ދެކުނު ކޮރެޔާގެ ފުލުހުން ހިންގަމުންދާ ޚާއްޞަ އޮޕަރޭޝަނެއްގެ ދަށުން މަސްތުވާތަކެތީގެ ވިޔަފާރި ކުރާ އަދި އެ ތަކެތި ބޭނުން ކުރާ އެމެރިކާ ސިފައިންގެ 17 މީހެއްގެ މައްސަލަ ތަހުޤީޤު ކުރަން ފަށައިފިއެވެ. މި ކަމުގެ ތުހުމަތުގައި އިތުރު ފަސް މީހެއްގެ މައްސަލަ ބަލަމުންދާ ކަމުގައި ދެކުނު ކޮރެޔާގެ ފުލުހުން ހާމަކުރެއެވެ.
މި ތަހުޤީޤުގެ ދަށުން ދެކުނުގެ ފުލުހުން ވަނީ އެ ޤައުމުގައި ހުންނަ އެމެރިކާގެ އަސްކަރީ މަރުކަޒުތަކަށް ރޭޑު ޖަހާފައެވެ. އޭގެ ތެރޭގައި ކޭމްޕް ހަމްފްރީސް އަދި ކޭމްޕް ކޭސީ ހިމެނެއެވެ. ހަމްފްރީސްއަކީ އެމެރިކާއިން ބޭރުގައި އޮންނަ އެ ޤައުމުގެ އެންމެ ބޮޑު އަސްކަރީ މަރުކަޒެވެ. ދެކުނު ކޮރެޔާއަށް މަސްތުވާތަކެތި އެތެރެކޮށްފައި ވަނީ އަސްކަރީ ޕޯސްޓު މެދުވެރިކޮށް ކަމަށް ބެލެވެއެވެ.
މި ތަހުޤީޤުގެ ދަށުން މިހާތަނަށް ދެ މީހަކު ހައްޔަރު ކޮށްފައިވާ ކަމުގައި ދެކުނު ކޮރެޔާގެ ފުލުހުން ބުނެއެވެ. އޭގެ ތެރޭގައި ހިމެނެނީ ދެކުނުގެ ރައްޔިތަކާއި ފިލިޕީންސްގެ ރައްޔިތެކެވެ. މި މައްސަލައިގެ ތަހުޤީޤުގައި އެމެރިކާގެ އަސްކަރިއްޔާގެ ޖިނާޢީ ތަޙުޤީޤީ އިދާރާ ކަމުގައިވާ ޔޫ.އެސް އާމީސް ކްރިމިނަލް އިންވެސްޓިގޭޝަން ޑިވިޜަނުން ދަނީ އެހީތެރިކަން ފޯރުކޮށްދެމުންނެވެ.
ދެކުނު ކޮރެޔާގައި ހުންނަ އެމެރިކާގެ އަސްކަރީ މަރުކަޒުތަކުގައި މަސްތުވާތަކެތީގެ ވިޔަފާރިކޮށް، އެ ތަކެތި ބޭނުން ކުރަމުންދާ ކަމުގައި ރިޕޯޓު ދެކުނު ކޮރެޔާގެ ފުލުހުންނަށް ކޮށްފައި ވަނީ އެމެރިކާގެ އަސްކަރިއްޔާގެ ތަހުޤީޤީ އިދާރާއިންނެވެ. މި ތަހުޤީޤުގެ ދަށުން އަސްކަރީ މަރުކަޒުތަކަށް ރޭޑު ޖަހައި، މަސްތުވާތަކެތީގެ ބާވަތެއް ކަމުގައިވާ ސިންތެޓިކް ކެނިބިސްގެ 77 ގްރާމާއި، ވޭޕް ކުރަން ބޭނުންކުރާ "މިކްސްޑް ލިކުއިޑްސް"ގެ 4 ކިލޯ ފެނިފައިވާ ކަމުގައި ދެކުނުގެ ފުލުހުން ހާމަކުރެއެވެ.
މި މައްސަލައިގައި ތުހުމަތު ކުރެވޭ 22 މީހުން ދިރިއުޅޭ ގެދޮރު ބަލައިފާސްކޮށްފައިވާއިރު، އެއިން އެއް ގެއިން ގިނަ ޢަދަދެއްގެ ފައިސާ ފެނިފައިވާ ކަމުގައި ވެސް ދެކުނުގެ ފުލުހުން ހާމަކުރެއެވެ. އޭގެ ތެރެއިން ހަތް މީހުންނަކީ މަސްތުވާތަކެތީގެ ވިޔަފާރި ކުރާ މީހުން ކަމަށާއި، 12 މީހުންނަކީ އެ ތަކެތި ބޭނުން ކުރާ މީހުން ކަމުގައި ވެސް ފުލުހުން ވިދާޅުވިއެވެ. މި މައްސަލައިގައި އެމެރިކާ ސިފައިންގެ މީހެއްގެ އަންބަކާއި އެހެން ސިފައިންގެ މީހެއްގެ ޕާޓްނަރުގެ މައްޗަށް ވެސް ތުހުމަތު ކުރެވެއެވެ.
މި މައްސަލައިގައި ހިމެނޭ އެމެރިކާ ސިފައިންގެ މީހުން މިހާރު ވެސް ތިބީ ކޭމްޕް ހަމްފްރީސް އަދި ކޭމްޕް ކޭސީގައެވެ. މި މައްސަލައާ ގުޅިގެން އެ މީހުން ހައްޔަރު ކޮށްފައި ނުވާ ކަމުގައި ދެކުނު ކޮރެޔާގައި ހަރަކާތްތެރިވާ އެމެރިކާ ސިފައިންގެ އިދާރާ، ޔުނައިޓެޑް ސްޓޭޓްސް ފޯރސަސް ކޮރެޔާއިން ހާމަކުރެއެވެ.
ދެކުނު ކޮރެޔާގެ ޤާނޫނުގައިވާ ގޮތުގެ ދަށުން އެ ޤައުމަށް މަސްތުވާތަކެތީގެ ބާވަތެއް ކަމުގައިވާ މެރުވާނާ އެތެރެ ކުރުމުގެ ކުށުގެ އަދަބަކީ ފަސް އަހަރާއި އުމުރު ދުވަހާ ދެމެދު މުއްދަތަކަށް ޖަލަށްލުމެވެ. މަސްތުވާކެތިގެ ގެންގުޅުމުގެ ކުށުގެ އަދަބަކީ ވެސް އެއީއެވެ. ނުވަތަ 37,200 އެމެރިކާ ޑޮލަރުން ޖޫރިމަނާ ކުރުމެވެ.