ސަރުކާރުގެ ކަމާބެހޭ ގުޅޭ އިދާރާތަކުން އެއްރޫޙެއްގައި މަސައްކަތް ނުކުރުމުގެ ސަބަބުން، އިޖްތިމާއީ ރައްކާތެރިކަން ކަށަވަރު ކުރުމަށް ކުރަމުންދާ މަސައްކަތްތަކުގައި، އަދި ކަންކަން ތަންފީޒް ކުރުމުގައި ގޮންޖެހުންތަކާއި ކުރިމަތިވަމުންދާކަމަށް އެޓާނީ ޖެނެރަލް މުޙައްމަދު އަނިލް ވިދާޅުވެއްޖެއެވެ.
"އިޖްތިމާޢީ ރައްކާތެރިކަން އެންމެންނަށް" އަދި ބޮޓްލް ނެކް އެނަލައިސިސް ޕްރޮގްރާމާއި ބެހޭ ގޮތުން އެފް.ސީ.އެސް.ސީ މެނޭޖަރުންނަށް މިހާރު ކުރިޔަށްގެންދާ އޮރިއެންޓޭޝަން ޕްރޮގްރާމް ފެއްޓެވުމުގެ ގޮތުން ދެއްވި ބަޔާނުގައި، އެޓަރނީ ޖެނެރަލް މުޙައްމަދު އަނިލް ވިދާޅުވީ، "އިޖްތިމާއީ ޕްރޮގްރާމް އެންމެންނަށް" ނަމުގައި މި ޕްރޮގްރާމް ފެށިއިރު ވަރަށް ބޮޑެތި ގޮންޖެހުންތަކެއް ހުރި ކަމަށާއި، އެހެންނަމަވެސް ގޮންޖެހުންތަކާއިއެކުވެސް ޕްރޮގްރާމް ކުރިޔަށް ގެންދިއުމަށް ސަރުކާރުން ނިންމެވީ، އިޖްތިމާއީ މައްސަލަތައް ޙައްލު ކުރެވެން އޮތް ހަމައެކަނި ގޮތަކީ މި ފަދަ ޕްރޮގްރާމެއް ކުރިޔަށް ގެންގޮސްގެން ކަމުގައި ފެންނާތީ ކަމަށެވެ.
މި ބައްދަލުވުމުގައި ވާހަކަފުޅު ދައްކަވަމުން ޔުނިސެފްގެ ޕްރޮގްރާމް ސްޕެޝަލިސްޓް މުޙައްމަދު ނަޢީމް ވިދާޅުވީ، އިޖްތިމާއީ މައްސަލައެއް ދިމާވާހިނދު ކުއްޖާ، ނުވަތަ އެމީހަކު ޢާއިލާއި އެކަހެރިކުރުމަކީ އެންމެ އެދެވޭ ގޮތް ނޫންކަން ދިރާސާތަކުން ދައްކާ ކަމަށާއި، މީގެ އެންމެ އެދެވިގެންވާ ގޮތަކީ، ގޭގޭ މާޙައުލުގައި ތިބެ، ކޮމިއުނިޓީ ގްރޫޕްސްތަކުގެ އެހީގައި އެފަދަ ފަރާތްތަކައް އެހީތެރިވެދިނުން ކަމަށެވެ.
މިއަދު "އިޖްތިމާޢީ ރައްކާތެރިކަން އެންމެންނަށް" އަދި ބޮޓްލް ނެކް އެނަލައިސިސް ޕްރޮގްރާމާއި ބެހޭ ގޮތުން އެފް.ސީ.އެސް.ސީ މެނޭޖަރުންނަށް މިހާރު ކުރިޔަށްގެންދާ އޮރިއެންޓޭޝަން ޕްރޮގްރާމްގައި ބައިވެރިވެފައިވަނީ ތައްލީމީ، ޞިއްހީ އަދި ތަންފީޒީ އިދާރާތަކުގެ ބޭފުޅުންނެވެ.