ޔޫކްރެއިނަށް އަރާފައިވާ ރަޝިޔާގެ އިސްތިޢުމާރީ ސިފައިންނާ ދެކޮޅަށް ފަށާފައިވާ ކައުންޓަރއޮފެންސިވަށް ބޭނުންވާ ދުރު ރާސްތާ މިސައިލް އެމެރިކާއިން ފޯރުކޮށްދޭނެ ކަމުގައި ރައީސް ޖޯ ބައިޑަން ވިދާޅުވެފައިވާ ކަމުގައި ރިޕޯޓުތައް ބުނެފިއެވެ. އޭނާ މި ކަން ހާމަކުރައްވާފައި ވަނީ ޔޫކްރެއިންގެ ރައީސް ވޮލޮޑޮމީރް ޒެލެންސްކީއާ ވައިޓް ހައުސްގައި ބޭއްވެވި ބައްދަލުކުރެއްވުމެއްގައި ވާހަކަފުޅު ދައްކަވަމުން ކަމުގައި އެމެރިކާގެ ނޫސްތަކުން ރިޕޯޓު ކުރެއެވެ.
އެމެރިކާގައި އުފައްދާ "އާމީ ޓެކްޓިކަލް މިސައިލް ސިސްޓަމް (އޭ.ޓީ.އޭ.ސީ.އެމް.އެސް)" މަރުކާގެ ދުރު ރާސްތާ މިސައިލް ޔޫކްރެއިނަށް ފޮނުވާނެ ކަން ބައިޑަން ޒެލެންސްކީ ގާތުގައި ވިދާޅުވެފައިވާ ކަން ހާމަކުރައްވާފައި ވަނީ އެމެރިކާ ސަރުކާރުގެ އޮފިޝަލުންނާއި ކޮންގްރެސްގެ މެންބަރުންނެވެ. އޭ.ޓީ.އޭ.ސީ.އެމް.އެސްއަކީ 306 ކިލޯމީޓަރު ދުރުގައި އޮންނަ އަމާޒުތަކަށް ހަމަލަދިނުމަށް ބޭނުން ކުރެވޭނެ މިސައިލް ސިސްޓަމެކެވެ. އަދި، 300 ކްލަސްޓަރ ބޮން އުފުލުމުގެ ގާބިލު ކަން ލިބިފައިވާ ނުރައްކާތެރި މިސައިލެކެވެ.
އޭ.ޓީ.އޭ.ސީ.އެމް.އެސް މިސައިލް ހޯދަން ޔޫކްރެއިނުން މީގެ ކުރިން ވެސް އެތަކެއް ފަހަރެއް މަތިން މަސައްކަތް ކޮށްފައިވެއެވެ. ޔޫކްރެއިނަށް އަރާފައިވާ ރަޝިޔާގެ އިސްތިޢުމާރީ ސިފައިންނަށް ހަތިޔާރާއި އެހެނިހެން ސާމާނު ފޯރުކޮށްދޭން ބޭނުންކުރާ ސަޕްލައި މަގުތައް ނައްތައިލެވޭނެ ކަމަށް ޔޫކްރެއިނުން ޤަބޫލު ކުރެއެވެ. އަދި، ކްރައިމިޔާ ފަދަ ރަށްތަކުގައި ރަޝިޔާއިން ޤާއިމު ކޮށްފައިވާ ވައިގެ ބަނދަރުތަކާއި ރޭލު ނިޒާމަށް ހަމަލަދެވޭނެ ކަމުގައި ވެސް ޔޫކްރެއިނުން ދެކެއެވެ.
ޔޫކްރެއިނަށް އޭ.ޓީ.އޭ.ސީ.އެމް.އެސް މިސައިލް ފޯރުކޮށްދޭނެ ކަމުގައި ބައިޑަން ވިދާޅުވެފައިވާ ކަމުގައި އެމެރިކާގެ ބައެއް އޮފިޝަލުން ހާމަކޮށްފައިވީ ނަމަވެސް، ވައިޓް ހައުސްއިން އެ ކަން ކަށަވަރު ކޮށްދީފައެއް ނުވެއެވެ. އެމެރިކާގެ ދިފާޢީ އިދާރާ ކަމުގައިވާ ޕެންޓެގަނުން ވެސް ވަނީ އެ ކަން ކަށަވަރު ކޮށްދޭން ދެކޮޅު ހަދާފައެވެ.
ޒެލެންސްކީއާ އެކު ބޭއްވެވި ބައްދަލުކުރެއްވުމުގައި ބައިޑަން ވަނީ ޔޫކްރެއިނަށް 325 މިލިޔަން އެމެރިކާ ޑޮލަރުގެ އައު އަސްކަރީ އެހީގެ ޕެކޭޖެއް ފޮނުވާނެ ކަން އިޢުލާނު ކުރައްވާފައެވެ. އޭ.ޓީ.އޭ.ސީ.އެމް.އެސް މިސައިލާ ގުޅޭ ގޮތުން ޒެލެންސްކީ ވެސް ވާހަކަފުޅު ދައްކަވާފައެއް ނުވެއެވެ. ނަމަވެސް، އެމެރިކާއަކީ އަސްކަރީ ގޮތުން ޔޫކްރެއިނަށް އެންމެ ބޮޑަށް އެހީތެރިކަން ފޯރުކޮށްދޭ ޤައުމު ކަން ފާހަގަކުރައްވައި، އޭނާ ވަނީ ބައިޑަންއަށް ޝުކުރު އަދާކުރައްވާފައެވެ.
ޔޫކްރެއިނުން މިހާރު ބޭނުން ކުރާ ކްލަސްޓަރ ބޮމުގެ ރާސްތާއަކީ 28 ކިލޯމީޓަރެވެ. ކްލަސްޓަރ މިޔުނިޝަންސްއަކީ އެއް ފަހަރާ ބޮޑު ސަރަޙައްދަކަށް ހަމަލަދޭން ބޭނުންކުރެވޭ ނުރައްކާތެރި ހަތިޔާރެކެވެ. އޭގެ އެންމެ ހަތިޔާރެއް ބޭނުންކޮށްގެން ދޭ ހަމަލައެއްގެ އަސަރު ދޭއް ނުވަތަ ތިން ފުޓުބޯޅަ ދަނޑުގެ ސަރަޙައްދަކަށް ކުރާނެއެވެ. އެއީ، ގެއްލުންދެނިވި އަދި ފަނާކުރަނިވި ހަތިޔާރެއްގެ ގޮތުގައި ދުނިޔޭގެ ގިނަ ޤައުމުތަކާއި އިންސާނީ ހައްޤުތަކަށް ވަކާލާތުކުރާ ޖަމުޢިއްޔާތަކުން ގަބޫލުކުރެއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 577 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި އޮންނަ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ.
ކައުންޓަރއޮފެންސިވްގައި ޔޫކްރެއިންގެ ފައުޖުތަކަށް ބޮޑެތި ހުރަސްތަކެއް ކުރިމަތިވަމުން ދިޔަ ނަމަވެސް، ޔޫކްރެއިނުން ދަނީ ކޮންމެ ވެސް ވަރެއްގެ ކުރިއެރުންތަކެއް ހޯދަމުންނެވެ. އަދި، އިރުމައްޗާއި ޒަޕޮރީޜިޔާ ހިމެނޭ ސަރަޙައްދުގެ ބައެއް ރަށްތަކާއި އަވަށްތައް ރަޝިޔާ ސިފައިންގެ އަތްދަށުން މިނިވަން ކޮށްފައިވާ ކަން ފާހަގަ ކޮށްލަން ޖެހެއެވެ. އެމެރިކާއިން ދެކެނީ މިއީ ބޮޑު ކުރިއެރުންތަކެއްގެ ގޮތުގައެވެ.