ސެޕްޓެންބަރު 8 ވަނަ ދުވަހު މަޣްރިބަށް އައި ބާރުގަދަ ބިންހެލުމުގައި މަރުވި މީހުންގެ ޢަދަދު 3,000 އަށް އެރުމާ ގާތްވެފައިވާ ކަމުގައި އެ ޤައުމުން ހާމަކޮށްފިއެވެ. ބިންހެލުމުގައި ގިނަ ޢަދަދެއްގެ ގެދޮރާއި ޢިމާރާތްތައް ވެއްޓިފައިވާއިރު، ޢިމާރާތްތަކުގެ ދަށުގައި އެތަކެއް ސަތޭކަ ބަޔަކު ތާށިވެފައިވާ ކަމަށް ބެލެވެއެވެ. އެ މީހުން ހޯދުމުގެ މަސައްކަތް ހުއްޓުމެއް ނެތި ކުރަމުންދާއިރު، މަރުވެފައިވާ އިތުރު މީހުންގެ ހަށިތައް ދަނީ ފެންނަމުންނެވެ.
ރިކްޓަރ މިންގަނޑުން 6.8ގައި ރެކޯޑު ކުރެވިފައިވާ ބިންހެލުން އައިސްފައި ވަނީ މަރާކިޝްގެ ހުޅަނގުދެކުނުން ހައި އެޓްލަސް ފަރުބަދަ އޮންނަ ސަރަޙައްދަށެވެ. ބިންހެލުމުގައި އެންމެ ބޮޑަށް ގެއްލުން ލިބިފައި ވަނީ މަރާކިޝާއި، އަލް-ޙައުޒާއި، ވަރްޒާޒާތާއި، އަޒީލާލާއި، ޝީޝާވަތު އަދި ތަރޫދާނަށެވެ.
ބިންހެލުމުގައި ސުންނާފަތިވެފައިވާ ސަރަޙައްދުތަކުގައި ހާލުގައި ޖެހިފައިވާ މީހުންގެ ޢަދަދު އެތަކެއް ހާހަކަށް އަރާ ކަމުގައި އޮފިޝަލުން ވިދާޅުވެއެވެ. އެ މީހުންނަށް ކާބޯތަކެއްޗާއި ޓެންޓު ފަދަ ތަކެތި ފޯރުކޮށްދޭން މިހާރު ދަނީ މަސައްކަތް ކުރަމުންނެވެ. އެ ތަކެތި ބަރުކޮށްފައިވާ އުޅަނދުތައް، އެ ރަށްތަކަށް ދަތުރު ފަށާފައިވާ ކަމުގައި މަޣްރިބުގެ ސަރުކާރުން ބުނެއެވެ.
ބިންހެލުމުގައި ވެއްޓުނު ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ދިރިތިއްބާ ސަލާމަތް ކުރެވޭތޯ އަދިވެސް މަސައްކަތް ކުރަމުންދާ ކަމުގައި، އެ ކަމުގައި ހަރަކާތްތެރިވަމުންދާ ޓީމުތަކުން ބުނެއެވެ. މި ކަމުގައި އެހީތެރިކަން ފޯރުކޮށްދޭން ބޭރު ޤައުމުތަކުން ވެސް ވަނީ ޓީމުތައް ފޮނުވާފައެވެ. މަޣްރިބުގައި ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދޭން ގިނަ ޤައުމުތަކުން މަސައްކަތް ކުރަމުންދާއިރު، އެމެރިކާއިން ވަނީ 1 މިލިޔަން އެމެރިކާ ޑޮލަރުގެ އެހީގެ ސާމާނު ފޯރުކޮށްދޭނެ ކަމަށް ބުނެފައެވެ.
ބިންހެލުމުގައި މަގުތަކަށް ވެސް ބޮޑެތި ގެއްލުންތަކެއް ލިބުމާ ގުޅިގެން ސުންނާފަތިވެފައިވާ ބައެއް އަވަށްތަކުގައި ހާލުގައި ޖެހިފައިވާ މީހުންނަށް އިންސާނީ އެހީ ފޯރުކޮށްދޭން ހުރަސް އެޅިފައިވާ ކަމުގައި އޮފިޝަލުން ވިދާޅުވެއެވެ. "ކާއެތިކޮޅެއް ލިބިއްޖެ. ދެ ތިން ރަޖާ ވެސް ލިބިއްޖެ. ނަމަވެސް، އަދިވެސް ނިދަން ޖެހެނީ މަގުމަތީގައި. ޓެންޓެއް ފަދަ ހިޔާވަހިކަމެއް ވެސް އަދި ނުލިބޭ. ކުރިއަށް އޮތީ ވިއްސާރަ މޫސުން. ކުރިއަށް އޮތް ދުވަސްތަކުގައި އަހުރެމެންގެ ހާލު ވަރަށް ދެރަވާނެ. މި ތަނުގައި ގިނަ ޢަދަދެއްގެ ކުޑަކުދިން ވެސް އެބަތިބި،" ބިންހެލުމުގެ ސުންނާފަތިވި އަވަށެއް ކަމުގައިވާ ތީޚްތުގައި ދިރިއުޅޭ 18 އަހަރުގެ ޒުވާނެއް ކަމުގައިވާ އަފްރާޙް ފަޢުޒިއްޔާ ކިޔައިދިނެވެ.
ބިންހެލުމާ ގުޅިގެން މަޣްރިބުން ހިތާމަ ފާޅު ކުރަމުންދާއިރު، ދުނިޔޭގެ އެކި ކަންކޮޅުތަކުން ދަނީ މި ހިތާމައިގައި ބައިވެރިވަމުންނެވެ. މަޣްރިބުގެ ދާޚިލީ ވުޒާރާއިން ބުނީ ބިންހެލުމުގައި މަރުވި މީހުންގެ ޢަދަދު 2,946 އަށް އަރާފައިވާ ކަމުގައެވެ. އަދި، އިތުރު 5,674 މީހުން ޒަޚަމުވެފައިވާ ކަމުގައެވެ. ބިންހެލުން އައިސްފައި ވަނީ ހުކުރު ދުވަހުގެ ރޭގަނޑުގެ ވަގުތުގައި ގިނަ މީހުން ނިދާފައި ތިއްބައެވެ.
މަޣްރިބަށް މިފަދަ ނުރައްކާތެރި ބިންހެލުމެއް އެންމެ ފަހުން އައިސްފައި ވަނީ 1960 ވަނަ އަހަރުއެވެ. ރިކްޓަރ މިންގަނޑުން 6.7ގެ ބާރުމިނުގައި ރެކޯޑު ކުރެވިފައިވާ އެ ބިންހެލުން އައިސްފައި ވަނީ އަޣަދީރަށެވެ. އެ ބިންހެލުމުގައި 12,000 މީހުން މަރުވިއެވެ.