ރަޝިޔާއިން ރަހީނުކޮށްފައިވާ ޔޫކްރެއިންގެ ކުޑަކުދިން މިނިވަންކުރުމަށް ޔޫކްރެއިންގެ ރައީސްގެ އަނބިކަނބަލުން އޮލޭނާ ޒެލެންސްކާ ގޮވައިލައްވައިފިއެވެ. އެމެރިކާގެ ނިއު ޔޯކްގައި މިހާރު ކުރިއަށްދާ އ.ދގެ ޢާންމު މަޖިލީހުގެ 78 ވަނަ ބައްދަލުވުމުގެ ހަވާސާގައި ވާހަކަފުޅު ދައްކަވަމުން ޒެލެންސްކާ ވިދާޅުވީ ރަޝިޔާއިން ރަހީނުކޮށްގެން ގެންގޮސްފައިވާ ޔޫކްރެއިންގެ ކުޑަކުދިން ޢަދަދު 19,000 އަށްވުރެ އިތުރުވާނެ ކަމުގައެވެ.
އޭނާ މި ކަން ހާމަކުރައްވާފައި މި ވަނީ، ޔޫކްރެއިންގެ ގިނަ ޢަދަދެއްގެ ކުޑަކުދިންތަކެއް ފެންނަ ފޮޓޯތަކެއް ބެލަރޫސްގެ ދަޢުލަތުގެ މީޑިޔާއިން ޢާންމު ކޮށްފައިވާ ދަނޑިވަޅެއްގައެވެ. އެ ފޮޓޯތަކުން ފެންނަނީ، ރަޝިޔާގެ އަތްދަށުގައި އޮތް ޔޫކްރެއިންގެ ސަރަޙައްދުތަކަށް ނިސްބަތްވާ ކުޑަކުދިންތަކެއް ބެލަރޫސްއަށް ގެންދާ މަންޒަރެވެ.
ބެލަރޫސްއަށް 48 ކުދިން ދަތުރު ކޮށްފައިވާ ކަމުގައި އެ ޤައުމުގެ ދަޢުލަތުގެ މީޑިޔާ ބެލްތާއިން ބުނެއެވެ. އެއީ ދޮނެޓްސްކާއި، ލުހާންސްކް އަދި ޒަޕޮރީޜިޔާއަށް ނިސްބަތްވާ ކުދިން ކަމުގައި ވެސް އެ ތަނުން ރިޕޯޓު ކުރެއެވެ. އެއީ، ރަޝިޔާގެ އިސްތިޢުމާރީ ސިފައިން އަތްގަދަ ކޮށްފައިވާ ސަރަޙައްދުތަކެވެ.
ޒެލެންސްކާ ވިދާޅުވީ، ރަޝިޔާގެ އިސްތިޢުމާރީ ސިފައިން އަތްގަދަ ކޮށްފައިވާ ސަރަޙައްދުތަކަށް ނިސަބަތްވާ ކުޑަކުދިން، އެ ކުދިންނާއި އެ ކުދިންގެ މައިންބަފައިންގެ ރުހުމާއި ހުއްދައާއި ނުލައި، ރަހީނުކޮށްގެން ރަޝިޔާއަށް ގެންދަމުންދާ ކަމުގައެވެ. މި ގޮތަށް ގެންގޮސްފައިވާ ކުދިންގެ ޢަދަދު މިހާރު 19,000 އަށްވުރެ މައްޗަށް އަރާއިރު، އޭގެ ތެރެއިން އަނބުރާ ޤައުމަށް ގެނެވިފައި ވަނީ އެންމެ 386 ކުދިން ކަމުގައި ވެސް އޮލޭނާ ވިދާޅުވިއެވެ.
"ރަހީނުކޮށްގެން ގެންދާ ކުދިންނަށް ރަޝިޔާގެ ސިފައިން ވިސްނައިދެނީ އެ ކުދިންގެ ޢާއިލާތަކުން އެ ކުދިން ބޭނުން ނުވާ ކަމަށް. އެއީ ޔޫކްރެއިނަށް ނިސްބަތްވާ ކުދިން ނޫން ކަމަށް. އަދި، މިހާރު އެއީ ރަޝިޔާގެ ރައްޔިތުން ކަމަށް،" ޒެލެންސްކާ ވިދާޅުވިއެވެ.
ކުޑަކުދިން ރަހީނުކުރުމަކީ ހަނގުރާމައިގެ ކުށެއް ކަމުގައިވީ ހިނދު، ޔޫކްރެއިންގެ ގިނަ ޢަދަދެއްގެ ކުޑަކުދިންތަކެއް ރަހީނުކުރުމުގައި ބައިވެރިވުމުގެ ތުހުމަތުގައި ރަޝިޔާގެ ރައީސް ވްލަޑިމިޔަރ ޕުޓިން ހައްޔަރު ކުރުމަށް ބައިނަލްއަޤުވާމީ ޖިނާޢީ ކޯޓުން ވަނީ އަމުރު ނެރެފައެވެ. އިންޓަރނޭޝަނަލް ކްރިނިމަލް ކޯޓު (އައި.ސީ.ސީ)ން ޕުޓިންއާ ދެކޮޅަށް އަމުރު ނެރެފައި ވަނީ މާރިޗު މަހުއެވެ.
މި ގޮތަށް ޔޫކްރެއިންގެ ކުޑަކުދިން ރަހީނުކޮށްގެން ގެންދިޔުމަކީ "ގަތުލުއާންމެއް"ގެ ގޮތުގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ސިފަކުރައްވައެވެ. ނަމަވެސް، ރަޝިޔާއިން ބުނީ އެއީ ހަނގުރާމައިގެ މައިދާނުން ސަލާމަތް ކޮށްފައިވާ ކުދިންތަކެއް ކަމުގައެވެ.
މީގެ 19 މަސް ދުވަސް ކުރިން ޔޫކްރެއިންގައި ފެށި ހަނގުރާމައިގައި މިހާތަނަށް 500 އަށްވުރެ ގިނަ ކުދިން މަރުވެފައިވާ ކަމަށް ބެލެވެއެވެ. އަދި، އެތަކެއް ސަތޭކަ ކުދިން ޒަޚަމުވެފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ޔޫކްރެއިންގެ ޢާންމުން ރައްޔިތުންނާއި ކުޑަކުދިންނަށް ޖިންސީ އަނިޔާކޮށްފައިވާ މައްސަލަތައް ތަހުޤީޤު ކުރަމުންދާ ކަމުގައި ވެސް ޒެލެންސްކާ ވިދާޅުވިއެވެ. މި ފަދަ 230 މައްސަލައެއް ތަހުޤީޤު ކުރަމުންދާއިރު، އޭގެ ތެރޭގައި ކުޑަކުދިންނަށް ޖިންސީ އަނިޔާ ކުރުމުގެ 13 މައްސަލަ ހިމެނޭ ކަމުގައި ވެސް އޭނާ ވިދާޅުވިއެވެ. އޭގެ ތެރޭގައި ހިމެނެނީ 12 އަންހެން ކުދިންނާއި އެއް ފިރިހެން ކުއްޖެކެވެ. އޭގެ ތެރެއިން އެންމެ ހަގު ކުއްޖާގެ އުމުރަކީ ހަތަރު އަހަރެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައަށް 574 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ.
އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.