މެޑިޓެރޭނިޔަން ކަނޑުގައި އުފެދުނު ބާރުގަދަ ތޫފާން ޑެނިއެލް ލީބިޔާގެ ސަރަޙައްދުތަކަށް އަރައި ބޯކޮށް ވާރޭވެހި ފެންބޮޑުވުމާ ގުޅިގެން ގެއްލިފައިވާ މީހުންގެ ޢަދަދު 10,000 އަށްވުރެ މައްޗަށް އަރައިފިއެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައިވާ އެ ޤައުމުގެ އިރުމަތީގައިވާ ސަރަޙައްދުތަކަށެވެ. ފެންބޮޑުވުމާ ގުޅިގެން ހިނގި ހާދިސާތަކުގައި މަރުވި މީހުންގެ ޢަދަދު 5,000 އަށް އަރާފައިވާ ކަމުގައި އިރުމަތީ ލީބިޔާގައި ވެރިކަން ކުރާ ސަރުކާރުން ހާމަކުރެއެވެ.
މި ތޫފާނުގެ ސަބަބުން އެންމެ ބޮޑަށް ގެއްލުން ލިބިފައި ވަނީ ލީބިޔާގެ އިރުމަތީ އައްސޭރިފަށުގައި އޮންނަ ދަރްނާއަށެވެ. ގިނަ ސަރަޙައްދުތަކުގައި ފެންބޮޑުވެފައި ވަނީ ކޯރުތައް ފުރިގެން ބަންޑުންވުމާއި، ޑޭމްތައް ހަލާކުވުމުގެ ސަބަބުން ކަމުގައި މަސްރަޙު ދިރާސާކުރާ ފަރާތްތަކުން ހާމަކުރެއެވެ. ދަރްނާގެ އިތުރުން އެ ޤައުމުގެ އިރުމަތީގައި އޮންނަ ބަންޣާޒީ، ސޫސާ އަދި އަލް-މަރަޖުގެ ބޮޑު ސަރަޙައްދުތަކެއްގައި ވެސް ވަނީ ފެންބޮޑުވެފައެވެ.
ދަރްނާއަކީ 125,000 މީހުންގެ އާބާދީއެއް ދިރިއުޅޭ ރަށެކެވެ. ކޯރުތައް ފުރިގެން ފެންގަނޑު ބަންޑުންވެ، ސުނާމީއެއްގެ ގޮތުގައި ރަށުގެ ތެރެއަށް ފެތުރިގެން ދިޔަ ކަމުގައި ދަރްނާގެ ރައްޔިތުންނާ ހަވާލާދީ މީޑިޔާ ރިޕޯޓުތައް ބުނެއެވެ. ފެންބޮޑުވުމާ އެކު ގިނަ ޢަދަދެއްގެ ޢިމާރާތްތައް ވެއްޓިފައިވާއިރު، މަގުތަކާއި ޢުމްރާނީ ވަސީލަތްތަކުގެ އިތުރުން އެއްގަމު އުޅަނދުފަހަރަށް ވެސް ވަނީ ބޮޑެތި ގެއްލުންތަކެއް ލިބިފައެވެ. އެ ރަށުގެ 25 އިންސައްތަ ސުންނާފަތިވެފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ދަރްނާގައި އޮންނަ ދެ އަވަށުގެ ތެރެއިން އެއް އަވަށުން އެކަނިވެސް 1,700 އަށްވުރެ ގިނަ މީހުން މަރުވެފައިވާ ކަމަށާއި، ދެވަނަ އަވަށުން މަރުވި މީހުންގެ ޢަދަދު 500 އަށްވުރެ މައްޗަށް އަރާ ކަމުގައި ދަރްނާގައި ހުންނަ ވަޙްދާ ހޮސްޕިޓަލުގެ ޑިރެކްޓަރު މުޙައްމަދު އަލް-ޤަބީސީ ވިދާޅުވިއެވެ. މަރުވެފައިވާ މީހުންގެ ހަށިތަކާ އެކު ހޮސްޕިޓަލްތައް ފުރިފައިވާ ކަމުގައި ދަރްނާގައި ހަރަކާތްތެރިވާ ބޭރުގެ ނޫސްވެރިން ބުނެއެވެ.
އިންޓަރނޭޝަނަލް ފެޑެރާޝަން އޮފް ދި ރެޑް ކްރޮސް އެންޑް ރެޑް ކްރެސެންޓް ސޮސައިޓީޒްގެ އިސް އޮފިޝަލެއް ކަމުގައިވާ ތާމިރް ރަމަޟާން ވިދާޅުވީ ބަންޣާޒީން ވެސް ގިނަ ޢަދަދެއްގެ ބަޔަކު މަރުވެފައިވާ ކަމުގައެވެ. އަދި، ފެންބޮޑުވުމާ ގުޅިގެން 10,000 އަށްވުރެ ގިނަ މީހުން ގެއްލިފައިވާ ކަމަށާއި، އެ މީހުން ހޯދަން މަސައްކަތް ކުރަމުންދާ ކަމުގައި އޭނާ ވިދާޅުވިއެވެ. އެ މަސައްކަތުގައި އ.ދގެ އިދާރާތަކުން ވެސް ދަނީ މަސައްކަތް ކުރަމުންނެވެ.
ފެންބޮޑުވުމާ ގުޅިގެން ލީބިޔާގައި ހާލުގައި ޖެހިފައިވާ އެތަކެއް ހާސް ރައްޔިތުންނަށް އެހީތެރިކަން ފޯރުކޮށްދޭން ބޭރު ޤައުމުތަކުން ވެސް ދަނީ މަސައްކަތް ކުރަމުންނެވެ. އޭގެ ތެރޭގައި ތުރުކީވިލާތް ހިމެނެއެވެ. އެ ޤައުމުން ވަނީ މީހުން ސަލާމަތް ކުރުމުގެ މަސައްކަތުގައި ބޭނުންކުރާނެ އުޅަނދުފަރަހާއި، ޖަނަރޭޓަރު ސެޓާއި، ފެނާއި ކާބޯތަކެތި ލީބިޔާއަށް ފޮނުވަން ފަށާފައެވެ.
ލީބިޔާގެ ހުޅަނގާއި އިރުމަތީގައި ވެރިކަން ކުރަނީ ދެ ސަރުކާރަކުންނެވެ. އޭގެ ތެރެއިން ބައިނަލްއަޤްވާމީ މުޖުތަމަޢުން ބަލައިގަނެފައި ވަނީ ހުޅަނގުގައި ވެރިކަން ކުރާ ޢަބްދުލްޙާމިދު ދަބީބާގެ ސަރުކާރެވެ. ލީބިޔާގައި ދެ ސަރުކާރެއް އުފެދިފައި ވަނީ އެ ޤައުމުގެ އިންތިޚާބީ ބޮޑުވަޒީރު މުޣައްމަރް ޤައްޜާފީގެ ސަރުކާރު 2014 ވަނަ އަހަރު ވައްޓައިލުމާ ގުޅިގެންނެވެ. ޤައްޜާފީގެ ސަރުކާރު ވައްޓައިލާ އޭނާ އަވަހާރަ ކޮށްލާފައި ވަނީ ނޭޓޯއިންނެވެ.