އަންނަ މަހު ކިރްގިސްތާންގައި ބާއްވާ ފުޓްސަލް އޭޝިއަން ކަޕް ކޮލިފައިންގައި ވާދަކުރާ ގައުމީ ފުޓްސަލް ޓީމުގެ ފައިނަލް ސްކޮޑުގައި ހިމެނޭ 14 ކުޅުންތެރިން އިއުލާނުކޮށްފިއެވެ.
އެންމެ ފުރަތަމަ 40 ކުޅުންތެރިންނާއެކު ޕްރިލިމިނަރީ ސްކޮޑެއް އެކުލަވާލިއިރު އޭގެ ފަހުން ޕްރެކްޓިސްތަކެއް ކުރުމަށް ފަހު ސްކޮޑު ވަނީ 20 އަށް ކުޑަކޮށްފައެވެ. އަންނަ މަހު ކޮލިފައިންގައި ވާދަކުރަން ނަގާ 14 ކުޅުންތެރިންގެ ސްކޮޑު ފައިނަލްކޮށްފައިވާއެކު މި ސްކޮޑުގައި ފާހަގަކޮށްލެވޭ ގިނަ ކުޅުންތެރިންތަކެއް އެބަތިއްބެވެ.
ގައުމީ ފުޓްސަލް ސްކޮޑުގައި މިފަހަރު ހިމެނުނު ކުޅުންތެރިންނަކީ މުހައްމަދު އިމްރާނާއި ސާމިން މުހައްމަދު ނަސީރާއި އަލީ ހާފިޒްްގެ އިތުރުން ހުޒައިފަތު ރަޝީދު،ހުސެއިން ޝަރީފް، އަބްދުﷲ ޝާފިއު، އިޝާން އިބްރާހިމް، ހުސެއިން ސުހައިލް، އިސްމާއިލް ވަޖީހު، ޔާމީން މުހައްމަދު، އަލީ ޝިޔާހު، އަލީ މާއިސް، ޒައިދާން އަހުމަދު، ފައްޔާޒް ފަޔާޒެވެ.
ގައުމީ ފުޓްސަލް ޓީމުގެ ހެޑް ކޯޗަކީ އަބްދުﷲ ނަސީރު (އަބޯ) އެވެ. އެސިސްޓަންޓް ކޯޗުންގެ ގޮތުގައި އަހުމަދު ވިޝާލް އާއި އަހުމަދު ތޯހާ ހުރިއިރު، ގޯލްކީޕަރު ޓްރެއިނަރަކީ އިބްރާހިމް އަހުމަދު އެވެ. އޮފިޝަލަކަށް އަހުމަދު ޝަހުމް މުހައްމަދު ހުރިއިރު، ޓީމުގެ މެނޭޖަރަކީ އަލީ ނަދީމް (ކޮކޯ) އެވެ.
ފުޓްސަލް އޭޝިއަން ކަޕް ކޮލިފައިންގައި ރާއްޖޭން އަންނަ މަހު ހަތް ވަނަ ދުވަހު ކުޅޭނީ އީރާންއާ އެވެ. އޭގެ އެއް ދުވަސް ފަހުން ދެ ވަނަ މެޗުގައި ލެބަނަންއާ ބައްދަލުކުރުމަށް ފަހު، ތިން ވަނަ މެޗުގައި 11 ވަނަ ދުވަހު ކުޅެން ޖެހެނީ ކިރްގިސްތާންއާ އެެވެ.