ކުޅިވަރު ވަޞީލަތްތައް ޤާއިމުކުރެއްވުމަށް ކުރިއަށްގެންދަވާ މަޝްރޫޢުތަކުގެ ތެރެއިން ގއ. ކޮނޑޭ ޔޫތު ސެންޓަރު ތަރައްޤީކުރުމުގެ މަސައްކަތް ބަޔަކާ ޙަވާލުކުރައްވައިފިއެވެ.
ކުޅިވަރާ ބެހޭ ވުޒާރާގައި ކުރިއަށްގެންދިޔަ ރަސްމިއްޔާތެއްގައި ކޮނޑޭ ޔޫތު ސެންޓަރު ތަރައްޤީކުރުމުގެ މަސައްކަތް ޙަވާލުކުރައްވާފަވަނީ ލައިކަންސް އިންވެސްޓްމަންޓާއެވެ.
މި މަސައްކަތުގެ އެއްބަސްވުމުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އަޙްމަދު މުޙައްމަދެވެ. އަދި ލައިކަންސް އިންވެސްޓްމަންޓުގެ ފަރާތުން ސޮއިކުރެއްވީ އެ ކުންފުނީގެ ވެރިޔާ އަބްދުﷲ ކަލީމެވެ.
ކޮނޑޭ ޔޫތު ސެންޓަރު ތަރައްޤީކުރުމުގެ މަސައްކަތް ޙަވާލުކުރައްވާފަވަނީ މަސައްކަތް ފަށާތާ 125 ދުވަހުގެ ތެރޭގައި ނިންމާ ގޮތަށެވެ. މި މަޝްރޫޢަކީ ކުޅިވަރާ ބެހޭ ވުޒާރައިގެ ބަޖެޓުން ހަތަރު މިލިޔަން އެއްލައްކަ ތޭރަހާސް ހަސަތޭކަ ތިރީސް ފަސް ރުފިޔާ ތިރީސް ތިން ލާރި ޚަރަދުކޮށްގެން ކުރިޔަށް ގެންދަން ނިންމާފަވާ މަޝްރޫޢެކެވެ.