝިޔާގެ ކަނޑުގެ ސިފައިންގެ އަސްކަރީ މައި މަރުކަޒަށް ޔޫކްރެއިނުން ވަރުގަދަ ހަމަލަތަކެއް ދީފިއެވެ. ކްރައިމިޔާއަކީ 2014 ވަނަ އަހަރު ރަޝިޔާއިން އަތްގަދަ ކޮށްފައިވާ ސަރަޙައްދެކެވެ. އެ ސަރަޙައްދަށް މިސައިލް ހަމަލަތައް ދިން ވަގުތުގައި ޔޫކްރެއިނުން ވަނީ އެ ސަރަޙައްދަށް ސައިބަރ ހަމަލަތަކެއް ވެސް އަމާޒުކޮށްފައެވެ.
ރަޝިޔާގެ ދިފާޢީ ވުޒާރާއިން ބުނީ ކްރައިމިޔާގައި އޮންނަ އެ ޤައުމުގެ ކަނޑުގެ ސިފައިންގެ މައި މަރުކަޒަށް ދިން ހަމަލަތަކާ ގުޅިގެން ސިފައިންގެ އެކަކު ގެއްލިފައިވާ ކަމުގައެވެ. ނަމަވެސް، ޔޫކްރެއިނުން ބުނީ ސެވަސްތޮޕޮލްއަށް ހަމަލަ ދީފައި ވަނީ ރަޝިޔާގެ ކަނޑުގެ ސިފައިންގެ އިސް ކޮމާންޑަރުންގެ ބައްދަލުވުމެއް ހިނގަމުން ދިޔަ ވަގުތެއްގައި ކަމަށާއި، ހަމަލަތަކުގައި އޭގެ ތެރެއިން ގިނަ ޢަދަދެއްގެ ބަޔަކު މަރުވި ކަމަށް ބެލެވޭ ކަމުގައެވެ.
ޔޫކްރެއިނުން ސެވަސްތޮޕޮލްއަށް ދީފައި ވަނީ މިސައިލް ހަމަލަތަކެކެވެ. ރަޝިޔާގެ ދިފާޢީ ވުޒާރާއިން ބުނީ ޔޫކްރެއިންގެ ފަސް މިސައިލް ދިފާޢުކޮށް ވައްޓައިލާފައިވާނެ ކަމުގައެވެ. ޔޫކްރެއިންގެ ހަމަލަތަކުގައި އަސްކަރީ މަރުކަޒުގެ އެއް ޢިމާރާތުގައި އަލިފާން ރޯވިއެވެ. ސެވަސްތޮޕޮލްގައި ހުންނަވާ ރަޝިޔާގެ ގަވަރުނަރު މިޚައިލް ރަޜްވަޜަޔެފް ވިދާޅުވީ ޢިމާރާތުގައި ރޯވި އަލިފާންގަނޑު މިހާރު ނިއްވައިލާފައިވާ ކަމުގައެވެ.
ޔޫކްރެއިންގެ ހަމަލަތަކާ ގުޅިގެން ރަޝިޔާގެ އަސްކަރީ މަރުކަޒު ކައިރީގައިވާ މަގުތައް ވަނީ ބަންދުކޮށްފައެވެ. މި ހަމަލަތަކުގައި ސެވަސްތޮޕޮލްގައި ޢާންމުން ދިރިއުޅޭ އެއްވެސް ޢިމާރާތަކަށް ގެއްލުން ލިބިފައި ނުވާ ކަމުގައި ރަޜްވަޜަޔެފް ވިދާޅުވިއެވެ. އަދި، ޢާންމުންގެ އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ވެސް އޭނާ ވިދާޅުވިއެވެ.
މި ހަމަލަތަކާ ގުޅޭ ގޮތުން ޔޫކްރެއިންގެ ސަލާމަތީ މަޖިލީހުގެ ސެކްރެޓަރީ އޮލެކްސީ ދަނިއޮލޮވް ވިދާޅުވީ ސެވަސްތޮޕޮލްގައި ޤާއިމުވެފައި އޮތް ރަޝިޔާގެ ކަނޑުގެ ސިފައިންނަށް އޮތީ އެންމެ ދެ ގޮތް ކަމުގައެވެ. އެއީ، އެ ތަން ދޫކޮށް ފަހަތަށް ޖެހުން، ނުވަތަ ޔޫކްރެއިންގެ ފަނާކުރަނިވި ހަމަލަތަކުގައި ނެތިދިޔުން ކަމުގައެވެ.
ޔޫކްރެއިންގެ ރައީސް ވޮލޮޑޮމީރް ޒެލެންސްކީގެ އިސް މުޝީރެއް ކަމުގައިވާ މިޚައިލޯ ޕޮދޮލްޔެކް ވެސް ވަނީ ކްރައިމިޔާއަށް ދީފައިވާ ހަމަލަތަކާ ގުޅޭ ގޮތުން ވާހަކަފުޅު ދައްކަވާފައެވެ. އޭނާ ވިދާޅުވީ، ރަޝިޔާގެ އިސްތިޢުމާރީ ބާރުގެ އަތްދަށުން ކޮންމެވެސް ދުވަހަކުން ކްރައިމިޔާ މިނިވަން ކުރާނެ ކަމުގައެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 577 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ.
އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.