ޔޫރޯ 2024 ކޮލިފައިން ގްރޫޕް އޭގައި ރޭ ކުޅުނު މެޗުގައި ސައިޕްރަސް އަތުން ސްޕެއިން ބޮޑު މޮޅެއް ހޯދައިފިއެވެ.
އަމިއްލަ ޤައުމުގައި ރޭ ކުޅުނު މެޗުން ސްޕެއިން މޮޅުވީ ފަސޭހަކަމާއެކު 6-0 ގެ ނަތީޖާއަކުންނެވެ.
މި މެޗުގައި ސްޕެއިނުން މޮޅު ކުޅުމެއް ދެއްކިއިރު، މެޗު ފަށައިގެން 18 ވަނަ މިނެޓުގައި ގަވީ ވަނީ އެ ޓީމަށް ލީޑު ނަގައިދީފައެވެ. އަދި މެޗުގެ 33 ވަނަ މިނެޓުގައި ސްޕެއިނަށް ލީޑު ފުޅާކޮށްދިން ލަނޑު ޖަހައިދިނީ މީކެލް މެރީނޯއެވެ.
މި މެޗުގެ ދެވަނަ ހާފުގައި ސްޕެއިނުން ގާތްގާތުގައި ހަތަރު ލަނޑު ކާމިޔާބުކުރިއިރު، މެޗުގެ 70 ވަނަ މިނެޓުގައި އެ ޓީމުގެ ތިންވަނަ ލަނޑު ޖަހައިދިނީ ހޮސެލޫއެވެ. އަދި އޭގެ ތިން މިނެޓު ފަހުން ފެރާން ޓޮރޭސް ވަނީ ސްޕެއިނުގެ ހަތަރުވަނަ ލަނޑު ޖަހައިދީފައެވެ.
މި މެޗުގައި ސްޕެއިނުން ކާމިޔާބުކުރި ފަސްވަނަ ލަނޑު މެޗުގެ 77 ވަނަ މިނެޓުގައި ކާމިޔާބުކޮށްދިނީ އަލެކްސް ބައޭނާއެވެ. ބަދަލަކަށް ކުޅެން ނުކުތްތާ މިނެޓެއް ފަހުން ބައޭނާ މި ލަނޑު ކާމިޔާބުކުރިއިރު، މިއީ ސްޕެއިންގެ ޤައުމީ ޓީމަށް އޭނާ ކުޅެދިން ފުރަތަމަ މެޗެވެ. ދެން މި މެޗުގައި ސްޕެއިނުން ކާމިޔާބުކުރި ހަވަނަ ލަނޑު މެޗުގެ 83 ވަނަ މިނެޓުގައި ޖަހައިދިނީ ފެރާން ޓޮރޭސްއެވެ.
މި މޮޅާއެކު ގްރޫޕް އޭގެ ދެވަނައިގައި ސްޕެއިން އޮތީ ކުޅުނު ހަތަރު މެޗުން ލިބުނު ނުވަ ޕޮއިންޓާއެކުއެވެ. ތިންވަނައިގައި އޮތް ނޯވޭއަށް ފަސް މެޗުން ހަތް ޕޮއިންޓް ލިބިފައިވާއިރު، އެއްވަނައިގައި އޮތީ ކުޅުނު ފަސް މެޗުންވެސް ކާމިޔާބުކޮށް 15 ޕޮއިންޓް ހޯދާފައިވާ ސްކޮޓްލަންޑެވެ. އަދި ސްޕެއިން އަތުން ބަލިވި ސައިޕްރަސް އޮތީ ތާވަލުގެ ފުލުގައި ޕޮއިންޓެއް ނުލިބިއެވެ.