ސޫރިޔާއާ ދެކޮޅަށް ބައިނަލްއަޤުވާމީ މުޖުތަމަޢުން އަޅާފައިވާ ދަތިކުރުމުގެ ފިޔަވަޅުތައް އުވައިލަން ޗައިނާގެ ރައީސް ޝީ ޖިންޕިންގް ގޮވައިލައްވައިފިއެވެ. އޭނާ މި ކަމަށް ގޮވައިލައްވާފައި ވަނީ ސޫރިޔާގެ ރައީސް ބައްޝާރު ހާފިޛް އަލް-އަސަދާ އެކު ބޭއްވެވި ބައްދަލުކުރެއްވުމެއްގައި ވާހަކަފުޅު ދައްކަވަމުންނެވެ.
ޗައިނާގެ އިރުމަތީގައި އޮންނަ ރަށެއް ކަމުގައިވާ ހަންގްޖޯގައި ބޭއްވި ބައްދަލުކުރެއްވުމުގައި ވާހަކަފުޅު ދައްކަވަމުން ޝީ ވަނީ ސޫރިޔާގެ ދާޚިލީ ހަނގުރާމައިގެ ސަބަބުން އެ ޤައުމުގެ ރަށްތައް ސުންނާފަތިވެފައިވާ ކަން ފާހަގަކުރައްވައި، އެ ޤައުމު އަލުން އާރާސްތުކޮށް ބިނާކުރަން ކުރަމުންދާ މަސައްކަތްތަކަށް ބެއިޖިންގުން އެހީތެރިކަން ފޯރުކޮށްދޭނެ ކަމުގައި ވިދާޅުވެފައެވެ.
އަސަދު މިހާރު ޗައިނާއަށް ކުރައްވަމުން ގެންދަވާ ދަތުރުފުޅާ އެކު، ބައިނަލްއަޤުވާމީ މައިދާނަށް އެނބުރި އައުމަށް އޭނާ ކުރައްވަމުން ގެންދަވާ މަސައްކަތްތަކަށް އިތުރު ބާރަކާއި ހިތްވަރެއް ލިބިފައިވާ ކަމުގައި މަސްރަޙު ދިރާސާކުރާ ފަރާތްތަކުން ޤަބޫލު ކުރެއެވެ. އަދި، މެދުރިއުމައްޗަށް ބާރާއި ނުފޫޒު ފޯރުވަން ޗައިނާއިން ކުރަމުންދާ މަސައްކަތްތަކަށް ކުރިއެރުންތަކެއް ލިބިފައިވާ ކަމުގައި ވެސް އެ ފަރާތްތަކުން ދެކެއެވެ. ޗައިނާއިން މިހާރު ވެސް ދަނީ ސަޢޫދީ ޢަރަބިއްޔާގެ އިތުރުން އީރާނާ އެކު ގާތް ގުޅުމެއް ބާއްވަމުންނެވެ.
ޝީއާއި އަސަދުގެ ބައްދަލުވުމާ ގުޅޭ ގޮތުން ޗައިނާގެ ޚާރިޖީ ވުޒާރާއިން ބުނީ، ސޫރިޔާގެ ދާޚިލީ ކަންކަމުގައި ބޭރު ޤައުމުތަކުން ބަސްބުނެ، ނުފޫޒު ފޯރުވުމަކީ ޗައިނާއިން ޤަބޫލުކުރާ ސިޔާސަތެއް ނޫން ކަމުގައެވެ. އަދި، ހުޅަނގުން އިސްވެ ސޫރިޔާގެ ސަރުކާރާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލަން ގޮވައިލާ ކަމުގައެވެ.
ޝީ ވިދާޅުވީ ސޫރިޔާގެ ފުނޑުފުނޑުވެފައިވާ އިޤުތިޞާދު އަލުން އާރާސްތުކޮށް ކޮޅަށް ޖެހުމަށް އަސަދުގެ ސަރުކާރުން ކުރަމުންދާ މަސައްކަތަށް ބެއިޖިންގުން އެހީތެރިކަން ފޯރުކޮށްދޭނެ ކަމުގައެވެ. ސޫރިޔާއާ އެކު އޮތް ގުޅުންތައް ހަރުދަނާ ކުރަން ދެ ބޭފޫޅުން މަޝްވަރާ ކުރައްވާފައިވާއިރު، ޗައިނާގެ ބެލްޓް އެންޑް ރޯޑް އިނިޝިއެޓިވްގައި ސޫރިޔާއިން 2022 ވަނަ އަހަރު ބައިވެރިވެފައިވާ ކަން ފާހަގަކޮށްލަން ޖެހެއެވެ.
އަސަދު ޗައިނާއަށް ވަޑައިގަންނަވާފައި މި ވަނީ ބައިނަލްއަޤުވާމީ މައިދާނުން ސޫރިޔާ އެކަހެރި ކޮށްފައިވާ ދަނޑިވަޅެއްގައެވެ. އެ ޤައުމު އެކަހެރިކޮށްފައި ވަނީ އެ ޤައުމުގެ ދާޚިލީ ހަނގުރާމައާ ގުޅިގެންނެވެ. ސޫރިޔާގެ ދާޚިލީ ހަނގުރާމަ ފެށިގެން ދިޔައީ 2011 ވަނަ އަހަރު އޭނާގެ ސަރުކާރާ ދެކޮޅަށް އެ ޤައުމުގެ ޢާންމު ރައްޔިތުން ފެށި މަދަނީ ބަސްނޭހުމަކުންނެވެ. ސަރުކާރާ ދެކޮޅަށް ކުރަމުންދިޔަ މުޒާހަރާތައް ރޫޅައިލަން އަސަދުގެ ސަރުކާރުން ވަނީ ބާރުގެ ބޭނުންކޮށްފައެވެ.
އެއާއެކު ސޫރިޔާގެ ދާޚިލީ ހަމަނުޖެހުމެއް ފެށި ބޮޑު ހަނގުރާމައަށް ބަދަލުވެގެން ދިޔައެވެ. މި ހަނގުރާމައިގައި މަރުވެފައިވާ މީހުންގެ ޢަދަދު 500,000 އަށްވުރެ އިތުރުވާނެ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ. އަދި، އެތަކެއް މިލިޔަން މީހުންގެ ގެދޮރު ގެއްލި، ރެދިއުޖީންނަށްވިއެވެ.
ސޫރިޔާގެ ދާޚިލީ ހަނގުރާމައަށް ކޮންމެ ވެސް ވަރެއްގެ ފިނިކަމެއް އައިސްފައިވާ މި ދަނޑިވަޅުގައި އަސަދު ގެންދަވަނީ ބައިނަލްއަޤުވާމީ މައިދާނަށް އެނބުރި އަންނަން މަސައްކަތް ކުރަމުންނެވެ. ހަނގުރާމައާ ގުޅިގެން ޢަރަބި ލީގުން ވެސް ސޫރިޔާ އެކަހެރިކޮށްލި ނަމަވެސް، މޭ މަހުގެ ތެރޭގައި ޢަރަބި ލީގުން ވަނީ ސޫރިޔާއަށް އަލުން މަރުޙަބާ ކިޔާފައެވެ.
ސޫރިޔާއަކީ ޗައިނާއަށް ވަރަށް މުހިންމު ޤައުމެކެވެ. އެއް ސަބަބަކީ، ސޫރިޔާގެ އަވައްޓެރިންގެ ގޮތުގައި އިރާޤާއި، ތުރުކީވިލާތާއި އުރުދުން އޮތުމެވެ. ޗައިނާގައި ބޭނުންކުރާ ތެލުގެ 10 އިންސައްތަ ފޯރުކޮށްދެނީ އިރާޤުންނެވެ. ތުރުކީވިލާތަކީ އޭޝިޔާއާއި ވިލާތާ ގުޅުވައިދޭ މައި އިޤުތިޞާދީ މަރުކަޒެވެ. އަދި އުރުދުނަކީ މެދުއިރުމަތީގެ ސުލްޙައާއި ހަމަޖެހުމުގައި އިސް ދައުރެއް އަދާކުރާ ޤައުމެކެވެ.