ކުޅިވަރު

2028 ގެ ނިޔަލަށް އާސެނަލުގައި މަޑުކުރަން އޮޑެގާޑް ނިންމައިފި


އާސެނަލްގެ ކެޕްޓަން މާޓިން އޮޑެގާޑް 2028 ގެ ނިޔަލަށް އެ ކުލަބުގައި މަޑުކުރަން ނިންމާ އެއްބަސްވުން އައުކޮށްފިއެވެ.

އޮޑެގާޑް އާސެނަލަށް ބަދަލުވީ ލޯނު އެއްބަސްވުމެއްގެ ދަށުން ސްޕެއިންގެ ރެއާލް މެޑްރިޑުންނެވެ. އެއަށްފަހު 2021 ވަނަ އަހަރު އޭނާ ވަނީ ދާއިމީ އެއްބަސްވުމެއްގެ ދަށުން 35 މިލިއަން ޑޮލަރަށް އާސެނަލަށް ސޮއިކޮށްފައެވެ.

ކުލަބުގެ ކެޕްޓަންގެ ޒިންމާ މިހާރު އަދާކުރަމުން އަންނަ އޮޑެގާޑް ސޮއިކުރި އައު އެއްބަސްވުމާއެކު އޭނާއަށް ހަފްތާއަކު ދެލައްކަ އަށްޑިހަ ހާސް ޕައުންޑް ލިބޭނެ އެވެ. އެއާއެކު އޭނާ ވެފައިވަނީ ކުލަބުގެ އެންމެ މުސާރަ ބޮޑު ކުޅުންތެރިޔާއަށެވެ.

އައު އެއްބަސްވުމުގައި ސޮއިކުރުމަށްފަހު ވާހަކަދައްކަމުން އޮޑެގާޑް ބުނީ އާ ކުލަބުގައި މަޑުކުރަން ނިންމުމަކީ އޭނާ އަށް އެއްވެސް ވަރަކަށް އުނދަގޫ ނިންމުމެއް ނޫން ކަމަށާއި، މި ކުލަބުގައި ހުރީ އުފަލުގައިކަމަށެވެ. އަދި މެނޭޖްމަންޓުން ފުރިހަމަ އެއްބާރުލުން ލިބޭ ކަމަށާއި އަމާޒަކީ ކުލަބުގައި ގިނަ ކާމިޔާބީތަކެއް ހޯދުން ކަމަށެވެ.

މި ސީޒަންގައި އޮޑެގާޑް ވަނީ މިހާތަނަށް ކުޅުނު ހަތް މެޗުގައި ތިން ގޯލު ޖަހައިފައެވެ. އާސެނަލަށް ކުޅުނު 112 މެޗުތަކުގައި އޮޑެގާޑް މިހާތަނަށް ވަނީ 27 ގޯލު ޖަހައި 15 އެސިސްޓްކޮށްދީފައެވެ.