މާޒިޔާއާއި ދެކޮޅަށް ކުޅުނު މެޗުން ބަލިވީ ހެދުނު ގޯސްތަކުގެ ސަބަބުން ކަމަށާއި އޭގެ ސަބަބުން މެޗު އަތުން ދޫވެގެންދިޔަ ކަމަށް ބަންގްލަދޭޝްގެ ޗެމްޕިއަން ބަޝުންދުރަ ކިންގްސްގެ ކޯޗު ސްޕެއިންގެ އޮސްކާ ބްރުޒޮން ބުނެފިއެވެ.
މިއީ އޭއެފްސީ ކަޕުގައި މާޒިޔާ އަތުން ބަޝުންދުރަ ކިންގްސް ބަލިވި ފުރަތަމަ ފަހަރެވެ. މީގެ ކުރިން މި ދެޓީމު ވާދަކުރި ދެ ފަހަރު ބަޝުންދުރަ އިން ވަނީ މާޒިޔާ ބަލިކޮށްފައެވެ.
މާޒިޔާއާއި ދެކޮޅަށް އަމިއްލަ ދަނޑުގައި 3-1 އިން ބަލިވި މެޗަށްފަހު ވާހަކަދައްކަމުން އޮސްކާ ބުނީ ބޭނުންވި ގޮތަށް މެޗު ކޮންޓްރޯލް ކޮށްގެން ކުޅުނު ނަމަވެސް އެޓޭކުގައި ބޭނުންވި ވަރުގެ ކުޅުމެއް ނުދެއްކުނު ކަމަށެވެ. އަދި ބަޝުންދުރަ ހުއްޓުވުމުގައި މާޒިޔާ އިން ވަރަށް ރަނގަޅަށް ކުޅުނު ކަމަށާއި، އެ ޓީމުގެ އެޓޭކުގައި ރަނގަޅަށް ނުކުޅެވުނީ މާޒިޔާއިން ރަނގަޅަށް ޑިފެންސް ކުރުމުން ކަމަށް ބުންޏެވެ.
އޮސްކާ ބުނީ މުޅި މެޗުގައިވެސް ހަމައެކަނި މައްސަލައަކަށްވީ އެކަށީގެންވާ ހަމަލާތައް ނުއުފެއްދި، ލިބުނު މަދު ފުރުސަތުތަކުގެ ބޭނުން ނުކުރެވުން ކަމަށެވެ.
މުބާރާތުގައި މާޒިޔާ ހިމެނޭ ގްރޫޕުގައި ދެން ހިމެނެނީ ބަޝުންދުރަ ކިންގްސްގެ އިތުރުން އިންޑިއާގެ މޯހަން ބަގާން އާއި އޮޑިޝާ އެފްސީއެވެ.