ކުރިއަށް އޮތް ފިނިމޫސުމާ ދިމާކޮށް ރަޝިޔާއިން ޔޫކްރެއިންގެ އިންޖީނުގެތަކާއި ކަރަންޓުގެ ޚިދުމަތް ދިނުމަށް ބޭނުންކުރާ ވަސީލަތްތަކަށް ހަމަލަދޭން ފަށައިފިއެވެ. ރަޝިޔާއިން އެންމެ ފަހުން ދީފައިވާ ހަމަލަތަކުގެ ތެރެއިން ގިނަ ހަމަލަތައް އަމާޒުކޮށްފައި ވަނީ ވެރިރަށް ކީވަށެވެ. މި ހަމަލަތަކުގައި 18 މީހަކު ޒަޚަމުވި ކަމުގައި ޔޫކްރެއިނުން ބުނެއެވެ.
ރަޝިޔާގެ ހަމަލަތަކުގައި އިންޖީނުގެތަކާއި ކަރަންޓުގެ ޚިދުމަތް ދިނުމަށް ބޭނުންކުރާ ގިނަ ވަސީލަތްތަކަށް ބޮޑެތި ގެއްލުންތަކެއް ލިބުނު ކަމުގައި ޔޫކްރެއިނުން ބުނެއެވެ. އަދި، އެ ޤައުމުގެ ހުޅަނގާއި އިރުމަތީގެ އިތުރުން މެދުތެރޭގައިވާ ފަސް ސަރަޙައްދަކުން ކަރަންޓުގެ ޚިދުމަތް މެދުކެނޑުނެވެ. އޭގެ ތެރޭގައި ރީވްމެންސްކާ، ޜިތޯމިރް، ކީވް، ދްނީޕްރޯޕެތްރޯވްސްކާ އަދި ޚަރްކިވްގެ ސަރަޙައްދުތައް ހިމެނެއެވެ.
ހުސްވި އަހަރުގައި ވެސް ފިނީމޫސުމާ ދިމާކޮށް ރަޝިޔާއިން ވަނީ ޔޫކްރެއިންގެ އިންޖީނުގެތަކާއި ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށް ވަރުގަދަ ހަމަލަތަކެއް ދީފައެވެ. އެ ހަމަލަތަކާ ގުޅިގެން ޔޫކްރެއިންގެ ގިނަ ޢަދަދެއްގެ ބަޔަކު ކަރަންޓުގެ ޚިދުމަތުން މަހުރޫމްވިއެވެ.
ޔޫކްރެއިންގެ އަސްކަރިއްޔާގެ ކޮމާންޑަރ-އިން-ޗީފް ވަލޭރީ ޜަނޫޜްނީ ވިދާޅުވީ ޔޫކްރެއިންގެ ކަރަންޓު ވިއުގައަށް ހަމަލަދޭން ރަޝިޔާއިން 43 ކްރޫޒް މިސައިލް ހަމަލަ ދީފައިވާ ކަމުގައެވެ. އަދި، އޭގެ ތެރެއިން 36 މިސައިލް ދިފާޢުކޮށް ވައްޓައިލާފައިވާނެ ކަމުގައެވެ.
ކީވްގެ މޭޔަރު ވިތާލީ ކްލިޗްކޯ ވިދާޅުވީ ރަޝިޔާއިން އެ ރަށަށް ދިން ހަމަލަތަކުގައި ހަތް މީހުން ޒަޚަމުވި ކަމަށާއި، އޭގެ ތެރޭގައި ނުވަ އަހަރުގެ ކުޑަ އަންހެން ކުއްޖެއް ވެސް ހިމެނޭ ކަމުގައެވެ. އަދި، ޢާންމުން ދިއިރުޅޭ ބައެއް ޢިމާރާތްތަކަށް ވެސް ގެންލުން ލިބުނު ކަމަށާއި، ބައެއް ތަންތަނުގައި އަލިފާން ރޯވި ކަމުގައި ވެސް އޭނާ ވިދާޅުވިއެވެ.
ދާޚިލީ ވަޒީރު އީހޯރް ކްލިމެންކޯ ވިދާޅުވީ ކީވަށް ދިން ހަމަލަތަކުގައި ހޮޓަލަކަށް ގެއްލުން ލިބުނު ކަމުގައެވެ. އަދި، ރަޝިޔާގެ ހަމަލަތަކުގައި ޒަޚަމުވި ގިނަ ޢަދަދެއްގެ ބަޔަކު ހޮސްޕިޓަލުގައި އެޑްމިޓު ކޮށްގެން ފަރުވާދޭން ޖެހުނު ކަމުގައެވެ. ރަޝިޔާގެ ހަމަލަތައް ލްވީވަށް އަމާޒުކޮށްފައިވާ ކަމުގައި ވެސް އެ ރަށުގެ މޭޔަރު މަކްސިމް ކޮޒިޓްސްކީ ވިދާޅުވިއެވެ.
ސެޕްޓެންބަރު 20 ވަނަ ދުވަހު ވެސް ރަޝިޔާއިން ވަނީ ޚަރްސަނަށް ވަރުގަދަ މިސައިލް ހަމަލަތަކެއް ދީފައެވެ. މި ހަމަލަތަކުގައި ޢާންމުންގެ ދެ މީހަކު މަރުވި ކަމުގައި އެ ސަރަޙައްދުގެ ގަވަރުނަރު އޮލެކްސާންދްރަ ޕްރޮކުދިން ވިދާޅުވިއެވެ. ރަޝިޔާގެ ހަމަލަތައް ދީފައި މި ވަނީ، އެ ޤައުމުގެ އިސްތިޢުމާރީ ސިފައިންނާ ދެކޮޅަށް ޔޫކްރެއިނުން ފަށާފައިވާ ވަރުގަދަ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނުގައި ކުރިއެރުންތަކެއް ހޯދަމުންދާ ދަނޑިވަޅެއްގައެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 575 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ.
އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.