ސްޕެއިންގެ ފުޓްބޯޅަ ފެޑެރޭޝަނުގެ ރައީސްގެ މަޤާމުން ލުއިސް ރުބިއާލޭސް އިސްތިއުފާދެއްވައިފިއެވެ.
އޭނާ މަގާމުން އިސްތިއުފާދެއްވާފައިވަނީ މި ފަހުން ނިމިގެންދިޔަ އަންހެނުންގެ ފީފާ ވޯލްޑް ކަޕުގެ އިނާމުދިނުމުގެ ރަސްމިއްޔާތުގެ ތެރެއިން ސްޕެއިނުގެ ފޯވާޑް ޖެނީ ހާމޯސޯއަށް އިހުތިރާމުކުޑަކޮށް އާންމުންގެ ކުރިމަތީގައި އަމަލުކުރި ގޮތުގެ ސަބަބުން، ގިނަ ބައެއްގެ ފާޑުކިޔުންތައް އަމާޒުވުމާ ގުޅިގެންނެވެ. އޭގެ ތެރޭގައި ސްޕެއިން ޓީމުގެ ކުޅުންތެރިންނާއި ދުނިޔޭގެ އެކި ކަންކޮޅުތަކުގެ އަންހެން ފުޓްބޯޅަ ކުޅުންތެރިން އަދި ކޯޗުން ހިމެނެއެވެ.
މިދިޔަ އަންގާރަ ދުވަހު ހާމޯސޯ ވަނީ ރުބިއާލޭސްގެ މައްސަލައިގައި ޤާނޫނީ ފިޔަވަޅު އަޅަންވެސް ނިންމާފައެވެ. އެއާއެކު ރުބިއާލޭސް މަޤާމުން އިސްތިއުފާ ދެއްވިއިރު، އޭނާ ވިދާޅުވީ އިސްތިއުފާ ހުށަހެޅީ އެ ފެޑެރޭޝަނުގެ އެކްޓިން ރައީސް ޕެޑްރޯ ރޮޗާއަށް ނެރުނު ބަޔާނެއްގައި ކަމަށެވެ. އަދި އިސްތިއުފާ ދެއްވީ އޭނާއަށް މަސައްކަތް ކުރިއަށް ނުގެންދެވޭނެތީ ކަމަށްވެސް ވަނީ ވިދާޅުވެފައެވެ.
މީގެ އިތުރުން އުމުރުން 46 އަހަރުގެ ރުބިއާލޭސް ވަނީ ޔުއެފާގެ ހިންގާ ކޮމިޓީގެ ނައިބު ރައީސްގެ މަޤާމުންވެސް އިސްތިއުފާދެއްވާފައެވެ.
ފާޑިކިޔުންތަކާއެކު ރުބިއާލޭސް މަޤާމުން އިސްތިއުފާދެއްވިއިރު، މި މައްސަލަ ފީފާގެ ޑިސިޕްލިނަރީ ކޮމިޓީންވެސް މީގެ ކުރިން ވަނީ ބަލަން ފަށާފައެވެ. އަދި މި މައްސަލައިގައި ސްޕެއިނުގެ 81 ކުޅުންތެރިއަކި ވަނީ ޤައުމީ ޓީމަށް ނުކުޅޭނެކަންވެސް ހާމަކޮށްފައެވެ. އަދި ސްޕެއިންގެ ޤައުމީ ޓީމުގެ ކޯޗު ފިޔަވައި ކޯޗިން ޓީމުގައި ހިމެނޭ ހުރިހާ މެންބަރުންވެސް ވަނީ މީގެ ކުރިން ޤައުމީ ޓީމުން ވަކިވާން ނިންމާފައެވެ.