ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުން ހުއްޓައިލާފައިވާ ކަމުގައި ޕޮލެންޑުން ހާމަކޮށްފިއެވެ. ޕޮލެންޑަކީ ރަޝިޔާއިން ޔޫކްރެއިންގައި ފަށާފައިވާ ހަނގުރާމައިގައި ޔޫކްރެއިނަށް އެންމެ ބޮޑަށް އެހީތެރިކަން ފޯރުކޮށްދެމުންދާ އެއް ޤައުމެވެ. މި ގޮތުން، ޕޮލެންޑުން ވަނީ ޔޫކްރެއިނަށް އަސްކަރީ ގޮތުން އެހީތެރިކަން ފޯރުކޮށްދީ، ގިނަ ޢަދަދެއްގެ ހަތިޔާރު ފޯރުކޮށްދީފައެވެ.
ޕޮލެންޑުން ޔޫކްރެއިނަށް ހަތިޔާރު ފޮނުވުން ހުއްޓައިލާފައި މިވަނީ ގޮވާމުގެ ވިޔަފާރިއާ ގުޅޭ ދެބަސްވުންތަކެއްގައެވެ. ޕޮލެންޑުގެ ބޮޑުވަޒީރު މަތެވުޝް މޮރަވިއެޓްޒްކީ ވިދާޅުވީ ޕޮލެންޑުން މި ވަގުތު އިސްކަން ދެނީ އެ ޤައުމުގެ ސަލާމަތާއި ރައްކާތެރިކަން ކަށަވަރު ކުރުމަށް ކަމުގައެވެ. އަދި، ޤައުމުގެ ދިފާޢުގައި ޒަމާނީ ހަތިޔާރު ހޯދުމަށް ކަމުގައެވެ.
ޕޮލެންޑުގެ ދިފާޢުގައި މަސައްކަތް ކުރަން އިސްކަންދޭ ކަމުގައި މޮރަވިއެޓްޒްކީ ވިދާޅުވެފައި މި ވަނީ، ޔޫކްރެއިނާ ދެމެދު އުފެދިފައިވާ ދެބަސްވުންތައް އިތުރަށް ހޫނުވެފައިވާ ދަނޑިވަޅެއްގައެވެ. ޕޮލެންޑުން މީގެ ކުރިން ޔޫކްރެއިނަށް ފޮނުވާފައިވާ ބައެއް ހަތިޔާރުގެ ތެރޭގައި 320 އަސްކަރީ ޓޭންކާއި "މިގް-29" މަރުކާގެ 14 އަސްކަރީ މަތިންދާބޯޓު ހިމެނެއެވެ. އެއީ، ކުރީގެ ރޫސީ ވިލާތުގެ ޒަމާނުގައި އުފައްދާފައިވާ ހަތިޔާރުތަކެކެވެ.
ޔޫކްރެއިންގައި ހައްދާ ގޮވާމުގެ ބާވަތްތައް އެތެރެކުރުން ޕޮލެންޑާއި ހަންގެރީގެ އިތުރުން ސްލޮވާކިޔާއިން ވަނީ މަނާކޮށްފައެވެ. އ.ދގެ ޢާންމު މަޖިލީހުގެ 78ވަނަ ޖަލްސާގައި ދާދިފަހުން ތަޤުރީރު ކުރައްވަމުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވަނީ މި ކަމާ މެދު ކަންބޮޑުވުން ފާޅު ކުރައްވާފައެވެ. އޭނާ ވިދާޅުވީ، ޔޫކްރެއިނަށް ތާޢީދުކުރާ ކަމަށް ފާޅުގައި ބުނެ، އެ ކަމާ ދެކޮޅަށް ޕޮލެންޑާއި ހަންގެރީ އަދި ސްލޮވާކިޔާއިން މަސައްކަތް ކުރަމުންދާ ކަމުގައެވެ.
ޒެލެންސްކީގެ ބަސްފުޅުތަކާ ގުޅިގެން ޕޮލެންޑުން ވަނީ އެ ޤައުމުގައި ހުންނަވާ ޔޫކްރެއިންގެ ސަފީރު ހާޒިރުކޮށް ސުވާލުކޮށްފައެވެ. ޕޮލެންޑުން ބުނީ ޒެލެންސްކީގެ ވާހަކަފުޅު ބަލައިގަންނަން ދަތި ކަމުގައެވެ. އަދި، ރަޝިޔާ-ޔޫކްރެއިން ހަނގުރާމައިގެ އެންމެ ފުރަތަމަ ދުވަހުން ފެށިގެން ވެސް ޕޮލެންޑުން ޔޫކްރެއިނަށް އެހީތެރިކަން ފޯރުކޮށްދެމުން ގޮސްފައިވާނެ ކަމުގައެވެ.
މި ކަމާ ގުޅޭ ގޮތުން މޮރަވިއެޓްޒްކީ ވިދާޅުވީ ރަޝިޔާގެ އިސްތިޢުމާރީ ހަނގުރާމައާ އޭނާގެ ސަރުކާރުން ދެކޮޅު ކަމުގައެވެ. ނަމަވެސް، ޔޫކްރެއިނުގައި އުފައްދާ ގޮވާމުގެ ބާވަތްތައް އެތެރެ ކޮށްގެން ޕޮލެންޑުގެ ބާޒާރަށް ލޮޅުންތަކެއް އައުމުގެ ފުރުޞަތު ދޭން އޭނާ ބޭނުންފުޅުވެ ވަޑައިނުގަންނަވާ ކަމުގައެވެ.
ރަޝިޔާ-ޔޫކްރެއިން ހަނގުރާމައިގައި ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުމުގެ ގޮތުން ޕޮލެންޑުން ވަނީ އެ ޤައުމުގެ އަސްކަރިއްޔާގެ ހަތިޔާރު ސްޓޮކްގެ ތިންބައިކުޅަ އެއްބައި ޔޫކްރެއިނަށް ފޮނުވާފައެވެ. ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުން ހުއްޓައިލާފައިވީ ނަމަވެސް، އެ ޤައުމުގައި އުފައްދާ ބައެއް ބާވަތްތަކުގެ ހަތިޔާރު ޔޫކްރެއިނަށް ފޮނުވުމުގައި ދެމިއޮންނާނެ ކަމުގައި މޮރަވިއެޓްޒްކީ ވިދާޅުވިއެވެ.
ރަޝިޔާ-ޔޫކްރެއިން ހަނގުރާމަ ފެށުމާ އެކު ރަޝިޔާއިން ވަނީ ޔޫކްރެއިންގެ ބަނދަރުތައް ބަންދުކޮށްފައެވެ. އަދި، ގޮވާމުގެ ބާވަތްތައް އެކްސްޕޯޓު ކުރުމަށް ހުރަސް އަޅާފައެވެ. މި ކަމާ ގުޅިގެން ޔޫކްރެއިނުން ވަނީ އެ ޤައުމުގައި އުފައްދާ ގޮވާމުގެ ބާވަތްތައް ވިލާތުގެ ޤައުމުތަކަށް އެކްސްޕޯޓު ކުރުން އިތުރު ކޮށްފައެވެ.
ނަމަވެސް، ވިލާތުގެ ބައެއް ޤައުމުތަކުގެ ބާޒާރުގައި ގޮވާމުގެ ބާވަތްތަކުގެ އަގުތައް ވެއްޓި، އެ ޤައުމުތަކުގެ ދަނޑުވެރިންނަށް ގެއްލުން ލިބެން ފެށުމާ އެކު ވިލާތުގެ އިއްތިހާދު (އީ.ޔޫ)ން ވަނީ ބައެއް ޤައުތަކަށް ޔޫކްރެއިންގެ ގޮވާން އެތެރެކުރުން މަނާކޮށްފައެވެ. އެ ޤައުމުތަކުގެ ތެރޭގައި ބަލްގޭރިޔާ، ހަންގެރީ، ޕޮލެންޑް، ރޮމޭނިޔާ އަދި ސްލޮވާކިޔާ ހިމެނެއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 576 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ.
އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.